ରଘୁନାଥପୁର,୧୦ା୯(ଡି.ଏନ୍.ଏ.): ହାଇକୋର୍ଟଙ୍କ ନିର୍ଦ୍ଦେଶ ଅନୁଯାୟୀ, ରଘୁନାଥପୁର ତହସିଲ ଅନ୍ତର୍ଗତ ଧରାଧରପୁର ପଞ୍ଚାୟତସ୍ଥିତ ଭାସିଲପୁର ଗ୍ରାମ୍ୟ ରାସ୍ତାରୁ ଜବରଦଖଲ ଉଚ୍ଛେଦ ହୋଇଛି। ଏହି ସମୟରେ ତହସିଲ୍ଦାରଙ୍କ ଉପସ୍ଥିତିରେ ପୋଲିସ ଉପରକୁ ଅତର୍କିତ ଆକ୍ରମଣ କରାଯାଇଛି। ଏନେଇ ତହସିଲଦାର ରୂପାଲିକା ଦାଶ ରଘୁନାଥପୁର ଥାନାରେ ଲିଖିତ ଅଭିଯୋଗ କରିଛନ୍ତି। ଏହାକୁ ଭିତ୍ତିକରି ୫ ଅଭିଯୁକ୍ତଙ୍କୁ ଗିରଫ ପରେ କୋର୍ଟଚାଲାଣ କରାଯାଇଛି ବୋଲି ଆଇଆଇସି ରାଜକିଶୋର ବେହେରା ପ୍ରକାଶ କରିଛନ୍ତି। ସେମାନେ ହେଲେ ଏହି ଥାନା ଅନ୍ତର୍ଗତ ଫକୀର ଭୋଇଙ୍କ ସ୍ତ୍ରୀ ଚିତା ଭୋଇ, କିଶନନଗର ଥାନା ଅନ୍ତର୍ଗତ ବାଲିସୁକୁରିର ଅଞ୍ଜଳି ଭୋଇ, ସାରଳା ଭୋଇ ଏବଂ କମରପଦା ଗ୍ରାମର ମଙ୍ଗଳା ଭୋଇ, ମନୋଜ ଭୋଇ। ଅଭିଯୋଗ ଅନୁଯାୟୀ, ଭାସିଲପୁର ଗ୍ରାମର ନଣ୍ଡା ଭୋଇ ଘର ପାଖରୁ ମଥୁରା ଭୋଇ ଘର ପର୍ଯ୍ୟନ୍ତ ଗ୍ରାମ୍ୟ ରାସ୍ତାକୁ କେତେଜଣ ଲୋକ ଜବରଦଖଲ କରି ରଖିଥିଲେ। ଏ ସମ୍ପର୍କରେ ତହସିଲ କାର୍ଯ୍ୟାଳୟରେ ଅଭିଯୋଗ ହେବା ସତ୍ତ୍ୱେ ମଧ୍ୟ ଜବରଦଖଲକାରୀ କର୍ଣ୍ଣପାତ କରି ନ ଥିଲେ। ଫଳରେ ଗ୍ରାମବାସୀଙ୍କ ପକ୍ଷରୁ ହାଇକୋର୍ଟରେ ମାମଲା ରୁଜୁ କରାଯାଇଥିଲା। ଡବ୍ଲୁପି(ସି)ନଂ.୨୭୨୬୧/୨୦୨୧ ଅନୁଯାୟୀ, ହାଇକୋର୍ଟ ଉକ୍ତ ଜବରଦଖଲ ରାସ୍ତାକୁ ଉନ୍ମୁକ୍ତ କରିବା ପାଇଁ ରଘୁନାଥପୁର ତହସିଲଦାରଙ୍କୁ ନିର୍ଦ୍ଦେଶ ଦେଇଥିଲେ। ଏହି ନିର୍ଦ୍ଦେଶ ମୁତାବକ, ଶୁକ୍ରବାର ତହସିଲଦାର ଦାଶ, ଅତିରିକ୍ତ ତହସିଲଦାର ପ୍ରିୟଦର୍ଶୀ ସଂଗ୍ରାମକେଶରୀ ଖୁଣ୍ଟିଆ, ଅରଙ୍ଗ ଆର୍ଆଇ ପ୍ରଜ୍ଞା ପାରମିତା କୁଅଁର ସେଠାରେ ପହଞ୍ଚତ୍ ଉଚ୍ଛେଦ କାର୍ଯ୍ୟ ଆରମ୍ଭ କରିଥିଲେ। ଆଇଆଇସି ବେହେରା ପୋଲିସ ଫୋର୍ସ ସହ ଉପସ୍ଥିତ ଥିଲେ। ଉଚ୍ଛେଦ ସମୟରେ ଅଭିଯୁକ୍ତା ଚିତା ମେଶିନ ଆଗରେ ଶୋଇ କାର୍ଯ୍ୟରେ ବାଧା ଉପୁଜାଇଥିଲେ। ନିୟୋଜିତ ମହିଳା ପୋଲିସ ତାଙ୍କୁ ଉଠାଇବା ସମୟରେ ସେ ଜଣେ ମହିଳା ପୋଲିସ କର୍ମଚାରୀଙ୍କ ହାତକୁ କାମୁଡ଼ି ଦେଇଥିଲେ। ଏହାଛଡ଼ା ଫକୀରଙ୍କ ସମ୍ପର୍କୀୟ ଓ ବନ୍ଧୁବାନ୍ଧବମାନେ ପୋଲିସ ଉପରେ ଆକ୍ରମଣ କରିଥିଲେ। ଅଭିଯୋଗ ପରେ ପୋଲିସ ପକ୍ଷରୁ ମାମଲା (ନଂ.୧୬୮/୨୨) ରୁଜୁ ହୋଇଛି।
