ବଡବିଲ,୨୫।୧୧(ଡି.ଏନ୍.ଏ.): କେନ୍ଦୁଝର ଜିଲା ବଡ଼ବିଲସ୍ଥିତ ଏକ ହୋଟେଲରେ କର୍ମଚାରୀଙ୍କୁ ମରଣାନ୍ତକ ଆକ୍ରମଣ କରି ଲହୁଲୁହାଣ କରିବା ଅଭିଯୋଗରେ ପୋଲିସ ୩ ଅଭିଯୁକ୍ତଙ୍କୁ ଗିରଫ କରି ଶୁକ୍ରବାର କୋର୍ଟ ଚାଲାଣ କରିଛି। ଗିରଫ ଅଭିଯୁକ୍ତମାନେ ହେଲେ ବଡ଼ବିଲ ନ୍ୟୁ ମାର୍କେଟ ଅଞ୍ଚଳରେ ରହୁଥିବା ଶେଖ ଅନିଷ, ଏମ୍ଡି ସଦ୍ଦାମ ଓ ସୋନୁ ସିଂହ।
ସୂଚନା ଅନୁଯାୟୀ, ବଡ଼ବିଲସ୍ଥିତ ହୋଟେଲ ଭିକିର ନରେନ୍ଦ୍ର ମହାପାତ୍ର ନାମକ କର୍ମଚାରୀ ଗତ ବୁଧବାର ରାତିରେ ମୁଖ୍ୟ ଫାଟକ ବନ୍ଦ କରୁଥିଲାବେଳେ ହଠାତ ତିନିଜଣ ଯୁବକ ପହଞ୍ଚି ହୋଟେଲ ଖୋଲି ଖାଇବାକୁ ଓ ମଦ ଦେବାକୁ କହିଥିଲେ। ତେବେ ହୋଟେଲ ବନ୍ଦ ହୋଇଯାଇଥିବାରୁ କିଛି ମିଳିବ ନାହିଁ ବୋଲି କହିବାରୁ ଦୁର୍ବୃତ୍ତମାନେ ଅଶ୍ଳୀଳ ଭାଷାରେ ନରେନ୍ଦ୍ରଙ୍କୁ ଗାଳିଗୁଲଜ କରିଥିଲେ। ଏହାସହ ଏକ ଛୁରି ସାହାଯ୍ୟରେ ମରଣାନ୍ତକ ଆକ୍ରମଣ କରି ପଳାଇଥିଲେ। ଆକ୍ରମଣରେ ନରେନ୍ଦ୍ରଙ୍କ ଛାତିରେ ଆଘାତ ଲାଗିଥିଲା। ସୂଚନାପାଇ ପୋଲିସ ନରେନ୍ଦ୍ରଙ୍କୁ ଲହୁଲୁହାଣ ଅବସ୍ଥାରେ ଉଦ୍ଧାର କରି ବଡ଼ବିଲ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରକୁ ଚିକିତ୍ସାନିମନ୍ତେ ପଠାଇଥିଲା। ଗୁରୁବାର ନରେନ୍ଦ୍ର ଏ ନେଇ ଲିଖିତ ଅଭିଯୋଗ କରିବା ପରେ ପୋଲିସ ବଡ଼ବିଲ ଥାନା କେଶ ନଂ ୨୮୯/୨୦୨୨ରେ ଏକ ମାମଲା ରୁଜୁ କରି ତଦନ୍ତ ଆରମ୍ଭ କରିଥିଲା। ଶୁକ୍ରବାର ସକାଳେ ବଡ଼ବିଲ ଟ୍ୟାକ୍ସି ଷ୍ଟାଣ୍ଡରେ ଉକ୍ତ ଦୁର୍ବୃତ୍ତମାନେ ଥିବା ଖବରପାଇ ପୋଲିସ ଚଢ଼ାଉ କରିଥିଲା। ଘଟଣାସ୍ଥଳରୁ ପୋଲିସ ଅନିଷ, ସଦ୍ଦାମ ଓ ସୋନୁଙ୍କୁ ଗିରଫ କରିବା ସହ ଆକ୍ରମଣରେ ବ୍ୟବହୃତ ଛୁରିକୁ ଜବତ କରିଛି।
