ହାଇଦ୍ରାବାଦ, ୧୦ା୪(ପି.ଟି.)-ହାଇଦ୍ରାବାଦ ଏଫ୍ସିରୁ ରେକର୍ଡ ଟ୍ରାନ୍ସଫର ଫି’ ବିନିମୟରେ ଲିଷ୍ଟନ କୋଲାକୋଙ୍କ ସହ ଚୁକ୍ତି କରିଛି ଇଣ୍ଡିଆନ ସୁପର ଲିଗ୍ (ଆଇଏସ୍ଏଲ୍) ଦଳ ଏଟିକେ ମୋହନବାଗାନ। ହାଇଦ୍ରାବାଦ ଏଫ୍ସି ଓ ଏଟିକେ ମୋହନବାଗାନ ଦଳର ସହମତିରେ ଏହି ଟ୍ରାନ୍ସଫର ହୋଇଛି। ଏ ବାବଦରେ କେତେ କାରବାର ହୋଇଛି ତାହା ଗୋପନ ରଖାଯାଇଛି। ଜଣେ ଭାରତୀୟ ଫୁଟ୍ବଲ ଖେଳାଳି ଭାବେ କୋଲାକୋ ସବୁଠାରୁ ଅଧିକ ମୂଲ୍ୟରେ ଗୋଟିଏ କ୍ଲବରୁ ଅନ୍ୟ କ୍ଲବକୁ ଯାଇଥିବା କୁହାଯାଉଛି। ୨୨ବର୍ଷୀୟ ଏହି ଫରଓ୍ବାର୍ଡ ଖେଳାଳି ଜୁନ୍ ୧ରେ ଏଟିକେ ମୋହନବାଗାନ ଦଳରେ ଯୋଗଦାନ କରିବେ। କୋଲାକୋ ୨୦୨୦ ଜାନୁୟାରୀ ୨୩ରେ ହାଇଦ୍ରାବାଦ ଏଫ୍ସିରେ ଯୋଗ ଦେଇଥିଲେ। କ୍ଲବ ତରଫରୁ ସେ ୨୩ଥର ଖେଳିଛନ୍ତି। ଆଇଏସ୍ଏଲରେ ସେ ୪ଟି ଗୋଲ ସ୍କୋର କରିଛନ୍ତି। ତିନୋଟି ଗୋଲରେ ସେ ସହାୟତା ପ୍ରଦାନ କରିଛନ୍ତି। କ୍ଲବ ତରଫରୁ ସେ ଉଚ୍ଚକୋଟୀର ପ୍ରଦର୍ଶନ କରିଥିବାରୁ ଜାତୀୟ ଦଳ ତରଫରୁ ପଦାର୍ପଣ ଅପେକ୍ଷାରେ ରହିଛନ୍ତି।
