ଲକ୍ଷ୍ନୌ,୨୭ ।୩: ଉତ୍ତର ପ୍ରଦେଶ ପୋଲିସ ମାଫିଆ ଅତିକ ଅହମ୍ମଦଙ୍କୁ ସାବରମତି ଜେଲରୁ ଉତ୍ତର ପ୍ରଦେଶ ନିଆ ଯାଉଛି । ସୋମବାର ସକାଳ ସୁଦ୍ଧା ଅତିକଙ୍କ କାଫିଲା ଏମପି-ୟୁପି ବର୍ଡରରେ ପହଞ୍ଚି ଯାଇଛି । ରାତି ସାଢେ ୩ଟାରେ କୋଟାର ପେଟ୍ରୋଲ ପମ୍ପରେ କାଫିଲା କିଛି ସମୟ ପାଇଁ ଅଟକି ଯାଇଥିଲା । ଅତିକଙ୍କ କାଫିଲା ମଧ୍ୟ ପ୍ରଦେଶର ଶିବପୁରୀରୁ ପ୍ରାୟ ୧୧୦ କିଲୋମିଟର ଦୂରରେ ରହିଛି । ଏହା ରାଜସ୍ଥାନର ବାରାରେ ରହିଛି ।
ଜେଲରୁ ବାହାରିବା ପରେ ଅତିକ ଅହମ୍ମଦ ତାଙ୍କୁ ହତ୍ୟା କରାଯିବାର ଯୋଜନା କରାଯାଉଥିବା ଆଶଙ୍କା କରି ଭୟଭିତ ହୋଇଛନ୍ତି । ଅତିକଙ୍କୁ ଯେତେବେଳେ ଜେଲରୁ ବାହାରକୁ ପୋଲିସ ଭ୍ୟାନରେ ନିଆଯାଇଥିଲା, ସେତେବେଳେ ସେଠାରେ ଥିବା ମିଡିଆକୁ ସେ କହିଥିଲେ, ‘ହତ୍ୟା, ହତ୍ୟା’ । ହେଲେ ଖବରଦାତାମାନେ ପ୍ରଶ୍ନ କରିଥିଲେ କି ସେ ତ ପୋଲିସ ଭ୍ୟାନରେ ଯାଉଛନ୍ତି ପୋଲିସର କଷ୍ଟଡିରେ ତାଙ୍କୁ ଭୟ କାହିଁକି ଲାଗୁଛି । ହେଲେ ଅତିକ କହିଥିଲେ ମୋତେ ଏମାନଙ୍କ ପ୍ରୋଗ୍ରାମ ଜଣା । ଏମାନେ ମୋତେ ହତ୍ୟା କରିବାକୁ ଚାହୁଛନ୍ତି ।
ସୂଚନାଯୋଗ୍ୟ, ଅତିକ ୨୦୧୯ରୁ ଜେଲରେ ବନ୍ଦ ରହିଛନ୍ତି । ଯଦି ମାଫିଆ ଅତିକ ଅହମ୍ମଦଙ୍କୁ ଦୋଷୀ ସାବ୍ୟସ୍ତ କରାଯାଏ ତେବେ ଏହା ତାଙ୍କର ପ୍ରଥମ ସଜା ହେବ । କାରଣ ୩ ଦଶକ ପର୍ଯ୍ୟନ୍ତ ମାଫିଆ ଥିବା ଅତିକଙ୍କୁ କେବେ ସଜା ଶୁଣାଯାଇନାହିଁ ।
