ପ୍ରୟାଗରାଜ,୩୧ ।୩: ସାବରମତି ଜେଲରେ ଅତିକ ଅହମଦ ଏବେ କଏଦୀ ନମ୍ବର ୧୭୦୫୨ ଭାବେ ପରିଚିତ ହେବେ । ସଜା ଭୋଗୁଥିବା କଏଦୀ ଭାବେ ଶୁକ୍ରବାର ଜେଲ ପ୍ରଶାସନ ଅତିକଙ୍କ ନମ୍ବର ଜାରି କରିଛନ୍ତି । ସେ ଏବେ କଏଦୀଙ୍କ ପୋଷାକ ପିନ୍ଧିବେ ଓ ଜେଲରେ ଅନ୍ୟ କଏଦୀଙ୍କ ଭଳି କାମ ବି କରିବେ । ତାଙ୍କ ସାମ୍ନାରେ ଜେଲ ମାନୁଆଲ ହିସାବରେ ବିଭିନ୍ନ କାମର ସୂଚି ଦିଆଯାଇଛି । ଯେଉଁ କାମକୁ ସେ ବାଛିବେ ଅତିକ ସେହି କାମ କରିବେ ।
ସୂଚନାଯୋଗ୍ୟ, ପ୍ରୟାଗରାଜର ଏମପିଏମଏଲଏ କୋର୍ଟ ଉମେଶ ପାଲ ଅପହରଣ ମାମଲାରେ ଅତିକ ଅହମଦ ସମେତ ୩ ଜଣଙ୍କୁ ଆଜୀବନ ଦଣ୍ଡାଦେଶ ଦେଇଛନ୍ତି । କୋର୍ଟର ରାୟ ପରେ ଅତିକ ଅହମଦଙ୍କୁ ପୋଲିସ ଟିମ ବୁଧବାର ରାତି ପ୍ରାୟ ସାଢେ ୮ଟାରେ ସାବରମତି ଜେଲରେ ପହଞ୍ଚାଇ ଦେଇଥିଲେ । ଏହାସହ ପୋଲିସ ଜେଲ ପ୍ରଶାସନକୁ ଅତିକଙ୍କ ଆଜୀବନ କାରାବାସ ସମ୍ବନ୍ଧିତ କାଗଜପତ୍ର ହସ୍ତାନ୍ତର କରିଥିଲେ ।
ରାତିରେ ଅତିକଙ୍କୁ ପୁରୁଣା ବାରାକକୁ ପଠାଇ ଦିଆଯାଇଥିଲା । ଗୁରୁବାର ସାବରମତି ଜେଲ ଅଧିକାରୀ ଅତିକଙ୍କୁ ସଜାପ୍ରାପ୍ତ କଏଦୀ ଭାବେ ବାରକ ଯୋଗାଇ ଦେଇଥିଲେ । ସେ କଏଦୀ ନମ୍ବର ୧୭୦୫୨ ଭାବେ ପରିଚିତ ହେବେ ।
