ଭୁବନେଶ୍ୱର,୨୬।୬(ବ୍ୟୁରୋ): ଓଲିଉଡ୍ର ଚର୍ଚ୍ଚିତ ଖଳନାୟକ ତଥା ଲୋକପ୍ରିୟ ଅଭିନେତା ରାଇମୋହନ ପରିଡ଼ାଙ୍କ ମୃତଦେହ ଶୁକ୍ରବାର ଘରର ଫ୍ୟାନ୍ରେ ଝୁଲନ୍ତା ଅବସ୍ଥାରେ ପୋଲିସ ଜବତ କରିଥିଲା। ପାରିପାର୍ଶ୍ୱିକ ସ୍ଥିତି ଓ ପ୍ରାଥମିକ ତଦନ୍ତରୁ ଏହା ଏକ ଆତ୍ମହତ୍ୟା ବୋଲି ଡିସିପି ପ୍ରତୀକ ସିଂ କହିଥିଲେ। ହେଲେ ଘଟଣାର ଦିନକ ପରେ ବି ଆତ୍ମହତ୍ୟାର କାରଣ ଜଣାପଡ଼ି ନାହିଁ। ଏପଟେ ରାଇମୋହନଙ୍କ ମୃତ୍ୟୁକୁ ସହଜରେ ଗ୍ରହଣ କରିପାରୁ ନାହିଁ ସିନେ, ଯାତ୍ରା ଓ ମଞ୍ଚ ଜଗତ। ଘଟଣାଦିନ କେତେଜଣ ଅଭିନେତା ଓ କଳାକାର ତଦନ୍ତ ଦାବି କରିଥିଲେ। ପାରିବାରିକ ଅଶାନ୍ତି କଥା ଉଠିଥିଲା। ତାଙ୍କ ଭଉଣୀ ମଧ୍ୟ ଗଣମାଧ୍ୟମ ଆଗରେ ରାଇମୋହନଙ୍କୁ ହତ୍ୟା କରାଯାଇଥିବା ଆଶଙ୍କା ପ୍ରକାଶ କରିଥିଲେ। ମଞ୍ଚେଶ୍ୱର ଥାନା ପୋଲିସ ଏକ ଅପମୃତ୍ୟୁ ମାମଲା ରୁଜୁ କରି ତଦନ୍ତ ଜାରି ରଖିଥିବାବେଳେ ମୃତ୍ୟୁ ପଛର କାରଣ ଖୋଜିବାରେ ଲାଗିଛି। ଶନିବାର ୪ ଜଣିଆ ମହିଳା ଅଧିକାରୀଙ୍କୁ ନେଇ ଏକ ପୋଲିସ ଟିମ୍ ସନ୍ଧ୍ୟାରେ ରାଇମୋହନଙ୍କ ଘରେ ପହଞ୍ଚତ୍ ପରିବାର ସଦସ୍ୟଙ୍କୁ ପଚରାଉଚରା କରିଛି। ସ୍ତ୍ରୀ ରଞ୍ଜିତା ପରିଡା, ୨ ଝିଅ, ଜ୍ୱାଇଁ, ୨ ଡ୍ରାଇଭରଙ୍କଠାରୁ କିଛି ତଥ୍ୟ ହାସଲ କରି ବହୁ ସମୟ ପରେ ବାହାରିଥିଲା। କିନ୍ତୁ କୌଣସି ଅଧିକାରୀ ଗଣମାଧ୍ୟମ ଆଗରେ କିଛି ବି ମୁହଁ ଖୋଲି ନ ଥିଲେ। ପୋଲିସର ତଦନ୍ତ ଆଗେଇ ଚାଲିଥିବାବେଳେ ଶବ ବ୍ୟବଚ୍ଛେଦ ରିପୋର୍ଟ ଆସିଲେ ରାଇମୋହନଙ୍କ ମୃତ୍ୟୁର ପ୍ରକୃତ କାରଣ ଜଣାପଡ଼ିବ।
ରାଇମୋହନଙ୍କ ବଡ଼ ଝିଅ ଶେଫାଳି ଓ ସ୍ତ୍ରୀ ରଞ୍ଜିତା ଶପିଂ କରିବାକୁ ଶୁକ୍ରବାର ସକାଳ ୧୦.୪୦ରେ ଘରୁ ବାହାରିଥିଲେ। ପ୍ରଥମେ କମ୍ପ୍ୟୁଟର କ୍ଲାସ୍ରୁ ସାନ ଝିଅ ଲିତୁଙ୍କୁ କଲେଜରେ ଛାଡ଼ି କଟକ ଅଭିମୁଖେ ଯାଇଥିଲେ। ଏହି ସମୟରେ ରାଇମୋହନ ଘରେ ଏକାକୀ ଥିଲେ। ବଡ଼ ଝିଅ ଓ ସ୍ତ୍ରୀଙ୍କୁ ଫୋନ କଲ୍ କରି କଟକରେ ପହଞ୍ଚତ୍ଲଣି କି? ଗାଡ଼ି କେଉଁଠି ପାର୍କିଂ କରିଛ? କ’ଣ ଖାଇଛ ଏଭଳି ଅନେକ କଥା ପଚାରିଥିଲେ। ହେଲେ ୧୧ଟା ପରେ ୨ ଝିଅ ଓ ସ୍ତ୍ରୀଙ୍କୁ ୮ ମିନିଟ ମଧ୍ୟରେ ‘ବାଏ’ ମେସେଜ କରିଥିଲେ। ଶେଷ ମେସେଜ୍ ୧୧ଟା ୧୯ରେ ଯାଇଥିଲା। ସେପଟେ ଲିତୁ କଲେଜରେ ଥିବା ବେଳେ ବାପାଙ୍କୁ କୌଣସି କାମରେ କଲ୍ କରିଥିଲେ। ହେଲେ ରାଇମୋହନ ଫୋନ୍ ଉଠାଇ ନ ଥିଲେ। ବାପା ଫୋନ୍ ନ ଉଠାଇବାରୁ ଲିତୁ ପଳାଶୁଣିରେ ରହୁଥିବା ତାଙ୍କର ୨ୟ ଡ୍ରାଇଭର ଚାଲୁଙ୍କୁ ଫୋନ୍ କରି ଘରକୁ ଯିବାକୁ କହିଥିଲେ। ଡ୍ରାଇଭର ଚାଲୁ ସଙ୍ଗେ ସଙ୍ଗେ ଘରକୁ ଆସି କଲିଂ ବେଲ୍ ମାରିଥିଲେ। ପରେ କବାଟରେ ହାତ ମାରିବାରୁ ଭିତରୁ ଲକ ନ ଥିବାରୁ ତାହା ଖୋଲି ଯାଇଥିଲା। ଘର ଭିତରକୁ ପଶିବା ବେଳକୁ ରାଇମୋହନ ଫ୍ୟାନରେ ଝୁଲି ରହିଥିବା ଦେଖିବାକୁ ପାଇଥିଲେ। ଏନେଇ ଚାଲୁ ସଙ୍ଗେ ସଙ୍ଗେ ଲିତୁଙ୍କୁ ଫୋନ କରି ଘଟଣା ସମ୍ପର୍କରେ କହିବାରୁ ଘଟଣା ଲୋକଲୋଚନକୁ ଆସିଥିଲା।
୩୦ବର୍ଷ ପୂର୍ବେ ପ୍ରେମ ବିବାହ କରିଥିଲେ
ଖଳନାୟକ ସାଜି ପରଦା ତଥା ମଞ୍ଚରେ ନାଲି ଆଖି ଦେଖାଇ ଡରାଉଥିବା ରାଇମୋହନ ପରିଡ଼ା ବାସ୍ତବରେ ଜଣେ ସରଳ ଓ ଅମାୟିକ ମଣିଷ ଥିଲେ। ନିଜର ନିଆରା ଡାଏଲଗ୍ ଓ ବଳିଷ୍ଠ ଅଭିନୟ ପାଇଁ ଏକ ସ୍ବତନ୍ତ୍ର ଛାପ ଛାଡ଼ିଯାଇଛନ୍ତି। ଚଳଚ୍ଚିତ୍ର, ଯାତ୍ରାରେ ସବୁବେଳେ ପ୍ରେମରେ ବାଧକ ସାଜୁଥିବା ରାଇମୋହନ ନିଜେ କିନ୍ତୁ ପ୍ରେମ ବିବାହ କରିଥିଲେ। ରାଇମୋହନ ଏବଂ ରଞ୍ଜିତା ସେନାପତିଙ୍କ ଜାତି ଅଲଗା ଥିବାରୁ ସେମାନଙ୍କ ପ୍ରେମକୁ ପରିବାର ପକ୍ଷରୁ ଘୋର ବିରୋଧ କରାଯାଇଥିଲା। ମାତ୍ର ଘର ଲୋକଙ୍କ ବାରଣକୁ ତ୍ରୂକ୍ଷେପ ନ କରି ଦୁହେଁ ବିବାହ କରିଥିଲେ। ଭୁବନେଶ୍ୱରରେ ଥିବା ଆମଫୋଇ ସଂସ୍ଥାଠାରେ ୧୯୯୨ ଏପ୍ରିଲ ୯ରେ ୨୯ ବର୍ଷୀୟ ରାଇମୋହନ ଏବଂ ୨୦ ବର୍ଷୀୟା ରଞ୍ଜିତାଙ୍କ ବିବାହ ହୋଇଥିଲା। ବିବାହ ଦିନ ଦୁହେଁ ବନ୍ଧୁ ତଥା ଅଭିନେତା ଅଶ୍ରୁମୋଚନ ଏବଂ ଅନ୍ୟ କେତେଜଣ ବନ୍ଧୁଙ୍କ ସହ ସଂସ୍ଥାରେ ଆସି ପହଞ୍ଚତ୍ଥିଲେ। ଉଭୟଙ୍କ ବିବାହଯୋଗ୍ୟ ବୟସ ହୋଇ ସାରିଥିବାରୁ ସେହିଠାରେ ହିଁ ସେମାନଙ୍କ ବିବାହ ହୋଇଥିଲା। ଏ ସମ୍ପର୍କରେ ସଂସ୍ଥାର ସମ୍ପାଦକ ବି. ରାମଚନ୍ଦ୍ର ସିଏସ୍ଟି ଭୋଲଟେୟାର କହିଛନ୍ତି, ନିଜ ଭଲପାଇବାକୁ ସ୍ବୀକୃତି ଦେବାକୁ ସେ ଏଠାକୁ ଆସିଥିଲେ। ବିବାହ ପରେ ସେମାନଙ୍କୁ ସାର୍ଟିଫିକେଟ ପ୍ରଦାନ କରାଯାଇଥିଲା। ୨୦୦୫ରେ ସଂସ୍ଥାର ୨୫ ବର୍ଷ ପୂର୍ତ୍ତି ଉତ୍ସବରେ ସେ ତାଙ୍କ ପରିବାର ସହିତ ଉତ୍ସବରେ ଯୋଗ ଦେଇଥିଲେ। ତେବେ ଏଭଳି ଜଣେ ବ୍ୟକ୍ତିଙ୍କ ମୃତ୍ୟୁକୁ ସହଜରେ ଗ୍ରହଣ କରି ହେଉନି ବୋଲି ଭୋଲ୍ଟେୟାର କହିଛନ୍ତି।
