ତିହିଡ଼ି,୭ା୬(କାଳନ୍ଦି ବେହେରା): ଭଦ୍ରକ ଜିଲା ଧାମନଗର ବ୍ଲକର ଆସୁରାଳୀ ଅଞ୍ଚଳ ପାଇଁ ଗର୍ବ ଓ ଗୌରବ ଆଣିଛନ୍ତି ଅସୁରାଳିର ଯୁବ ପ୍ରତିଭା ସୌରଜ୍ୟୋତି ଦାସ । ପ୍ରଥମ ପ୍ରୟାସରେ ଏୟାରଫୋର୍ସ Y ଗ୍ରୁପ ପରୀକ୍ଷାରେ ସାରା ଓଡ଼ିଶାରେ ପ୍ରଥମ ସ୍ଥାନ ଅଧିକାର କରି ସେ ନିଜ ଅଞ୍ଚଳ ସହ ଜିଲାର ନାମକୁ ଉଜ୍ଜ୍ୱଳ କରିଛନ୍ତି ।
ଗୋପବନ୍ଧୁ ଦାସ ଓ ନିବେଦିତା ଦାସଙ୍କ ପୁତ୍ର ସୌରଜ୍ୟୋତି ବର୍ତ୍ତମାନ ରେଭେନ୍ସା ବିଶ୍ବବିଦ୍ୟାଳୟରେ ଅଧ୍ୟୟନରତ ଥିବାବେଳେ ତାଙ୍କର +୨ ଶିକ୍ଷା Ravenshaw Higher Secondary Schoolରୁ ଏବଂ ଦଶମ ଶ୍ରେଣୀ ଆସୁରାଳୀ ଏସଏସଭିଏମ୍ ବିଦ୍ୟାଳୟରୁ ସମ୍ପୂର୍ଣ୍ଣ କରିଥିଲେ। ମାତ୍ର ୧୮ ବର୍ଷ ବୟସରେ ଏଭଳି ସଫଳତା ହାସଲ କରି ସେ ଯୁବପିଢ଼ୀଙ୍କ ପାଇଁ ଏକ ଆଦର୍ଶ ପାଲଟିଛନ୍ତି।
ଏହି ଅବସରରେ ଆସୁରାଳୀର ବିଶିଷ୍ଟ ସମାଜସେବୀ ସୂରଜ ସାହୁ ସୌରଜ୍ୟୋତିଙ୍କୁ ଭେଟି ପୁଷ୍ପଗୁଚ୍ଛ ପ୍ରଦାନ କରି ହୃଦୟରୁ ଅଭିନନ୍ଦନ ଜଣାଇଛନ୍ତି । ସୂରଜ ସାହୁ କହିଛନ୍ତି ଯେ, ଆଜିର ଯୁବ ସମାଜ ପାଇଁ ସୌରଜ୍ୟୋତିଙ୍କ ସଫଳତା ଏକ ପ୍ରେରଣାଦାୟକ ଉଦାହରଣ। କଠିନ ପରିଶ୍ରମ, ନିଷ୍ଠା ଓ ଦୃଢ଼ ଇଚ୍ଛାଶକ୍ତି ଥିଲେ ଗ୍ରାମାଞ୍ଚଳର ଛାତ୍ରଛାତ୍ରୀମାନେ ମଧ୍ୟ ରାଜ୍ୟ ଓ ଜାତୀୟ ସ୍ତରରେ ସଫଳତା ହାସଲ କରିପାରିବେ ବୋଲି ସେ ମତ ପ୍ରକାଶ କରିଛନ୍ତି।
ସୂରଜ ସାହୁ ଆହୁରି କହିଛନ୍ତି ଯେ, ଅସୁରାଳୀ ଭଳି ଗ୍ରାମାଞ୍ଚଳରୁ ଏଭଳି ମେଧାବୀ ଯୁବକଙ୍କ ଉଦୟ ଅଞ୍ଚଳର ଶିକ୍ଷା ଓ ପ୍ରତିଭାର ପରିଚୟ ବହନ କରୁଛି । ଭବିଷ୍ୟତରେ ସୌରଜ୍ୟୋତି ଦେଶସେବାରେ ନିଜକୁ ସମର୍ପିତ କରି ଆହୁରି ଅନେକ ସଫଳତା ଅର୍ଜନ କରିବେ ବୋଲି ସେ ଆଶା ବ୍ୟକ୍ତ କରିଛନ୍ତି। ଏହି ସଫଳତା ପାଇଁ ଅଞ୍ଚଳବାସୀଙ୍କ ମଧ୍ୟରେ ଖୁସିର ଲହରୀ ଖେଳିଯାଇଛି ।
