ଲକ୍ଷ୍ନୌ,୨୧।୧୧: ଭାରତୀୟ ମହାକାଶ ଗବେଷଣା ସଂସ୍ଥା (ଇସ୍ରୋ) ଗଗନୟାନ ମିଶନକୁ ସଫଳ କରିବା ଦିଗରେ ଆଗେଇ ଚାଲିଛି। ୧୦,୦୦୦ କୋଟି ଟଙ୍କା ବ୍ୟୟରେ ନିର୍ମିତ ସ୍ପେସ୍କ୍ରାଫ୍ଟ ମିଶନ ୨୦୨୪ରେ ଶେଷ ହେବା ନେଇ ବୈଜ୍ଞାନିକମାନେ ଆଶାବାଦୀ। ଗଗନୟାନ ମିଶନର ସଫଳ ରୂପାୟନ ଲାଗି କାର୍ଯ୍ୟ କରୁଥିବା ଇସ୍ରୋ ଶନିବାର ମେନ୍ ପାରାଚ୍ୟୁଟ ଏୟାରଡ୍ରପ୍ ଟେଷ୍ଟ୍ (ଆଇଏମ୍ଏଟି) କରିଛି।
ଏହି ପାରାଚ୍ୟୁଟ ଜରିଆରେ ମହାକାଶଚାରୀମାନେ ସ୍ପେସ୍ରୁ ପୃଥିବୀରେ ଅବତରଣ କରିବେ। ଇସ୍ରୋ ପକ୍ଷରୁ ଉତ୍ତର ପ୍ରଦେଶ ଝାନ୍ସିର ବବିନା ଫିଲ୍ଡ ଫାୟାର୍ ରେଞ୍ଜ (ବିଏଫ୍ଏଫ୍ଆର୍)ରେ ଆଇଏମ୍ଏଟିର ଟେଷ୍ଟ୍ କରାଯାଇଛି। ବିକ୍ରମ ସାରାଭାଇ ସ୍ପେସ୍ ସେଣ୍ଟର (ଭିଏସ୍ଏସ୍ସି) ଏହି ସ୍ବତନ୍ତ୍ର ଆକାଶଛତାକୁ ତିଆରି କରିଛି। କ୍ରିଉ ମଡେଲ ମାସ୍ (ମହାକାଶକୁ ରକେଟ୍ ପ୍ରେରଣ ପରେ ପୃଥିବୀକୁ ଫେରୁଥିବା ଅଂଶ)ର ଓଜନ ସହିତ ଏହାର ଓଜନ ସମାନ । ଏହି ପାରାଚ୍ୟୁଟ ସାହାଯ୍ୟରେ ମହାକାଶଚାରୀମାନେ ପୃଥିବୀ ପୃଷ୍ଠରୁ ୨.୫ କିଲୋମିଟର ଉପରେ ଆସି ପହଞ୍ଚିବା ପରେ ଏୟାରଫୋର୍ସର ଆଇଏଲ୍- ୭୬ ଏୟାରକ୍ରାଫ୍ଟ ଦ୍ୱାରା ଅଷ୍ଟ୍ରୋନଟ୍ମାନେ ପୃଥିବୀ ପୃଷ୍ଠକୁ ଆସିବେ ବୋଲି ଇସ୍ରୋ କହିଛି।
ମୋଟ ୧୦ଟି ପାରାଚ୍ୟୁଟକୁ ମିଶାଇ ଏହି ସ୍ବତନ୍ତ୍ର ଆକାଶଛତା ତିଆରି କରାଯାଇଛି। ଗଗନୟାନରେ ବ୍ୟବହାର ହେବାକୁ ଥିବା ପାରାଚ୍ୟୁଟର ବେଗ ନିୟନ୍ତ୍ରଣ କ୍ଷମତା ରହିିଛି। ୧୦ଟି ଆକାଶଛତା ମଧ୍ୟରୁ ୩ଟି ପାରାଚ୍ୟୁଟ ମହାକାଶଚାରୀଙ୍କୁ ପୃଥିବୀକୁ ଫେରାଇ ଆଣିବାକୁ ସକ୍ଷମ। ଶନିବାର କରାଯାଇଥିବା ଏହି ପରୀକ୍ଷଣରେ ମୁଖ୍ୟ ଆକାଶଛତାରେ ତ୍ରୁଟି ପରିଲକ୍ଷିତ ହୋଇଥିଲା। ସଫଳ ପରୀକ୍ଷଣ ପରେ ହିଁ ଭାରତ ନିଜର ପ୍ରଥମ ହ୍ୟୁମାନ ସ୍ପେସ୍ ଫ୍ଲାଇଟ୍ ମିଶନରେ ପାରାଚ୍ୟୁଟକୁ ସାମିଲ କରିବ। ଇସ୍ରୋ ଏବଂ ପ୍ରତିରକ୍ଷା ଗବେଷଣା ଓ ଉନ୍ନୟନ ସଂଗଠନ (ଡିଆର୍ଡିଓ) ମିଳିତ ଭାବେ ଉକ୍ତ ମିଶନ ଉପରେ କାର୍ଯ୍ୟ କରୁଛନ୍ତି।
