ପିପିଲି, ୧୧।୮(ସ୍ବ.ପ୍ର./ଡି.ଏନ୍.ଏ): ସରକାରୀ ସହାୟତା ମଞ୍ଜୁର ପାଇଁ ଜଣେ ଚାଷୀଙ୍କଠାରୁ ୬ହଜାର ଟଙ୍କା ଲାଞ୍ଚ ନେଇ ପିପିଲି ପ୍ରାଣୀ ଚିକିତ୍ସା କେନ୍ଦ୍ରର ସହକାରୀ ପ୍ରାଣୀ ଚିକିତ୍ସାଧିକାରୀ ଡା. ଶୁଭ୍ରାଂଶୁ ସାହୁ ସୋମବାର ଭିଜିଲାନ୍ସ ହାତରେ ଧରାପଡ଼ିଛନ୍ତି। ତାଙ୍କ ନାମରେ ୟୁ/ସି ୭ପିସି ଆକ୍ଟ-୨୦୧୮ ଦଫାରେ କେସ୍ ନଂ. ୨୧/୨୦ ରୁଜୁ କରାଯାଇଛି। ଏ ନେଇ ତଦନ୍ତ ଜାରି ରହିଥିବା ଭିଜିଲାନ୍ସ ଅଧିକାରୀ ସୂଚନା ଦେଇଛନ୍ତି।
ସୂଚନା ଅନୁଯାୟୀ, ପିପିଲି ବ୍ଲକ ମଙ୍ଗଳପୁର ପଞ୍ଚାୟତ ଅଧୀନ ମାଟିଆପଡ଼ା ଗ୍ରାମର ସନାତନ ବେହେରା କୁକୁଡ଼ା ଚାଷ କରିଥିଲେ। ତେବେ ଫନୀ ବାତ୍ୟାରେ ବହୁ କୁକୁଡ଼ା ମରିଯିବାରୁ ତାଙ୍କର ବ୍ୟାପକ କ୍ଷତି ଘଟିଥିଲା। ସେ ସରକାରୀ ସହାୟତା ପାଇବା ପାଇଁ ପିପିଲି ପ୍ରାଣୀ ଚିକିତ୍ସା କେନ୍ଦ୍ରର ଦ୍ୱାରସ୍ଥ ହୋଇଥିଲେ। ବାରମ୍ବାର ଦୌଡ଼ି ମଧ୍ୟ ସହାୟତା ମିଳି ନ ଥିଲା। ଅନ୍ୟପକ୍ଷରେ ସହାୟତା ମଞ୍ଜୁର କରିବା ଲାଗି ସହକାରୀ ପ୍ରାଣୀ ଚିକିତ୍ସା ଅଧିକାରୀ ସାହୁ ତାଙ୍କୁ ୬ହଜାର ଟଙ୍କା ଲାଞ୍ଚ ମାଗିଥିଲେ। ଫଳରେ ସନାତନ ଭିଜିଲାନ୍ସ ବିଭାଗକୁ ଏ ନେଇ ଅଭିଯୋଗ ଜଣାଇଥିଲେ। ଆଗରୁ ମଧ୍ୟ ଅନେକ ଚାଷୀଙ୍କୁ ସାହୁ ଲାଞ୍ଚ ମାଗିଥିବାର ଅଭିଯୋଗ ଭୁବନେଶ୍ୱର ଭିଜିଲାନ୍ସ ପାଖରେ ହୋଇଥିଲା। ତେଣୁ ସାହୁଙ୍କୁ ଗିରଫ କରିବା ପାଇଁ ଭିଜିଲାନ୍ସ ବିଭାଗ ଯୋଜନା ପ୍ରସ୍ତୁତ କରିଥିଲା। ସେହି ଅନୁସାରେ ସୋମବାର ସନାତନ ରାସାୟନିକ ବୋଳା ଟଙ୍କାକୁ ସହକାରୀ ପ୍ରାଣୀ ଚିକିତ୍ସାଧିକାରୀ ସାହୁଙ୍କୁ ସିଧାସଳଖ ଦେବାବେଳେ ଆଗରୁ ସେଠାରେ ଲୁଚି ରହିଥିବା ଭୁବନେଶ୍ୱରର ଭିଜିଲାନ୍ସ ଟିମ୍ ତାଙ୍କୁ ଗିରଫ କରିଥିଲେ।
