ବାରିପଦା ଅଫିସ, ୨୯ା୮- ବିପର୍ଯ୍ୟୟ ପ୍ରଶମନ ଓ ରାଜସ୍ବ ବିଭାଗ ମନ୍ତ୍ରୀ ସୁଦାମ ମାରାଣ୍ଡି ଶୁକ୍ରବାର ମୟୂରଭଞ୍ଜ ଜିଲା ଗସ୍ତରେ ଆସି ବନ୍ୟା ପରିସ୍ଥିତିର ସମୀକ୍ଷା କରିଥିଲେ। ଜିଲାପାଳ ବିନୀତ ଭରଦ୍ୱାଜ, ଉପଜିଲାପାଳ ପି ଅନ୍ବେଷା ରେଡ୍ଡି, ପିଡି ଡିଆରଡିଏ ସ୍ବଧାଦେବ ସିଂ, ଅତିରିକ୍ତ ଜିଲାପାଳ(ରାଜସ୍ବ) ବିବେକାନନ୍ଦ ସାହୁ, ଜିଲା ଜରୁରୀକାଳୀନ ଅଧିକାରୀ ସୁଜୟ କୁମାର ପତି, ସମସ୍ତ ଉପଜିଲାପାଳ ଓ ପୂର୍ତ୍ତ, କୃଷି, ଗ୍ରାମ୍ୟ ଉନ୍ନୟନ, ଜଳସେଚନ, ବିଦ୍ୟୁତ୍ ଏବଂ ବିଭିନ୍ନ ବିଭାଗର ଅଧିକାରୀମାନେ ଉପସ୍ଥିତ ରହି ପରିସ୍ଥିତି ସମ୍ପର୍କରେ ବିସ୍ତୃତ ଆଲୋଚନା କରିଥିଲେ। କ୍ଷୟକ୍ଷତି ସମ୍ପର୍କରେ ଆକଳନ କରି ତୁରନ୍ତ ଜିଲା ପ୍ରଶାସନକୁ ଜଣାଇବାକୁ ମନ୍ତ୍ରୀ କହିଥିଲେ। ଲଘୁଚାପ ଜନିତ ବର୍ଷା ଓ ବନ୍ୟାରେ ମୃତକଙ୍କ ସମ୍ପର୍କିତ ରିପୋର୍ଟ ଏସ୍ଆର୍ସିଙ୍କୁ ଜଣାଇବା ସହ ସେମାନଙ୍କ ପରିବାରକୁ ଅନୁକମ୍ପା ରାଶି ପ୍ରଦାନ କରିବା ପାଇଁ ମନ୍ତ୍ରୀ ନିର୍ଦ୍ଦେଶ ଦେଇଥିଲେ।
ବୁଢାବଳଙ୍ଗ, ଗଙ୍ଗାହାର, ଜମ୍ଭୀରା, ଜରାଳି ଓ ସରାଳି ନଦୀର ବନ୍ୟା ଜଳ ୮ଟି ବ୍ଲକର ୩୦୬ଟି ଗ୍ରାମରେ ବ୍ୟାପକ କ୍ଷୟକ୍ଷତି କରିଛି ା ଜିଲା କୃଷି ବିଭାଗର ପ୍ରାରମ୍ଭିକ ସୂଚନା ଅନୁଯାୟୀ ୭୦୩୯ହେକ୍ଟର ଧାନ ଓ ୧୦୬୩ ହେକ୍ଟର ଅଣଧାନ ଚାଷ ଜମିକୁ ମିଶାଇ ମୋଟ ୮୧୦୨ହେକ୍ଟର ଜମିରେ ବନ୍ୟା ଜଳ ପ୍ରବେଶ କରିଛି ା ଜିଲାର ଶାମାଖୁଣ୍ଟା, ବେତନଟୀ, ବଡ଼ସାହି, ରାସଗୋବିନ୍ଦପୁର, କରଞ୍ଜିଆ, ଶୁକୃଳି, ରରୁଆଁ ଓ ବହଳଦା ଆଦି ବ୍ଲକର ୬୨ଟି ପଞ୍ଚାୟତରେ ଧାନ, ମକା, ତୈଳବୀଜ ଶସ୍ୟ ନଷ୍ଟ ହୋଇଥିବା ଅନୁମାନ କରାଯାଇଛି ା ସେହିପରି ସର୍ବାଧିକ କ୍ଷୟକ୍ଷତି ହୋଇଥିବା ବଡ଼ସାହି ବ୍ଲକ ଅଧୀନ୧୪ଟି ପଞ୍ଚାୟତର ୧୧୨ଟି ଗ୍ରାମର ୪୯୯୦ହେକ୍ଟର ଜମିରେ ବନ୍ୟାଜଳ ପ୍ରବେଶ କରିଛି ା ବେତନଟୀ ବ୍ଲକର ୧୬ଟି ପଞ୍ଚାୟତ, ଶାମାଖୁଣ୍ଟାର ୪,ରାସଗୋବିନ୍ଦପୁରର ୭, କରଞ୍ଜିଆର ୫, ଶୁକୃଳର ୫, ରରୁଆଁର ୬ ଓ ବହଳଦା ବ୍ଲକର ୫ଟି ପଞ୍ଚାୟତର ଚାଷ ଜମି କ୍ଷତିଗ୍ରସ୍ତ ହୋଇଥିବା ପ୍ରାଥମିକ ଆକଳନ କରାଯାଇଛି ା ତେବେ ରାଜସ୍ବ ଓ କୃଷି ବିଭାଗ ପକ୍ଷରୁ ମିଳିତ ଭାବେ ତଦନ୍ତ କରାଯାଇ ଜିଲାପାଳଙ୍କୁ ରିପୋର୍ଟ ପ୍ରଦାନ କରାଯିବ ବୋଲି କୃଷି ବିଭାଗ ସୂଚନା ଦେଇଛି।
