ଭୁବନେଶ୍ୱର,୧ା୯(ବ୍ୟୁରୋ):ବୁଧବାରଠାରୁ ଓଡ଼ିଶା ବିଧାନସଭାର ମୌସୁମୀ ଅଧିବେଶନ ଆରମ୍ଭ ହେବ। ଏହା ସେପ୍ଟେମ୍ବର ୯ ଯାଏ ଚାଲିବ। ଏହି ଅଧିବେଶନରେ ୮ଟି କାର୍ଯ୍ୟଦିବସ ରହିଛି। ୮ ଦିନରୁ ୭ ଦିନ ସରକାରୀ ଦିବସ ପାଇଁ ସମୟ ନିର୍ଘଣ୍ଟ ହୋଇଥିବା ବେଳେ ଗୋଟିଏ ଦିନ ଅର୍ଥାତ୍ ସେପ୍ଟେମ୍ବର ୩କୁ ବେସରକାରୀ ଦିବସ ପାଇଁ ଦିନ ଧାର୍ଯ୍ୟ ହୋଇଛି। ୫ ତାରିଖ ରବିବାର ପାଇଁ ଛୁଟି ରହିବ।
ଚଳିତଥର ମଧ୍ୟ କୋଭିଡ୍ ଗାଇଡ୍ଲାଇନ ମଧ୍ୟରେ ଗୃହ ପରିଚାଳିତ ହେବ। ବିଧାନସଭାକୁ ଆସୁଥିବା ସମସ୍ତ ଜନପ୍ରତିନିଧି, ସେମାନଙ୍କ ଡ୍ରାଇଭର, ବିଧାନସଭା କର୍ମଚାରୀ, ଗଣମାଧ୍ୟମ ପ୍ରତିନିଧିମାନଙ୍କର କୋଭିଡ୍ ଟେଷ୍ଟ କରାଯାଇଛି। ଦୁଇଟି ସିଟିଂରେ (ସକାଳ ସାଢ଼େ ୧୦ରୁ ମଧ୍ୟାହ୍ନ ସାଢ଼େ ୧ଟା ଏବଂ ଅପରାହ୍ନ ୪ଟାରୁ ସନ୍ଧ୍ୟା ୬ଟା) ଅଧିବେଶନ ଚାଲିବ। ପ୍ରମୁଖ ବିରୋଧୀ ଦଳ ଭାଜପାକୁ ମୁଲତବୀ ପ୍ରସ୍ତାବ ଆଣିବା ଲାଗି ୪ଦିନ ସମୟ ଦିଆଯାଇଥିବା ବେଳେ କଂଗ୍ରେସକୁ ୨ଦିନ ମିଳିଛି। ମରୁଡ଼ି, କୃଷକ ସମସ୍ୟା, ଦୁର୍ନୀତି, ଆଇନଶୃଙ୍ଖଳା, ବେକାରି ସମସ୍ୟା, ମାହାଙ୍ଗା ଡବଲ ମର୍ଡର ଭଳି ଘଟଣାକୁ ନେଇ ଗୃହ ସରଗରମ ହେବ ବୋଲି ସୂଚନା ମିଳିଛି। ଯେଉଁ ସଦସ୍ୟମାନେ ଗୃହକୁ ଆସି ପାରିବେ ନାହିଁ ସେମାନଙ୍କ ସକାଶେ ଭିଡିଓ କନ୍ଫରେନ୍ସିଂର ବ୍ୟବସ୍ଥା କରାଯାଇଛି।
