ଯାହାଙ୍କ ପରିବାର ଦୁଇଭାଗ ହୋଇଛି ତାଙ୍କୁ ପଚାରନ୍ତୁ: ଚିରାଗଙ୍କୁ ତେଜସ୍ବୀଙ୍କ କଟାକ୍ଷ…

ପାଟନା,୨୩।୯ : ଇଣ୍ଡିଆ ମିଳିତ ମେଣ୍ଟରେ ଆସନ ବାଣ୍ଟିବା ନେଇ ଚାଲିଥିବା ଆଲୋଚନା ମଧ୍ୟରେ ବିହାର ଉପମୁଖ୍ୟମନ୍ତ୍ରୀ ତେଜସ୍ବୀ ଯାଦବ ପୁଣି ଥରେ ସମ୍ପୂର୍ଣ୍ଣ ଆଶ୍ୱାସନା ଦେଇ କହିଛନ୍ତି ସିଟ ବାଣ୍ଟିବା ସମସ୍ୟା ନୁହେଁ। ବିହାରରେ ଆମର ଆସନ ଭାଗ ବଣ୍ଟା ସୁରୁଖୁରରେ ହେବ। ବିହାରରେ କୌଣସି ଜିନିଷ କେବେ ଭୁଲ ହୋଇପାରିବ ନାହିଁ।

କିନ୍ତୁ, ଏହା ସହିତ, ବିହାର ସମ୍ବନ୍ଧରେ ଏନଡିଏ ସହଯୋଗୀ ଦଳକୁ କଟାକ୍ଷ କରି କହିଛନ୍ତି ଯେଉଁମାନେ ସେଠାକୁ ଯାଇଛନ୍ତି ସେମାନଙ୍କୁ ପଚାରନ୍ତୁ। କିଭଳି ଏନଡିଏରେ ଗୋଟିଏ ପରିବାର ଦୁଇ ଭାଗରେ ବିଭକ୍ତ ହୋଇଛି, ଦେଖନ୍ତୁ ସେହି ଲୋକମାନଙ୍କର ଅବସ୍ଥା କ’ଣ ହେଉଛି ତାହା ସମସ୍ତେ ଦେଖୁଛନ୍ତି। ଏଭଳି କହି ସେ ଚିରାଗ ପାସଓ୍ବାନଙ୍କ ନାମ ନ ନେଇ ତାଙ୍କୁ ଟାର୍ଗେଟ କରିଛନ୍ତି।

ଏଥି ସହ ସେ ଭାଜପା ଏମପି ରମେଶ ବିଧୁରୀଙ୍କ ଆପତ୍ତିଜନକ ବିବୃତ୍ତିକୁ ଟାର୍ଗେଟ କରି କହିଛନ୍ତି ଏହା କିଛି ନୂଆ କଥା ନୁହେଁ। ଏହି ଲୋକଙ୍କ କାର୍ଯ୍ୟ ଏଭଳି ହିଁ ହୋଇଥାଏ। ଠିକ ୨ ଦିନ ପୂର୍ବରୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି କହିଥିଲେ ତୁମର ଆଚରଣ ତୁମ ବିଷୟରେ କହିଥାଏ। ଏବେ ଦେଖନ୍ତୁ ତାଙ୍କ ଏମପି କିପରି ସମ୍ବିଧାନ ଏବଂ ସଂସଦର ସମ୍ମାନକୁ ଉଲ୍ଲଂଘନ କରିଛନ୍ତି।

ଆମେ ଜାଣୁ ଏହି ଲୋକଙ୍କ ବିରୋଧରେ କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ନାହିଁ। ତେଣୁ ଭାଜପାକୁ ଯାଅ ଏବଂ ତୁମେ ଯାହା ଚାହଁ ତାହା କୁହ, କେହି ଏହାକୁ ଦେଖିବେ ନାହିଁ। ଏହା ହେଉଛି ଭାଜପା ସରକାରଙ୍କ ଏକଛତ୍ରବାଦୀ ଗଣତନ୍ତ୍ର।