ଇସଲାମାବାଦ,୧୨।୬: ପାକିସ୍ତାନର ଆଉ ଏକ ମିଛ ସାମ୍ନାକୁ ଆସିଛି। ପାକିସ୍ତାନ ବିଶ୍ୱରେ ନିଜର ପତିଆରାକୁ ଦେଖାଇବା ଲାଗି ସମସ୍ତ ପ୍ରକାର ଚେଷ୍ଟା କରିଆସିଛି। ଏବେ ସେଭଳି କିଛି ଚେଷ୍ଟାର ପର୍ଦ୍ଦାଫାଶ ହୋଇଛି। ବୁଧବାର ପାକିସ୍ତାନ ସୂଚନା ଦେଇଥିଲା ଯେ ପାକିସ୍ତାନର ସେନା ମୁଖ୍ୟ ଅସୀମ ମୁନିରଙ୍କୁ ଆମେରିକାରେ ୨୫୦ତମ ବିଜୟ ଦିବସ ପରେଡରେ ଯୋଗଦେବାକୁ ନିମନ୍ତ୍ରଣ କରାଯାଇଛି। ହେଲେ ରିପୋର୍ଟ ମୁତାବକ ପାକିସ୍ତାନୀ ଜେନେରାଲ ଅସୀମ ମୁନିରଙ୍କୁ ବିଜୟ ଦିବସ ପରେଡରେ ନିମନ୍ତ୍ରଣ କରାଯାଇ ନାହିଁ। ମୁନିର କେବଳ ଆମେରିକା ଗସ୍ତରେ ଯାଉଛନ୍ତି ଯେଉଁଠାରେ ସେ ତାଙ୍କ ପ୍ରତିପକ୍ଷଙ୍କୁ ଭେଟିବେ ଏବଂ ଏହି ଗସ୍ତ ବିଜୟ ଦିବସ ପରେଡ ପାଇଁ ନୁହେଁ।
ପାକିସ୍ତାନୀ ପ୍ରଚାରରେ ମୁନିରଙ୍କ ଗସ୍ତକୁ ଅଧିକ ଦେଖାଇ ପ୍ରଚାର କରାଯାଉଥିଲା ଯେ ତାଙ୍କୁ ବିଜୟ ଦିବସ ପରେଡ ଲାଗି ନିମନ୍ତ୍ରଣ କରାଯାଇଛି। ଏବେ ସତ ଜଣାପଡ଼ିବା ପରେ ମଧ୍ୟ ଭାରତ ଏବେ ବି ଅସୀମ ମୁନିରଙ୍କ ଏହି ଗସ୍ତ ଉପରେ ନଜର ରଖିବ, କାରଣ ଏହି ଗସ୍ତ ଭାରତ-ପାକିସ୍ତାନ ମଧ୍ୟ ସୃଷ୍ଟି ହୋଇଥିବା ଉତ୍ତେଜନା ପରିସ୍ଥିତିର ଏକ ମାସ ପରେ ହେଉଛି।
ଯୁକ୍ତରାଷ୍ଟ୍ର କେନ୍ଦ୍ରୀୟ କମାଣ୍ଡ (ସେଣ୍ଟକମ)ର କମାଣ୍ଡର ଜେନେରାଲ ମାଇକେଲ କୁରିଲା ପାକିସ୍ତାନ ବିଷୟରେ କହିଛନ୍ତି, “ସେମାନେ ବର୍ତ୍ତମାନ ଆତଙ୍କବାଦ ବିରୋଧରେ ଲଢ଼େଇରେ ସକ୍ରିୟ ଅଛନ୍ତି ଏବଂ ଆତଙ୍କବାଦ ବିରୋଧୀ ବିଶ୍ୱରେ ଏକ ଅଭୂତପୂର୍ବ ସହଯୋଗୀ ହୋଇଛନ୍ତି।” ସେ ପାକିସ୍ତାନ-ଆଫଗାନିସ୍ତାନ ସୀମାରେ ISIS-K ଆତଙ୍କବାଦୀଙ୍କୁ ପିଛା କରିବା ପାଇଁ ପାକିସ୍ତାନୀ ସେନାକୁ ମଧ୍ୟ ପ୍ରଶଂସା କରଛନ୍ତି।
ସୂଚନାଯୋଗ୍ୟ, ଭାରତ ମେ ୭ ତାରିଖରେ ଅପରେସନ ସିନ୍ଦୂର ଆରମ୍ଭ କରିବା ପରେ, ଭାରତ ଏବଂ ପାକିସ୍ତାନ ମଧ୍ୟରେ ଉତ୍ତେଜନା ଶୀର୍ଷରେ ପହଞ୍ଚିଥିଲା। ପହଲଗାମ ଆକ୍ରମଣରେ ମୃତ୍ୟୁବରଣ କରିଥିବା ୨୬ ନାଗରିକଙ୍କ ପ୍ରତିଶୋଧ ନେବା ପାଇଁ, ଭାରତୀୟ ସେନା ପାକିସ୍ତାନରେ ଥିବା ଆତଙ୍କବାଦୀ ଆଡ୍ଡା ଉପରେ ଆକ୍ରମଣ କରି ଧ୍ୱଂସ କରିଥିଲା, ଏହି ଆକ୍ରମଣରେ ପ୍ରାୟ ୧୦୦ ଆତଙ୍କବାଦୀ ନିହତ ହୋଇଥିବା ଦାବି କରାଯାଇଛି। ଏହା ପରେ ପାକିସ୍ତାନ ଭାରତ ଉପରେ ଆକ୍ରମଣ କରିଥିଲା, ଯାହାର ପ୍ରତିଶୋଧ ଭାରତୀୟ ସେନା ନେଇଥିଲା।
ଚାରି ଦିନ ଧରି ଚାଲିଥିବା ଏହି ଉତ୍ତେଜନା ପରେ, ଟ୍ରମ୍ପ ଘୋଷଣା କରିଥିଲେ ଯେ ଦୁଇ ଦେଶ ମଧ୍ୟରେ ଯୁଦ୍ଧବିରତି କରାଯାଇଛି। ଏହା ପରେ, ସେ ଅନେକ ମଞ୍ଚରେ ଏହାର ଶ୍ରେୟ ନେଇଥିଲେ ଏବଂ କହିଥିଲେ ଯେ ଆମେ ଭାରତ ଏବଂ ପାକିସ୍ତାନ ମଧ୍ୟରେ ଯୁଦ୍ଧ ସମାପ୍ତ କରିଛୁ।
