ବେଙ୍ଗାଲୁରୁ,୨୦ା୮: ଆସନ୍ତା ଏସିଆ କପ୍ ହକି ୨୦୨୫ ପାଇଁ ହରମନପ୍ରୀତ ସିଂହଙ୍କ ନେତୃତ୍ୱରେ ୧୮ ଜଣିଆ ଭାରତୀୟ ପୁରୁଷ ହକି ଦଳ ଘୋଷଣା କରାଯାଇଛି। ଏହି ଦଳରେ ଓଡ଼ିଶାର ତିନି ଖେଳାଳି ଅମିତ ରୋହିଦାସ, ଶିଳାନନ୍ଦ ଲାକ୍ରା ଓ ନୀଲମ ସଞ୍ଜୀପ ଖେସ୍ ସ୍ଥାନ ପାଇଛନ୍ତି। ଟୁର୍ଣ୍ଣାମେଣ୍ଟଟି ବିହାରର ରାଜଗିର୍ ହକି ଷ୍ଟାଡିୟମରେ ଅଗଷ୍ଟ ୨୯ରୁ ସେପ୍ଟେମ୍ବର ୭ ତାରିଖ ମଧ୍ୟରେ ଖେଳାଯିବ।
ହକି ଇଣ୍ଡିଆ ବୁଧବାର ଏହି ଦଳ ଘୋଷଣା କରିଛି। ଏହି ଟୁର୍ଣ୍ଣାମେଣ୍ଟ ଆଗାମୀ ବର୍ଷ ବେଲଜିୟମ ଓ ନେଦରଲ୍ୟାଣ୍ଡସରେ ହେବାକୁ ଥିବା ହକି ବିଶ୍ୱକପ ପାଇଁ ଏକ ଯୋଗ୍ୟତା ପର୍ଯ୍ୟାୟ ମଧ୍ୟ ଅଟେ। ଭାରତ ପୁଲ୍ ଏ’ରେ ଜାପାନ, ଚାଇନା ଓ କାଜାଖସ୍ତାନ ସହ ରହିଛି। ପୁଲ୍ ବି’ରେ ବର୍ତ୍ତମାନର ଚାମ୍ପିଅନ ଦକ୍ଷିଣ କୋରିଆ, ମାଲେସିଆ, ବାଂଲାଦେଶ ଓ ଚାଇନିଜ ତାଇପେଇ ଅଛନ୍ତି। ପାକିସ୍ତାନ ଓ ଓମାନ ଟୁର୍ଣ୍ଣାମେଣ୍ଟରୁ ନାମ ପ୍ରତ୍ୟାହାର କରିବାରୁ ବାଂଲାଦେଶ ଓ କାଜାଖସ୍ତାନ ସେମାନଙ୍କ ସ୍ଥାନ ନେଇଛନ୍ତି।
ଭାରତ ଅଗଷ୍ଟ ୨୯ରେ ଚାଇନା, ୩୧ରେ ଜାପାନ ଓ ସେପ୍ଟେମ୍ବର ୧ରେ କାଜାଖସ୍ତାନ ବିପକ୍ଷରେ ଖେଳିବ। ଦଳରେ ଅଭିଜ୍ଞ ଖେଳାଳିଙ୍କ ସହ ସନ୍ତୁଳନ ରହିଛି। ଗୋଲକିପିଂ ଦାୟିତ୍ୱ କ୍ରିଶନ ପାଠକ ଓ ସୁରଜ କର୍କେରା ସମ୍ଭାଳିବେ। ଡିଫେନ୍ସରେ ହରମନପ୍ରୀତ ଓ ଅମିତ ରୋହିଦାସଙ୍କ ସହ ଜରମନପ୍ରୀତ ସିଂହ, ସୁମିତ, ସଞ୍ଜୟ ଓ ଜୁଗରାଜ ସିଂହ ରହିଛନ୍ତି। ମିଡଫିଲ୍ଡରେ ରାଜିନ୍ଦର ସିଂହ, ରାଜ କୁମାର ପାଲ, ହାର୍ଦ୍ଦିକ ସିଂହ, ମନପ୍ରୀତ ସିଂହ ଓ ବିବେକ ସାଗର ପ୍ରସାଦ ଏବଂ ଫରୱାର୍ଡରେ ମନଦୀପ ସିଂହ, ଶିଳାନନ୍ଦ ଲାକ୍ରା, ଅଭିଷେକ, ସୁଖଜୀତ ସିଂହ ଓ ଦିଲପ୍ରୀତ ସିଂହ ସାମିଲ ହୋଇଛନ୍ତି। ନୀଲମ ସଞ୍ଜୀପ ଖେସ୍ ଓ ସେଲଭମ କାର୍ତ୍ତି ରିଜର୍ଭ ଖେଳାଳି ଭାବେ ରହିଛନ୍ତି।
ମୁଖ୍ୟ କୋଚ କ୍ରେଗ ଫୁଲଟନ କହିଛନ୍ତି, “ଆମେ ଏକ ଅଭିଜ୍ଞ ଦଳ ନେଇଛୁ, ଯେଉଁମାନେ ଉଚ୍ଚ-ଚାପ ପରିସ୍ଥିତିରେ ପ୍ରଦର୍ଶନ କରିବାକୁ ଜାଣନ୍ତି। ବିଶ୍ୱକପ ଯୋଗ୍ୟତା ପାଇଁ ଏସିଆ କପ୍ ଗୁରୁତ୍ୱପୂର୍ଣ୍ଣ, ତେଣୁ ଆମେ ସମନ୍ୱିତ ଓ ଦୃଢ଼ ଖେଳାଳି ଚୟନ କରିଛୁ।”
