ନୂଆଦିଲ୍ଲୀ,୫।୨: ରାଜ୍ୟସଭାରେ ରେଳମନ୍ତ୍ରୀ ଅଶ୍ବିନୀ ବୈଷ୍ଣବଙ୍କୁ ଟାର୍ଗେଟ କରି ଗର୍ଜିଛନ୍ତି ଏମପି ମୁନ୍ନା ଖାଁ। ନବରଙ୍ଗପୁର ଏବଂ ମାଲକାନଗିରି ଜିଲାକୁ ରେଳପଥ ସଂଯୋଗ ପାଇଁ କେନ୍ଦ୍ର ସରକାରଙ୍କ ନିକଟରେ ସେ ଦୃଢ଼ ଦାବି ଉପସ୍ଥାପନ ରଖିଛନ୍ତି।
ଏମପି ମୁନ୍ନା ଖାଁ କହିଛନ୍ତି ”୨୦୧୬ ମସିହାରେ ଓଡ଼ିଶା ସରକାର ଏବଂ ତତ୍କାଳୀନ ରେଳ ମନ୍ତ୍ରୀ ସୁରେଶ ପ୍ରଭୁଙ୍କ ମଧ୍ୟରେ ଏକ ବୁଝାମଣାପତ୍ର (MoU) ସ୍ୱାକ୍ଷରିତ ହୋଇଥିଲା। ରାଜ୍ୟ ସରକାର ଜମି ଅଧିଗ୍ରହଣର ସମସ୍ତ ଖର୍ଚ୍ଚ ସହ ଜୟପୁର-ନବରଙ୍ଗପୁର ଲାଇନ ପାଇଁ ୫୦% ଏବଂ ଜୟପୁର-ମାଲକାନଗିରି ଲାଇନ ପାଇଁ ୨୫% ନିର୍ମାଣ ଖର୍ଚ୍ଚ ବହନ କରିବାକୁ ରାଜି ହୋଇଥିଲେ।’
ତେବେ ଦୀର୍ଘ ଏକ ଦଶନ୍ଧି ବିତିଯାଇଥିଲେ ମଧ୍ୟ ମାତ୍ର ୪୦ କିଲୋମିଟରର ଏହି ରେଳ ଲାଇନ କାମ ଶେଷ ହୋଇପାରି ନାହିଁ। ବିଜେଡି ସମର୍ଥନରେ ରାଜ୍ୟସଭାକୁ ଯାଇଥିବା ବର୍ତ୍ତମାନର ରେଳ ମନ୍ତ୍ରୀ ଅଶ୍ୱିନୀ ବୈଷ୍ଣବ ଏଥିପ୍ରତି ଦୃଷ୍ଟି ନଦେବା ଦୁର୍ଭାଗ୍ୟଜନକ ବୋଲି ସେ କହିଛନ୍ତି। ରାଜ୍ୟରେ ଏବେ ଡବଲ ଇଞ୍ଜିନ ସରକାର ଥାଇ ମଧ୍ୟ ପ୍ରତିଶୃତି ମୁତାବକ ଭିତ୍ତିଭୂମି ବିକାଶ ହେଉନଥିବା ନେଇ ସେ ପ୍ରଶ୍ନ ଉଠାଇଛନ୍ତି।
ଶେଷରେ ମୁନ୍ନା ଖାଁ ଚେତାବନୀ ଦେଇ କହିଛନ୍ତି ଯେ, ଯଦି ଏହି ରେଳ ପ୍ରକଳ୍ପ କାମ ଶୀଘ୍ର ସମ୍ପୂର୍ଣ୍ଣ ନହୁଏ, ତେବେ ଆଗାମୀ ଦିନରେ ରେଳ ମନ୍ତ୍ରୀ ଓଡ଼ିଶା ଗସ୍ତ ସମୟରେ ତୀବ୍ର ବିରୋଧର ସମ୍ମୁଖୀନ ହୋଇପାରନ୍ତି। ଆଦିବାସୀ ଅଞ୍ଚଳର ବିକାଶ ପାଇଁ କେନ୍ଦ୍ର ସରକାର ନିଜର ପ୍ରତିଶୃତି ପାଳନ କରନ୍ତୁ ବୋଲି ସେ ଦାବି କରିଛନ୍ତି।
