ରାୟଗଡ଼ା,୧୪।୭(କୈଳାଶ ଚନ୍ଦ୍ର ପୃଷ୍ଟି): ରାୟଗଡ଼ା ଜିଲାରେ ମ୍ୟାଲେରିଆ ଆକ୍ରାନ୍ତଙ୍କ ସଂଖ୍ୟା ବୃଦ୍ଧି ପାଇବାରେ ଲାଗିଛି। ବିଶେଷକରି ଅନୁସୂଚିତ ଜାତି ଓ ଜନଜାତି ବିଭାଗ ଦ୍ୱାରା ପରିଚାଳିତ ଆଶ୍ରମ ବିଦ୍ୟାଳୟରେ ମ୍ୟାଲେରିଆ ବ୍ୟାପିବାରେ ଲାଗିଛି। ମ୍ୟାଲେରିଆରେ ଆକ୍ରାନ୍ତ ହୋଇ ରାୟଗଡ଼ା ବ୍ଲକ୍ ଅତଡାସ୍ଥିତ ଏସ୍ଏସ୍ଡି ସରକାରୀ ଉଚ୍ଚ ବିଦ୍ୟାଳୟର ଜଣେ ୪ର୍ଥ ଶ୍ରେଣୀ ଛାତ୍ରଙ୍କ ମୃତ୍ୟୁ ଘଟିଛି। ମୃତ ଛାତ୍ର ହେଲେ କାରୁବାଇ ପଞ୍ଚାୟତ ଅନ୍ତର୍ଗତ ବଡକାଶିପାଡୁ ଗ୍ରାମର ଜୋହନ କଣ୍ଡାଗରୀଙ୍କ ପୁଅ ଜୟସେନ କଣ୍ଡାଗରି(୯)।
ଅନ୍ୟପକ୍ଷେ ସପ୍ତାହକ ମଧ୍ୟରେ ମ୍ୟାଲେରିଆରେ ୨ ଛାତ୍ରଙ୍କ ମୃତ୍ୟୁ ଘଟଣା ପ୍ରଶାସନର ଚିନ୍ତାକୁ ଦ୍ବିଗୁଣିତ କରିଛି। ଗତ ୭ ତାରିଖରେ କୋଲନରା ବ୍ଲକ୍ ସୁରି ଉଚ୍ଚ ପ୍ରାଥମିକ ବିଦ୍ୟାଳୟର ଚତୁର୍ଥ ଶ୍ରେଣୀ ଛାତ୍ର ଚନ୍ଦୁ ଉଲ୍ଲାକାଙ୍କ ମ୍ୟାଲେରିଆରେ ମୃତ୍ୟୁ ହୋଇଥିଲା।
ସୂଚନା ଅନୁଯାୟୀ, ଜୟସେନ ଅତଡାସ୍ଥିତ ଉଚ୍ଚ ବିଦ୍ୟାଳୟ ହଷ୍ଟେଲରେ ରହି ପାଠ ପଢୁଥିଲେ। ଗାଁରେ ଖରା ଛୁଟି କଟାଇ ଗତ ମାସ ୨୯ ତାରିଖରେ ଜୟସେନ ବିଦ୍ୟାଳୟକୁ ଆସିଥିଲେ। ହଷ୍ଟଲରେ ରହୁଥିବା ବେଳେ ଗତ ୫ ତାରିଖରେ ତାଙ୍କୁ ଜ୍ୱର ହୋଇଥିଲା। ହଷ୍ଟଲ ମେଟ୍ରୋନ ଏବଂ ସ୍କୁଲ କର୍ତ୍ତୃପକ୍ଷ ଜୟସେନଙ୍କୁ ଜେମାଦେଇପେଣ୍ଠ ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ରକୁ ଚିକିତ୍ସା ପାଇଁ ନେଇଥିଲେ l ଜ୍ୱର ନ କମିବାରୁ ପରିବାର ଲୋକେ ଗତ ୭ ତାରିଖରେ ରାୟଗଡା ଜିଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରିଥିଲେ। ଜୟସେନଙ୍କ ଅବସ୍ଥା ସଂକଟାପନ୍ନ ହେବାରୁ ତାଙ୍କୁ ବ୍ରହ୍ମପୁରସ୍ଥିତ ଏମ୍କେସିଜି ସ୍ବାସ୍ଥ୍ୟକେନ୍ଦ୍ରକୁ ସ୍ଥାନନ୍ତର କରାଯାଇଥିଲାl ଏମ୍କେସିଜିରେ ଚିକିତ୍ସିତ ଅବସ୍ଥାରେ ମଙ୍ଗଳବାର ସକାଳେ ଜୟସେନଙ୍କ ମୃତ୍ୟୁ ଘଟିଛି l ପୋଲିସ ଏବଂ ମଙ୍ଗଳ ବିଭାଗ କର୍ତ୍ତୃପକ୍ଷ ଘଟଣାର ତଦନ୍ତ କରୁଥିବା ଜଣାପଡ଼ିଛି।
