ଭଞ୍ଜନଗର,୧୨ା୨(ବାବୁଲା ପ୍ରଧାନ)-ଗଞ୍ଜାମ ଜିଲା ଭଞ୍ଜନଗର ବ୍ଲକ ବଡ଼କୋଦଣ୍ଡାର ଆଶିଷ ସାହୁ ଭୁବନେଶ୍ୱରରେ ଏକ ଘରୋଇ ଶିକ୍ଷାନୁଷ୍ଠାନରେ ଡିଏମ୍ଏଲ୍ଟି ପଢ଼ୁଥିଲେ । ବାପା ତ୍ରିପତି ସାହୁ ଶ୍ରମିକ କାମ କରୁଥିଲେ। ତେଣୁ ପରିବାର ଚଳିବା କଷ୍ଟକର ହେଉଥିଲା। ମଝିରେ ମଝିରେ ଆଶିଷ ପାର୍ଟ ଟାଇମ କାମ ଭାବେ ଏକ ବିବାହ ମଣ୍ଡପରେ କ୍ୟାଟରିଂ ବୟ କାମ କରୁଥିଲେ। ଗତ ୪ ତାରିଖରେ କ୍ୟାଟରିଂ କାମ ସାରି ସାଙ୍ଗ ତଥା ଯାଜପୁର ମଙ୍ଗଳପୁର ଅଞ୍ଚଳର ଜଣେ ଯୁବକଙ୍କ ସହ ବାଇକ୍ରେ ଭୁବନେଶ୍ୱର ଭଡ଼ା ଘରକୁ ଫେରିବା ବେଳେ ପୁରୀ ବାଇପାସ ରାସ୍ତା ରେବତୀ ନଗର ନିକଟରେ ଏକ କାର୍ ସେମାନଙ୍କୁ ଧକ୍କା ଦେଇଥିଲା। ଘଟଣାସ୍ଥଳରେ ସାଙ୍ଗର ମୃତ୍ୟୁ ଘଟିଥିବା ବେଳେ ଆଶିଷ ଗୁରୁତର ଅବସ୍ଥାରେ ଏକ ଘରୋଇ ଡାକ୍ତରଖାନାରେ ଭର୍ତ୍ତି ହୋଇଥିଲେ। ପରେ ଆଶିଷଙ୍କୁ ଏସ୍ସିବି ମେଡ଼ିକାଲ କଲେଜ, କଟକ ସ୍ଥାନାନ୍ତର କରାଯାଇଥିଲା। ସେଠାରେ ସ୍ବାସ୍ଥ୍ୟରେ ଉନ୍ନତି ହୋଇ ନ ଥିଲା। ଡାକ୍ତର ୭ ତାରିଖରେ ତାଙ୍କୁ ବ୍ରେନ ଡେଡ ଘୋଷଣା କରିଥିଲେ। ଏହାପରେ ସେଠାରେ ରହୁଥିବା ତାଙ୍କର ଜଣେ ସମ୍ପର୍କୀୟ ଭଉଣୀ ଅଙ୍ଗଦାନ କରିବା ପାଇଁ ଆଶିଷଙ୍କ ପରିବାର ଲୋକଙ୍କୁ ବୁଝାଇଥିଲେ। ଏହାପରେ ପରିବାର ଲୋକ ଇଚ୍ଛା ପ୍ରକାଶ କରିବା ପରେ ଗତ ୧୦ ତାରିଖରେ ଆଶିଷଙ୍କ ଲିଭର୍(ଯକୃତ) ଓ କିଡନୀ(ବୃକକ୍) ୩ ଜଣଙ୍କୁ ପ୍ରଦାନ କରାଯାଇଥିଲା। ଫଳରେ ଉକ୍ତ ୩ ଜଣ ନୂଆ ଜୀବନ ପାଇଛନ୍ତି। ଏହାପରେ ପୁରୀ ରେ ଗାର୍ଡ ଅଫ ଅନର ସହ ଆଶିଷଙ୍କ ଅନ୍ତିମ ସତ୍କାର କରାଯାଇଛି। ପରିବାର ଲୋକଙ୍କ ଏହିଭଳି ମହତ ନିଷ୍ପତ୍ତି ଖବର ଭଞ୍ଜନଗରରେ ପହଞ୍ଚିବା ପରେ ବିଭିନ୍ନ ମହଲରେ ପ୍ରଶଂସା କରାଯାଇଛି ।
