ଚିତ୍ରକୋଣ୍ଡା.୧।୧୨(ଡି.ଏନ୍.ଏ.): ମାଲକାନଗିରି ଜିଲା ପ୍ରଶାସନ ଉଦ୍ୟମରେ ଚିତ୍ରକୋଣ୍ଡା ସ୍ବାଭିମାନ ଅଞ୍ଚଳର ୯ଟି ପଞ୍ଚାୟତ ଯଥା ବଡପଡା, ପାପରମେଟେଲା, ରାଲେଗ, ଧୂଳିପୁଟ, ଯୋଡ଼ାମ୍ବ, ପଣଷପୁଟ, ଅଣ୍ଡିରାପାଲି, ଯନ୍ତ୍ରୀ ଏବଂ ଗାଜୁଲୁମାମୁଡି ପଞ୍ଚାୟତର ଆଶାକର୍ମୀ ଦମନ ଚଳଚିତ୍ର ଦେଖିଛନ୍ତି। କିଛି ବର୍ଷ ତଳେ ମାଲକାନଗିରି ଜିଲା ମ୍ୟାଲେରିଆ ପ୍ରବଣ ଅଞ୍ଚଳ ଭାବେ ଗଣାଯାଉଥିଲା। ମ୍ୟାଲେରିଆ ନିରାକରଣ ନିମନ୍ତେ ଜିଲା ସ୍ବାସ୍ଥ୍ୟ ବିଭାଗ ପକ୍ଷରୁ ଆରମ୍ଭ କରାଯାଇଥିଲା କାର୍ଯ୍ୟକ୍ରମ ଦମନ। ଦମନକୁ ଆଖି ଆଗରେ ରଖି ଚିତ୍ରକୋଣ୍ଡାର ବିଚ୍ଛିନ୍ନାଞ୍ଚଳର ବିଭିନ୍ନ ସ୍ଥାନ, କାର୍ଯ୍ୟକ୍ରମରେ ସାମିଲ ହୋଇଥିବା ସ୍ବାସ୍ଥ୍ୟକର୍ମଚାରୀଙ୍କ ସହ ଧୂଳିପୁଟ, ଘୋଡ଼ା ଏବଂ ଯାନବାଇ ହସ୍ପିଟାଲରେ ଦମନ ଚଳଚ୍ଚିତ୍ରର ସୁଟିଂ କରାଯାଇଥିଲା।
ଚଳଚ୍ଚିତ୍ର ରିଲିଜ ହେବାପରେ ବର୍ତ୍ତମାନ ଓଡ଼ିଶା ସମେତ ବାହାର ରାଜ୍ୟରେ ଏହାର ଲୋକପ୍ରିୟତା ବଢିବାରେ ଲାଗିଛି। ଅନ୍ୟପକ୍ଷେ ଚଳଚ୍ଚିତ୍ର ଦମନ ଶିକ୍ଷଣୀୟ ଏବଂ ଉପାଦେୟ ହୋଇଥିବାରୁ ସରକାର ମଧ୍ୟ ଦେୟମୁକ୍ତ ଘୋଷଣା କରିଥିଲେ। ଏହି ପରିପ୍ରେକ୍ଷୀରେ ମାଲକାନଗିରି ଜିଲା ପ୍ରଶାସନ, ଜିଲା ସ୍ବାସ୍ଥ୍ୟ ବିଭାଗ ପକ୍ଷରୁ ସେଦିନର ବିଚ୍ଛିନ୍ନାଞ୍ଚଳ ଏବଂ ଆଜିର ସ୍ବାଭିମାନ ଅଞ୍ଚଳର ଆଶା କର୍ମଚାରୀମାନଙ୍କୁ ଗୁରୁବାର ଦମନ ଚଳଚିତ୍ର ଦେଖାଯାଇଥିଲା। ସକାଳୁ ସ୍ବାଭିମାନ ଅଞ୍ଚଳରୁ ବିଜୁ ସ୍ବାସ୍ଥ୍ୟଗାଡ଼ିରେ ଆଶାକର୍ମୀଙ୍କୁ ମାଲକାନଗିରିକୁ ନିଆଯାଇଥିଲା। ସେଠାରେ ଥିବା ସିନେମା ହଲରେ ଆଶାକର୍ମୀ ଦମନ ଚଳଚ୍ଚିତ୍ର ଦେଖିଥିଲେ। l ଆଶାଙ୍କ ସହ ମାଲକାନଗିରି ଜିଲା ସ୍ବାସ୍ଥ୍ୟ ଅଧିକାରୀ ମଧ୍ୟ ଫିଲ୍ମିଂ ଦେଖିଥିଲେ। ଅଞ୍ଚଳର ମ୍ୟାଲେରିଆ ନିରାକରଣକୁ ଚଳଚ୍ଚିତ୍ରରେ ସ୍ଥାନିତ କରାଯାଇଥିବାରୁ ଆଶାକର୍ମୀ ଆନନ୍ଦିତ ହୋଇଥିଲେ l ଜିଲା ସ୍ବାସ୍ଥ୍ୟ ବିଭାଗର ଏଭଳି ପଦକ୍ଷେପକୁ ସ୍ବାଭିିମାନ ଅଞ୍ଚଳବାସୀ ଧନ୍ୟବାଦ ଜଣାଇଛନ୍ତି।
