ନୟାଗଡ଼,୧୧।୧(ଲୋକନାଥ ମିଶ୍ର)ନୟାଗଡ଼ ପୁରୁଣା ସହରର ପ୍ରତ୍ୟକ୍ଷ ଦେବୀ ମା’ଦକ୍ଷିଣକାଳୀଙ୍କ ମନ୍ଦିର ନିର୍ମାଣ କାର୍ଯ୍ୟ ଆରମ୍ଭ ହୋଇଛି। ମନ୍ଦିର ନିର୍ମାଣ ପାଇଁ ନିଅଁରେ ପାଉଁଶ ଇଟା ବ୍ୟବହାର କରାଯାଉଥିବାରୁ ସ୍ଥାୟିତ୍ୱ ନେଇ ପ୍ରଶ୍ନ ଉଠିଛି । ନିଅଁ ଖୋଳାରୁ ମନ୍ଦିରର ନିର୍ମାଣ କାର୍ଯ୍ୟ ନିମ୍ନମାନର ହେଉଥିବା ଅଭିଯୋଗ ଉଠିବା ପରେ ସାଧାରଣରେ ଅସନ୍ତୋଷ ପ୍ରକାଶ ପାଇଛି । ମନ୍ଦିର ନିର୍ମାଣ ପାଇଁ ୩ କୋଟି ୫୦ ଲକ୍ଷ ମଞ୍ଜୁର ହୋଇଛି ।
ମା’ଙ୍କ କାମ ପାଇଁ ଅର୍ଥର ଅଭାବ ନ ଥିବାବେଳେ କାମ ଠିକ ନ ହେବା ନେଇ ଧିରେ ଧିରେ ପ୍ରତିବାଦ ଉଠୁଛି ।
ଏନେଇ ଭକ୍ତ ଭବାନୀ ଦାଶ କୁହନ୍ତି, ନିଅଁରେ ବଉଳମାଳା ପଥର କିମ୍ବା କଳାମୁଗୁନି ପଥର ବ୍ୟବହାର କରାଯିବା ଦରକାର। ପାଉଁଶ ଇଟା ବ୍ୟବହାର କରିବା ଠିକ୍ ନୁହେଁ । ମା’ପ୍ରତ୍ୟକ୍ଷ ଠାକୁରାଣୀ। ମା’ଙ୍କ କାର୍ଯ୍ୟରେ ଅବହେଳା ହେଲେ ମା’ସେମାନଙ୍କ କଥା ବୁଝିବେ। ମନ୍ଦିର ପରି ଏକ ଧାର୍ମିକ ଅନୁଷ୍ଠାନରେ କାମର ମାନ ଉପରେ କେହି ପ୍ରଶ୍ନ ଯେପରି ନ କରିବେ ସେନେଇ କାମ କରିବା ଦରକାର। କାମ ଆରମ୍ଭରୁ ନିମ୍ନମାନର କାମ ହେଉଥିବାର ଅନୁଭବ ହେଲାଣି। ଭକ୍ତ ସ୍ବରୂପ ପଟ୍ଟନାୟକ କୁହନ୍ତି, ଦକ୍ଷିଣ କାଳୀ ଠାକୁରାଣୀଙ୍କ ମନ୍ଦିର ଭଲ କାମ ହେବା ଦରକାର । ତେବେ କାମର ପ୍ରାରମ୍ଭରୁ ନିଅଁରେ ପାଉଁଶ ଇଟା ବ୍ୟବହାର ଦେଖି ଭକ୍ତ ଅସନ୍ତୋଷ ବ୍ୟକ୍ତ କଲେଣି ।
ପାଉଁଶ ଇଟା ହଟାଇ କଳା ମୁଗୁନି ଅଥବା ବଉଳା ମାଳା ପଥର ବ୍ୟବହାର କରାଯାଉ । ନଚେତ ଖୁବ୍ଶୀଘ୍ର ଆନ୍ଦୋଳନ ହୋଇପାରେ । ଭକ୍ତ ମନସ୍ବିନୀ ମିଶ୍ର କୁହନ୍ତି, ଦକ୍ଷିଣକାଳୀ ମନ୍ଦିର ଏକ ପର୍ଯ୍ୟଟନ ପୀଠ ।
ପୁଣି ପ୍ରସିଦ୍ଧ ଠାକୁରାଣୀ । ମା’ଙ୍କ ମନ୍ଦିର କାମ ନିମ୍ନମାନର କଲେ ମା ଦକ୍ଷିଣ କାଳୀ ଅସନ୍ତୋଷ ବ୍ୟକ୍ତ କରିବେ । ନିର୍ମାଣକାରୀ ହଇରାଣ ହେବେ । ମା’ଙ୍କ କାର୍ଯ୍ୟ ଠିକ୍ ଭାବେ କରାଯିବା ଦରକାର । ଜଣେ ମହିଳା ଭକ୍ତ ନିଜ ନାମ ଗୋପନ ରଖି କହିଛନ୍ତି ମା’ଦକ୍ଷିଣକାଳୀଙ୍କର ଗର୍ଭଗୃହ ଭଙ୍ଗାଯିବାର ନ ଥିଲା । ମନ୍ଦିର ଉନ୍ନୟନକୁ ବିରୋଧ ନାହିଁ । ତେବେ ଗଞ୍ଜାମର ତାରାତାରିଣୀ ଢ଼ାଞ୍ଚାରେ କରାଯାଇଥିଲେ ଭଲ ହୋଇଥାନ୍ତା । ଗର୍ଭଗୃହ ଭଙ୍ଗାଯିବାରୁ ମା’ଙ୍କ ଉପରେ ଖରା ପଡୁଛି । ଯାହା ଠିକ୍ ନୁହେଁ । ପ୍ରତ୍ୟକ୍ଷ ଦେବୀ ହେଉଛନ୍ତି ମା’ଦକ୍ଷିଣକାଳୀ । ଏଭଳିସ୍ଥଳେ ପାଉଁଶ ଇଟାରେ ମନ୍ଦିରର ଭିତିପ୍ରସ୍ତର କାର୍ଯ୍ୟ କରାଯିବା ଠିକ ନୁହେଁ । ମନ୍ଦିର କାର୍ଯ୍ୟ ନେଇ ନୟାଗଡ଼ ପୁରୁଣା ସହରରେ ଅସନ୍ତୋଷ ପ୍ରକାଶ ପାଇଲାଣି । ମୁହଁରେ କେହି କହିବାକୁ ଚାହୁଁ ନାହାନ୍ତି । ତେବେ ମନ୍ଦିକର କାର୍ଯ୍ୟ ଦେଖି କେତେଜଣ ଲୋକ ବିରୋଧ କରୁଛନ୍ତି । ଏଣୁ ତୁରନ୍ତ ପାଉଁଶ ଇଟା ବନ୍ଦ କରି କଳାମୁଗୁନି ପଥର ଅଥବା ବଉଳମାଳା ପଥରେ କାମ କରାଯାଉ ବୋଲି କହିଛନ୍ତି । ଦକ୍ଷିଣକାଳୀ ମନ୍ଦିରର ସଭାପତି କୁସୁନୁ ଦାସ କୁହନ୍ତି, ନିଅଁ ଭିତରେ ଦେଢ଼ ଫୁଟର ବିମ୍ ରହିବ ।
ପାଉଁଶ ଇଟା ଦେଲେ କିଛି ଅସୁବିଧା ହେବନି। ମନ୍ଦିରର ପ୍ରେସର ବିମରେ ରହିବ। ମନ୍ଦିର ବଉଳମାଳା ପଥରେ ହେବ। ନିଅଁ ଭିତରେ ପାଉଁଶ ଇଟା ବ୍ୟବହାର କରିବା ଦ୍ୱାରା କାମ ନିମ୍ନମାନର କହିବା ଠିକ୍ ନୁହେଁ ବୋଲି କହିଛନ୍ତି ।
