ଜମନକିରା,୨୮ା୬ (ରବୀନ୍ଦ୍ର ପ୍ରସାଦ ଦାନି): ବଙ୍ଗୋପସାଗରରେ ସୃଷ୍ଟି ହୋଇଥିବା ଲଘୁଚାପ ଏବଂ ମୌସୁମୀ ଜନିତ ବର୍ଷା ଯୋଗୁ ବିଭିନ୍ନ ସ୍ଥାନରେ ପ୍ରବଳ ବର୍ଷା ସାଙ୍ଗକୁ ଝଡତୋଫାନ ଦେଖିବାକୁ ମିଳିଛି। ଏଥିଯୋଗୁ ଅନେକ ସ୍ଥାନରେ କ୍ଷୟକ୍ଷତି ଘଟିଛି। ଜମନକିରା ବ୍ଲକ କେନାଢିପା ପଞ୍ଚାୟତ ସଦର ମହକୁମାର ଲେଲିନ ରଣାଙ୍କର ଦୁଇ ବଖରା ଘରର ଆଜବେଷ୍ଟସ୍ ଉଡିଯାଇଛି। ଫଳରେ ତାଙ୍କ ପରିବାର ରହିବା ପାଇଁ ହନ୍ତସନ୍ତ ହେଉଛନ୍ତି। ସେହିପରି ବେଲୁଆମାଲ ଗ୍ରାମର ହୃଷୀକେଶ ଦେହୁରିଙ୍କ ଘର ଛପର ଉଡିଯାଇଛି। ବର୍ଷା ପାଣି ମାଡ଼ରେ ତାଙ୍କର ଗୋଟିଏ ବଖରା ଘର ଭୁଷୁଡି ପଡିଛି। ଏ ନେଇ ସେ ସ୍ଥାନୀୟ ସରପଞ୍ଚଙ୍କୁ ଅଭିଯୋଗ କରିବାରୁ ସରପଞ୍ଚ ଫାଶୀମାଲ ରାଜସ୍ବ ନିରୀକ୍ଷକଙ୍କୁ ଜଣାଇ ତଦନ୍ତ କରିଛନ୍ତି। ତେବେ ଘର ଭାଙ୍ଗିଥିବା ଲୋକଙ୍କୁ ଶୀଘ୍ର ଘର ପ୍ରଦାନ କରିବାକୁ ଗ୍ରାମବାସୀ ଦାବି କରିଛନ୍ତି।
