ନୂଆଦିଲ୍ଲୀ,୨୭।୮: ଅମେରିକା ଭାରତୀୟ ସାମଗ୍ରୀ ରପ୍ତାନି ଉପରେ ୫୦% ଟାରିଫ୍ ଲଗାଇଛି, ଯାହା ଇତିହାସରେ ଅତ୍ୟନ୍ତ କଠୋର ବାଣିଜ୍ୟ ଦଣ୍ଡ। ବୁଧବାର ସକାଳ ୯:୩୧ ରୁ ଏହା କାର୍ଯ୍ୟକାରୀ ହୋଇଛି, ଯାହା ଭାରତର $୬୦ ବିଲିୟନ୍ରୁ ଅଧିକ ରପ୍ତାନିକୁ ପ୍ରଭାବିତ କରୁଛି। ଏହା ପୂର୍ବର ୨୫% ହାରକୁ ଦୁଇଗୁଣ କରିଛି। ଅମେରିକା ରାଷ୍ଟ୍ରପତି ଡୋନାଲ୍ଡ୍ ଟ୍ରମ୍ପ ଏହାର କାରଣ ଭାରତର ରୁଷିଆନ୍ ତେଲ ଏବଂ ଯୁଦ୍ଧାସ୍ତ୍ର କିଣିବା ପାଇଁ ବୋଲି କହିଛନ୍ତି।
ଗ୍ଲୋବାଲ୍ ଟ୍ରେଡ୍ ରିସର୍ଚ୍ ଇନିସିଏଟିଭ୍ (ଜିଟିଆରଆଇ) ଅନୁଯାୟୀ, ଭାରତ ବାର୍ଷିକ $୮୬.୫ ବିଲିୟନ୍ ସାମଗ୍ରୀ ଅମେରିକାକୁ ରପ୍ତାନି କରେ, ଯାହାର $୬୦.୨ ବିଲିୟନ୍ ଏହି ଟାରିଫ୍ରେ ପଡ଼ିବ। ସରକାରୀ ଆକଳନ $୪୮.୨ ବିଲିୟନ୍ ପ୍ରଭାବିତ ହେବ ବୋଲି କହୁଛି। ଅଧିକାରୀମାନେ ସତର୍କ କରିଛନ୍ତି ଯେ, ଏହା ଅମେରିକାକୁ ରପ୍ତାନି ଅସମ୍ଭବ କରିପାରେ, ଯାହା କାର୍ଯ୍ୟହୀନତା ଓ ଅର୍ଥନୈତିକ ବୃଦ୍ଧିକୁ ଧୀମା କରିବ।
ଜିଟିଆରଆଇର ପ୍ରତିଷ୍ଠାତା ଅଜୟ ଶ୍ରୀବାସ୍ତବଙ୍କ ମତରେ, ଟେକ୍ସଟାଇଲ୍, ରତ୍ନ ଓ ଆଭୂଷଣ, ଚର୍ମ, ଖାଦ୍ୟ ଓ ଅଟୋମୋବାଇଲ୍ ସେକ୍ଟର୍ ସବୁଠାରୁ ପ୍ରଭାବିତ ହେବ। ନିର୍ଯ୍ୟାତ $୬୦.୨ ବିଲିୟନ୍ରୁ $୧୮.୬ ବିଲିୟନ୍କୁ ହ୍ରାସ ପାଇପାରେ, ଯାହା ଲକ୍ଷାଧିକ ଚାକିରିକୁ ବିପଦରେ ପକାଇବ। ଚାଇନା (୩୦%), ଭିଏଟନାମ୍ (୨୦%) ପରି ଦେଶଗୁଡ଼ିକ ଲାଭବାନ ହୋଇପାରେ।
ଚିଙ୍ଗୁଡ଼ି ($୨.୪ ବିଲିୟନ୍), ରତ୍ନ ଓ ଆଭୂଷଣ ($୧୦ ବିଲିୟନ୍), ଟେକ୍ସଟାଇଲ୍ ($୧୦.୮ ବିଲିୟନ୍), କାର୍ପେଟ୍ ($୧.୨ ବିଲିୟନ୍), ହାଣ୍ଡିକ୍ରାଫ୍ଟ୍ ($୧.୬ ବିଲି୯ନ୍), ଚର୍ମ ($୧.୨ ବିଲିୟନ୍) ଓ କୃଷି ($୬ ବିଲିୟନ୍) ସେକ୍ଟର୍ ଉପରେ ଟାରିଫ୍ ୫୦-୬୦% ପର୍ଯ୍ୟନ୍ତ ବୃଦ୍ଧି ପାଇବ। ଏହା ଆନ୍ଧ୍ରପ୍ରଦେଶ, ସୁରତ୍, ତିରୁପ୍ପୁର୍, ଭଦୋହି ଓ ଜୟପୁର ଭଳି କ୍ଲଷ୍ଟର୍ଗୁଡ଼ିକୁ ଆଘାତ ଦେବ।
ତେବେ $୨୭.୬ ବିଲିୟନ୍ର ରପ୍ତାନି, ଯଥା ଫାର୍ମାସ୍ୟୁଟିକାଲ୍ ଓ ଇଲେକ୍ଟ୍ରୋନିକ୍ସ୍, ଡ୍ୟୁଟି-ମୁକ୍ତ ରହିବ।
