ନୂଆଦିଲ୍ଲୀ,୩୦।୮: ମୁମ୍ବାଇରେ ‘ଇଣ୍ଡିଆ’ ମେଣ୍ଟର ବୈଠକ ପୂର୍ବରୁ ଅରବିନ୍ଦ କେଜ୍ରିଓ୍ବାଲଙ୍କୁ ପ୍ରଧାନମନ୍ତ୍ରୀ ପ୍ରାର୍ଥୀ କରିବାକୁ ଦାବି ହୋଇଛି। ଏହି ଦାବି ଆମ ଆଦମୀ ପାର୍ଟିରୁ ଆସିଛି। ଏଏପିର ରାଷ୍ଟ୍ରୀୟ ମୁଖପାତ୍ର ପ୍ରିୟଙ୍କା କକ୍କର କହିଛନ୍ତି ଯେ, ଯଦି ଆପଣ ମୋତେ ପଚାରନ୍ତି, ତେବେ ମୁଁ ଅରବିନ୍ଦ କେଜ୍ରିଓ୍ବାଲଙ୍କୁ ପ୍ରଧାନମନ୍ତ୍ରୀ ପଦର ପ୍ରାର୍ଥୀ କରାଯିବା ଉଚିତ୍ ବୋଲି କହିବି।
କେଜ୍ରିୱାଲଙ୍କ ପ୍ରଧାନମନ୍ତ୍ରୀ ପ୍ରାର୍ଥୀ ସପକ୍ଷରେ ଯୁକ୍ତି ବାଢିଥିବା ଏଏପି ମୁଖପାତ୍ର କହିଛନ୍ତି, ଜାତୀୟ ରାଜଧାନୀ ଦିଲ୍ଲୀରେ ମୁଦ୍ରାସ୍ଫୀତି ସର୍ବନିମ୍ନ ଅଟେ। ମାଗଣା ଜଳ, ମାଗଣା ଶିକ୍ଷା, ମାଗଣା ବିଦ୍ୟୁତ୍, ମହିଳାମାନଙ୍କ ପାଇଁ ମାଗଣା ବସ୍ ଯାତ୍ରା, ବରିଷ୍ଠ ନାଗରିକଙ୍କ ପାଇଁ ମାଗଣା ତୀର୍ଥଯାତ୍ରା, ତଥାପି ଅତିରିକ୍ତ ବଜେଟ ପ୍ରଣୟନ କରାଯାଇଛି। କକ୍କର କହିଛନ୍ତି, ଅରବିନ୍ଦ କେଜ୍ରିୱାଲ କ୍ରମାଗତ ଭାବରେ ଲୋକଙ୍କ ସମସ୍ୟା ଉଠାଉଛନ୍ତି ଏବଂ ପ୍ରଧାନମନ୍ତ୍ରୀ ମୋଦିଙ୍କ ସାମ୍ନାରେ ଏକ ଚ୍ୟାଲେଞ୍ଜର ଭାବରେ ଉଭା ହୋଇଛନ୍ତି।