ହାଟଡିହୀ/ଛେନାପଦୀ, ୧୮।୫ (ଶୁଭକାନ୍ତ ନାୟକ/ନିରାକାର ପରିଡା): କେନ୍ଦୁଝର ଜିଲାର ହାଟଡିହୀ ବ୍ଲକ ବିଡ଼ିଓ କାର୍ଯ୍ୟାଳୟ ସମ୍ମୁଖରେ କଳାକାରମାନେ ଦେଇଥିବା ଧାରଣା ସୋମବାର ପ୍ରତ୍ୟାହୃତ ହୋଇଛି। ଉପଯୁକ୍ତ ପଦକ୍ଷେପ ନିଆଯିବା ନେଇ ବିଡିଓ ରଞ୍ଜନ କୁମାର ପରିଡା ପ୍ରତିଶୃତି ଦେବା ପରେ ଧାରଣା ପ୍ରତ୍ୟାହୃତ କରାଯାଇଥିଲା।
ତଥାପି ଧାରଣାରତ କଳାକାରମାନଙ୍କର ପ୍ରତିବାଦ ଶୈଳୀ ନିଆରା ଥିଲା। ସୋମବାର ସେମାନେ ପାଲା ପରିବେଷଣ ମାଧ୍ୟମରେ ଦୁର୍ନୀତି ବିରୋଧରେ ଆପତ୍ତି ଜଣାଇଥିଲେ। ପାଲା ମାଧ୍ୟମରେ ସେମାନେ ଦୁର୍ନୀତିର ଢାକଣା ଖୋଲି ତଦନ୍ତ ଓ କାର୍ଯ୍ୟାନୁଷ୍ଠାନ ଗ୍ରହଣ ପାଇଁ ବିଭିନ୍ନ ରାଜନୈତିକ ନେତା ଓ ସରକାରୀ ଅଧିକାରୀଙ୍କୁ ନିବେଦନ କରିଥିଲେ।
କିଛି ସମୟ ପର୍ଯ୍ୟନ୍ତ ବ୍ଲକ ପରିସର ମୃଦଙ୍ଗ, ଝାଞ୍ଜ ଓ କାଠିର ଶବ୍ଦରେ ମୁଗ୍ଧମୟ ହୋଇଯାଇଥିଲା।ବିଡିଓ ରଞ୍ଜନ କୁମାର ପରିଡା କହିଛନ୍ତି ଯେ, କଳାକାରମାନଙ୍କ ଅଭିଯୋଗ ଅନୁସାରେ ଏକ ବିସ୍ତୃତ ରିପୋର୍ଟ ଜିଲାପାଳଙ୍କୁ ପଠାଯିବ। ସେଠାରୁ ନିର୍ଦ୍ଦେଶ ମିଳିଲେ ପରବର୍ତ୍ତୀ ପଦକ୍ଷେପ ଗ୍ରହଣ କରାଯିବ।
ସୂଚନାଯୋଗ୍ୟ ଯେ, ତୀବ୍ର ଖରା ଓ ଗରମ ପରିସ୍ଥିତି ସତ୍ତ୍ୱେ ଚଳିତ ମାସର ୧୫ ତାରିଖରୁ କଳାକାରମାନେ ଧାରଣା ଆରମ୍ଭ କରିଥିଲେ। ଆସନ୍ତା ମେ ୨୦ ତାରିଖରୁ ଆମରଣ ଅନଶନ ଆରମ୍ଭ କରିବାକୁ ସେମାନେ ନିଷ୍ପତ୍ତି ନେଇଥିଲେ।
ହାଟଡିହୀ ବ୍ଲକ କଳା ସଂସ୍କୃତି ସଂଘ (ବିକେଏସଏସ)କୁ ୨୦୧୧ ମସିହାରୁ ମିଳୁଥିବା ସରକାରୀ ଅନୁଦାନ ସହ କଳାକାରଙ୍କ ନାମ ପଞ୍ଜିକରଣ ବାବଦରେ ଆଦାୟ ହୋଇଥିବା ଅର୍ଥରେ ଅନିୟମିତତା ଓ ହେରଫେର ହୋଇଥିବା ନେଇ କଳାକାରମାନେ ଅଭିଯୋଗ କରିଥିଲେ।
ଘଟଣାର ସତ୍ୟତା ପାଇଁ ଫାଇଲ, ବ୍ୟାଙ୍କ ପାସବୁକ୍, କ୍ୟାଶବୁକ୍, ଅନୁଦାନ ପ୍ରାପ୍ତି ଓ ବ୍ୟୟ ସମ୍ବନ୍ଧୀୟ ନଥିପତ୍ର, ରେଜଲୁସନ ରେଜିଷ୍ଟର ଆଦି ଯାଞ୍ଚ କରି ତଦନ୍ତ କରାଯାଉ ବୋଲି ସେମାନେ ଦାବି କରିଥିଲେ।
ଏହାସହିତ, ଅନୁଦାନ ଅନିୟମିତତା ଓ ହେରଫେରରେ ସମ୍ପୃକ୍ତ ବ୍ୟକ୍ତିଙ୍କ ବିରୋଧରେ ବିଭାଗୀୟ ଓ ଆଇନଗତ କାର୍ଯ୍ୟାନୁଷ୍ଠାନ ଗ୍ରହଣ ପାଇଁ ମଧ୍ୟ ଦାବି ଉଠିଥିଲା। କୌଣସି ସୁଫଳ ନମିଳିବାରୁ କଳାକାରମାନେ ଶେଷରେ ଧାରଣାର ପଥ ଅବଲମ୍ବନ କରିଥିଲେ।