ନୂଆଦିଲ୍ଲୀ,୧୭ା୨: ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ସୋମବାର ନୂଆଦିଲ୍ଲୀର ଭାରତ ମଣ୍ଡପମ୍ଠାରେ ଇଣ୍ଡିଆ ଏଆଇ ଇମ୍ପାକ୍ଟ ଏକ୍ସପୋର ଉଦ୍ଘାଟନ କରିଛନ୍ତି। ଏହି ଅବସରରେ ସେ ବିଭିନ୍ନ ଷ୍ଟଲ୍ ବୁଲିବା ସହ ପ୍ରଦର୍ଶନୀରେ ଭାଗ ନେଇଥିବା କମ୍ପାନୀଗୁଡ଼ିକ ସହ କଥା ହୋଇଛନ୍ତି। ଷ୍ଟାର୍ଟଅପ୍ଗୁଡ଼ିକ ସହିତ ମଧ୍ୟ ପ୍ରଧାନମନ୍ତ୍ରୀ ଆଲୋଚନା କରିଛନ୍ତି। ବିଭିନ୍ନ ଦେଶ କୃତ୍ରିମ ବୁଦ୍ଧିମତ୍ତା (ଏଆଇ) ଉପରେ ସେମାନଙ୍କ କାର୍ଯ୍ୟସୂଚୀ ନିର୍ଦ୍ଧାରଣ କରିବାକୁ ପ୍ରତିଦ୍ୱନ୍ଦ୍ୱିତା କରୁଥିଲାବେଳେ ଫେବୃଆରୀ ୧୬ରୁ ୨୦ ପର୍ଯ୍ୟନ୍ତ ଚାଲିବାକୁ ଥିବା ଏହି ପ୍ରଦର୍ଶନୀ ନୀତି ପ୍ରଣୟନକାରୀ, ଶିଳ୍ପ ନେତୃବୃନ୍ଦ ଏବଂ ପ୍ରଯୁକ୍ତି ନବପ୍ରବର୍ତ୍ତନକାରୀମାନଙ୍କୁ ଏକାଠି କରିଛି।
ଏକ୍ସପୋରେ ଉଚ୍ଚ ସମ୍ଭାବନା ଥିବା ୬୦୦ରୁ ଊର୍ଦ୍ଧ୍ୱ ଷ୍ଟାର୍ଟଅପ୍ ଏବଂ ୧୩ଟି ଦେଶର ମଞ୍ଚ ଏଆଇ ଇକୋସିଷ୍ଟମ୍ରେ ଅନ୍ତର୍ଜାତୀୟ ସହଯୋଗ ପ୍ରଦର୍ଶନ କରିଛନ୍ତି। ୭୦ ହଜାର ବର୍ଗମିଟରରୁ ଊର୍ଦ୍ଧ୍ୱ ସ୍ଥାନରେ ଆୟୋଜିତ ଏହି ପ୍ରଦର୍ଶନୀରେ ଅଷ୍ଟ୍ରେଲିଆ, ଜାପାନ, ରୁଷିଆ, ବ୍ରିଟେନ୍, ଫ୍ରାନ୍ସ, ଜର୍ମାନୀ, ଇଟାଲୀ, ନେଦରଲାଣ୍ଡସ୍, ସୁଇଜରଲାଣ୍ଡ, ସର୍ବିୟା, ଇଷ୍ଟୋନିଆ, ତାଜିକିସ୍ତାନ ଏବଂ ଆଫ୍ରିକାର ମଞ୍ଚ ରହିଛି। ପ୍ରଦର୍ଶନୀ ବୈଶ୍ୱିକ ପ୍ରଯୁକ୍ତି ଶିଳ୍ପ, ଷ୍ଟାର୍ଟଅପ୍, ଶିକ୍ଷାବିତ୍ ଏବଂ ଗବେଷଣା ପ୍ରତିଷ୍ଠାନ, କେନ୍ଦ୍ର ଓ ରାଜ୍ୟ ସରକାର ଏବଂ ଅନ୍ତର୍ଜାତୀୟ ଅଂଶୀଦାରମାନଙ୍କୁ ଏକାଠି କରିଛି। ପ୍ରଧାନମନ୍ତ୍ରୀଙ୍କ ଆମନ୍ତ୍ରଣକ୍ରମେ ବହୁ ବିଶ୍ୱ ନେତା ଏଆଇ ଇମ୍ପାକ୍ଟ ସମିଟ୍ରେ ଯୋଗଦେବା କାର୍ଯ୍ୟକ୍ରମ ରହିଛି। ସେମାନଙ୍କ ମଧ୍ୟରେ ଫ୍ରାନ୍ସ ରାଷ୍ଟ୍ରପତି ଏମାନୁଏଲ୍ ମାକରଁ, ବ୍ରାଜିଲ ରାଷ୍ଟ୍ରପତି ଲୁଲା ଡା ସିଲ୍ଭା ରହିଛନ୍ତି। ୪୫ରୁ ଊର୍ଦ୍ଧ୍ୱ ଦେଶରୁ ମନ୍ତ୍ରୀସ୍ତରୀୟ ପ୍ରତିନିଧି ସମିଟ୍ରେ ଯୋଗଦେବେ। ସେହିପରି ଜାତିସଂଘ ମହାସଚିବ ଆଣ୍ଟୋନିଓ ଗୁଟେରେସ୍ଙ୍କ ସମେତ ବିଭିନ୍ନ ଅନ୍ତର୍ଜାତୀୟ ସଂଗଠନର ବରିଷ୍ଠ ଅଧିକାରୀମାନେ ଆଲୋଚନାରେ ଭାଗନେବେ। ପ୍ରଧାନମନ୍ତ୍ରୀ ସମିଟ୍କୁ ଉଦ୍ବୋଧନ ଦେବା ସହ ସିଇଓମାନଙ୍କ ସହ ଆଲୋଚନା କରିବେ।
ପ୍ରଦର୍ଶନୀ ଉଦ୍ଘାଟନ ପୂର୍ବରୁ ପ୍ରଧାନମନ୍ତ୍ରୀ କହିଥିଲେ, କୃତ୍ରିମ ବୁଦ୍ଧିମତ୍ତାର ପରିବର୍ତ୍ତନ କ୍ଷେତ୍ରରେ ଭାରତ ସର୍ବାଗ୍ରେ ରହିଛି। ଏଆଇ କ୍ଷେତ୍ରରେ ଭାରତର ଅଗ୍ରଗତି ଏହାର ଉଚ୍ଚାକାଂକ୍ଷା ଓ ଦାୟିତ୍ୱବୋଧକୁ ପ୍ରତିଫଳିତ କରୁଛି। ଏଆଇ ଉପରେ ଆଲୋଚନା ପାଇଁ ସାରା ବିଶ୍ୱ ଏକାଠି ହୋଇଛନ୍ତି। ବିଶ୍ୱନେତା, ଶିଳ୍ପପତି, ନବପ୍ରବର୍ତ୍ତକ, ନୀତି ନିର୍ଦ୍ଧାରକ, ଗବେଷକ ଏବଂ ପ୍ରଯୁକ୍ତି ପ୍ରତି ଆଗ୍ରହୀ ବ୍ୟକ୍ତିମାନଙ୍କୁ ସମିଟ୍କୁ ସ୍ବାଗତ କରୁଛି ବୋଲି ପ୍ରଧାନମନ୍ତ୍ରୀ କହିଛନ୍ତି। ସମିଟ୍ର ବିଷୟବସ୍ତୁ ରହିଛି ‘ସର୍ବଜନ ହିତାୟ, ସର୍ବଜନ ସୁଖାୟ’ ଅର୍ଥାତ୍ ସମସ୍ତଙ୍କ ମଙ୍ଗଳ ଏବଂ ସୁଖ, ଯାହା ମାନବ କୈନ୍ଦ୍ରିକ ବିକଶ ପାଇଁ କୃତ୍ରିମ ବୁଦ୍ଧିମତ୍ତାର ଉପଯୋଗ କରିବା ଲାଗି ଏକ ମିଳିତ ପ୍ରତିଶ୍ରୁତିବଦ୍ଧତା ବୋଲି ସେ କହିଛନ୍ତି।
ପଢ଼ନ୍ତୁ ➡️ବିଶ୍ୱ ଦେଖିବ ଭାରତର ଶକ୍ତି!
ବିଶ୍ୱର ଏହି ସର୍ବବୃହତ୍ କୃତ୍ରିମ ବୁଦ୍ଧିମତ୍ତା ସମ୍ମିଳନୀ ଉଦ୍ଘାଟନ ପୂର୍ବରୁ ସୋମବାର ଲୋକଙ୍କ ଲମ୍ବା ଲାଇନ ଦେଖିବାକୁ ମିଳିଛି। ସହରରେ ଲଗାଯାଇଥିବା ବିଶାଳ ବିଲ୍ବୋର୍ଡଗୁଡ଼ିକ ଏଆଇ ଇମ୍ପାକ୍ଟ ସମିଟ୍କୁ ଅତିଥି, ପ୍ରତିନିଧି ଓ ବକ୍ତାମାନଙ୍କୁ ସ୍ବାଗତ କରୁଛି। ଆଲଫାବେଟ୍ର ସୁନ୍ଦର ପିଚାଇଙ୍କଠାରୁ ଆରମ୍ଭ କରି ଓପନ୍ ଏଆଇର ସାମ୍ ଅଲ୍ଟମାନ୍ ଏବଂ ଆନ୍ଥ୍ରୋପିକ୍ର ଡାରିଓ ଆମୋଡେଇଙ୍କ ପର୍ଯ୍ୟନ୍ତ ବକ୍ତାମାନେ ଉଦ୍ବୋଧନ ଦେବାକୁ ଥିବାରୁ ଲୋକମାନଙ୍କ ମଧ୍ୟରେ ଆଗ୍ରହ ଲାଗିରହିଛି। ସମିଟ୍ର ଶେଷ ଦୁଇଦିନ ୧୯ ଓ ୨୦ରେ ୨୦ରୁ ଊର୍ଦ୍ଧ୍ୱ ରାଷ୍ଟ୍ରମୁଖ୍ୟ ଓ ସରକାରୀ ମୁଖ୍ୟ ଯୋଗଦେବା କାର୍ଯ୍ୟକ୍ରମ ରହିଛି।
