ନୂଆଦିଲ୍ଲୀ, ୨୪ା୮: ଉତ୍ତର-ପୂର୍ବ ଦିଲ୍ଲୀ ଦଙ୍ଗା ଘଟଣାରେ ଷଡ଼ଯନ୍ତ୍ର କରାଯାଇ ଜବାହରଲାଲ ନେହେରୁ ବିଶ୍ୱବିଦ୍ୟାଳୟ(ଜେଏନ୍ୟୁ)ର ପୂର୍ବତନ ଛାତ୍ରନେତା ଉମର ଖଲିଦ୍ଙ୍କୁ ଗିରଫ କରାଯାଇଥିଲା ବୋଲି ସୋମବାର ଦିଲ୍ଲୀର ଏକ ଅଦାଲତରେ ତାଙ୍କ ଓକିଲ କହିଛନ୍ତି। ବେଆଇନ କାର୍ଯ୍ୟକଳାପ ନିରୋଧୀ ଆଇନ (ୟୁଏପିଏ)ରେ ଗିରଫ ଖଲିଦଙ୍କୁ ଅଭିଯୁକ୍ତ ଆଖ୍ୟା ଦେବାକୁ ଯାଇ ପୋଲିସ କରିଥିବା ଦାବିରେ ଅନେକ ବିରୋଧାଭାସ ରହିଛି। ତାଙ୍କୁ ଫସାଇବା ପାଇଁ ଏହା ଏକ ଚକ୍ରାନ୍ତ। ମିଡିଆ ମାଧ୍ୟମରେ ତାଙ୍କୁ ଅଭିଯୁକ୍ତ ଦର୍ଶାଯାଇଛି। ତାଙ୍କ ଭାଷଣର ଏକ ଏଡିଟେଡ୍ ଭିଡିଓକୁ ପ୍ରସାରିତ କରାଯାଇଛି, ଯାହାକୁ ପ୍ରଥମେ ଭାଜପା ନେତା ଅମିତ ମାଲଭିୟ ଟୁଇଟ୍ କରିଥିଲେ ବୋଲି ଖଲିଦ୍ଙ୍କ ଓକିଲ କହିଛନ୍ତି।
ଫେବୃୟାରୀରେ ଉତ୍ତର-ପୂର୍ବ ଦିଲ୍ଲୀ ଦଙ୍ଗାରେ ୫୩ ଜଣଙ୍କ ମୃତ୍ୟୁ ଘଟିବା ସହ ୭ ଶହରୁ ଊର୍ଦ୍ଧ୍ୱ ଆହତ ହୋଇଥିଲେ।
ଖଲିଦ୍ ଗାନ୍ଧିଜୀ ଏବଂ ଗଣତାନ୍ତ୍ରିକ ଶକ୍ତି ବିଷୟରେ କହିଥିବାବେଳେ ମନଗଢ଼ା କାହାଣୀ ରଚାଯାଇ ଖଲିଦ୍ଙ୍କୁ ଫସାଯାଇଥିବା ତାଙ୍କ ଓକିଲ ଭାଷଣର ଭିଡିଓ କ୍ଲିପ୍ ଉପସ୍ଥାପନ କରି କହିଛନ୍ତି। ଗତ ଏପ୍ରିଲରେ ଖଲିଦ୍ଙ୍କ ସମେତ ଜେଏନ୍ୟୁ ଛାତ୍ରୀ ନତାଶା ନରଓ୍ବାଲ ଏବଂ ଦେବାଙ୍ଗନା କଲିତା, ଜାମିଆ ସମନ୍ବୟ କମିଟି ସଦସ୍ୟ ସଫୋରା ଜରଗ୍, ଏଏପିର ପୂର୍ବତନ କାଉନସିଲର ତାହିର ହୁସେନଙ୍କ ସମେତ ଅନ୍ୟ କେତେଜଣଙ୍କୁ ୟୁଏପିଏ ଅଧୀନରେ ଗିରଫ କରାଯାଇଥିଲା।
