ନୂଆଦିଲ୍ଲୀ,୨୦।୧୧: ଆତଙ୍କବାଦୀ ଘଟଣା ଏବଂ ସୀମାରେ ଥିବା ବିପଦକୁ ଦୃଷ୍ଟିରେ ରଖି ଭାରତୀୟ ସେନା ଏକ ବଡ ପଦକ୍ଷେପ ନେଇଛି। ସୈନିକମାନଙ୍କ ସୁରକ୍ଷା ପାଇଁ ଭାରତୀୟ ସେନା ୬୨,୫୦୦ ବୁଲେଟପ୍ରୁଫ ଜ୍ୟାକେଟ (ବିପିଜେ) କିଣିବା ପାଇଁ ଟେଣ୍ଡର ଜାରି କରିଛି। ଏହି ବୁଲେଟପ୍ରୁଫ ଜ୍ୟାକେଟ ଆତଙ୍କବାଦୀମାନେ ବ୍ୟବହାର କରୁଥିବା ଷ୍ଟିଲ୍ କୋର ଗୁଳିରୁ ସୈନିକମାନଙ୍କୁ ସୁରକ୍ଷା ଦେବାରେ ସହାୟକ ହେବ। ଏହାର କ୍ରୟ ପ୍ରକ୍ରିୟା ବିଷୟରେ ସେନା ଅଧିକାରୀମାନେ ସୂଚନା ଦେଇଛନ୍ତି।
ଭାରତୀୟ ସେନା ଅଧିକାରୀଙ୍କ ଦ୍ୱାରା ପ୍ରଦାନ କରାଯାଇଥିବା ସୂଚନା ଅନୁଯାୟୀ ପ୍ରତିରକ୍ଷା ମନ୍ତ୍ରଣାଳୟ ମେକ ଇନ ଇଣ୍ଡିଆ ପଦକ୍ଷେପ ଅନୁଯାୟୀ ଏହି ଜ୍ୟାକେଟ ପାଇଁ ଦୁଇଟି ପୃଥକ ଟେଣ୍ଡର ଜାରି କରିଛି। ଏହି କ୍ରମରେ ସାଧାରଣ ପ୍ରକ୍ରିୟା ମାଧ୍ୟମରେ ୪୭,୬୨୭ ଜ୍ୟାକେଟ ପାଇଁ କ୍ରୟ ଟେଣ୍ଡର ଜାରି କରାଯାଇଛି। ଏହି ବୁଲେଟପ୍ରୁଫ ଜ୍ୟାକେଟଗୁଡିକ ପାଇଁ ସାଧାରଣ ପ୍ରକ୍ରିୟା ମାଧ୍ୟମରେ କ୍ରୟ ପ୍ରକ୍ରିୟା ଆସନ୍ତା ୧୮-୨୪ ମାସ ମଧ୍ୟରେ ଶେଷ ହେବ ବୋଲି ଆଶା କରାଯାଉଛି। ଦ୍ୱିତୀୟଟି ଜରୁରୀକାଳୀନ କ୍ରୟ ପ୍ରକ୍ରିୟାରେ ୧୫,୦୦୦ ଜ୍ୟାକେଟ କ୍ରୟ କରାଯିବ। ଆସନ୍ତା ତିନିରୁ ଚାରି ମାସ ମଧ୍ୟରେ ଏହି କ୍ରୟ ପ୍ରକ୍ରିୟା ଚୂଡାନ୍ତ ହେବ।
ସାମରିକ ଅଧିକାରୀ କହିଛନ୍ତି, ଏହି ଦୁଇଟି ଟେଣ୍ଡର ମାଧ୍ୟମରେ କ୍ରୟ କରାଯାଉଥିବା ଜ୍ୟାକେଟଗୁଡିକ ଗ୍ରେଡ-୪ ହେବ। ଏହି ବୁଲେଟପ୍ରୁଫ ପୋଷାକଗୁଡିକ ଷ୍ଟିଲ୍ କୋର ଗୁଳି ବିରୋଧରେ ପ୍ରଭାବଶାଳୀ ବୋଲି ଜଣାଶୁଣା। ଏହି କ୍ରୟ ପ୍ରକ୍ରିୟା ସମାପ୍ତ ହେବା ପରେ ଜମ୍ମୁ କଶ୍ମୀରରେ ଆତଙ୍କବାଦୀ ଅପରେଶନରେ ନିୟୋଜିତ ସୈନିକମାନଙ୍କୁ ଏହି ଜ୍ୟାକେଟଗୁଡ଼ିକ ପ୍ରଥମେ ପ୍ରଦାନ କରାଯିବ।
