ଶ୍ରୀନଗର,୪।୫ : ଜମ୍ମୁ-କଶ୍ମୀରର କିସ୍ତୱର ଜିସ୍ଲାର ଦୂରବର୍ତ୍ତୀ ମଣ୍ଡୱାର ମାଖନା ଜଙ୍ଗଲରେ ଏକ ସେନା ହେଲିକପ୍ଟର ଦୁର୍ଘଟଣାଗ୍ରସ୍ତ ହୋଇଛି। ଯେଉଁଥିରେ ଦୁଇ ଜଣ ଆହତ ହୋଇଛନ୍ତି। ଦୁର୍ଘଟଣାଗ୍ରସ୍ତ ହେଲିକପ୍ଟରଟି ହେଉଛି ସେନାର ଏଏଲଏଚ ଧ୍ରୁବ ହେଲିକପ୍ଟର। ସେନା ଅଧିକାରୀଙ୍କ ଅନୁଯାୟୀ ଏହି ଦୁର୍ଘଟଣାରେ ପାଇଲଟ ଆହତ ହୋଇଛନ୍ତି। କିନ୍ତୁ ସେ ସୁରକ୍ଷିତ ଅଛନ୍ତି। ସେନା ଅଧିକାରୀ କହିଛନ୍ତି, ଅଧିକ ତଥ୍ୟକୁ ଅପେକ୍ଷା କରାଯାଇଛି। ଏଥିରେ ୩ ଜଣ ଯବାନ ଥିବା କୁହାଯାଉଛି।
ପାଇଲଟଙ୍କ ସମେତ ଅନ୍ୟ ଜଣେ ଯବାନ ଆହତ ହୋଇଛନ୍ତି। ତେବେ ଅନ୍ୟ ଜଣେ ଯବାନ ଶହୀଦ ହୋଇଥିବା କୁହାଯାଉଛି।
ଦୁର୍ଘଟଣା ପରେ ସେହି ସ୍ଥାନର ଫଟୋ ମଧ୍ୟ ସାମ୍ନାକୁ ଆସିଛି। ଯେଉଁଥିରେ ହେଲିକପ୍ଟରର ଆବର୍ଜନା ଏବଂ କିଛି ଲୋକ ଦୃଶ୍ୟମାନ ହେଉଛନ୍ତି। ଘଟଣା ସମ୍ପର୍କରେ ସୂଚନା ପାଇବା ପରେ ତୁରନ୍ତ ସେନା ଦ୍ୱାରା ଉଦ୍ଧାର କାର୍ଯ୍ୟ ଆରମ୍ଭ ହୋଇଛି। ଦୁର୍ଘଟଣା କିପରି ଓ କାହିଁକି ଘଟିଲା ସେନେଇ ସେନା ପକ୍ଷରୁ କୌଣସି ବିବୃତ୍ତି ଦିଆଯାଇ ନାହିଁ। ସେନାର ଏଏଲଏଚ ଧ୍ରୁବ ଏକ ଉନ୍ନତ ହାଲୁକା ହେଲିକପ୍ଟର। ଏହା ଭାରତରେ ଉତ୍ପାଦିତ ହୋଇଛି ଏବଂ ହିନ୍ଦୁସ୍ତାନ ଏରୋନେଟିକ୍ସ ଲିମିଟେଡ ଏହାକୁ ନିର୍ମାଣ କରିଛି। ଓଜନରେ ହାଲୁକା ହୋଇଥିବାରୁ ଏହା ପାହାଡ଼ିଆ ଅଞ୍ଚଳରେ ସହଜରେ ଉଡ଼ିବାକୁ ସକ୍ଷମ। ଭାରତୀୟ ସେନା ସହିତ ଏହି ହେଲିକପ୍ଟରକୁ ନୌସେନା ଏବଂ ବାୟୁସେନା ମଧ୍ୟ ବ୍ୟବହାର କରୁଛନ୍ତି।
