ନୂଆଦିଲ୍ଲୀ,୨୩।୧ : ସୋମବାର ସକାଳେ ଭାରତୀୟ ସେନା ମୁଖ୍ୟ ଜେନେରାଲ ମନୋଜ ପାଣ୍ଡେ ଅରୁଣାଚଳ ପ୍ରଦେଶରେ ପହଞ୍ଚିଛନ୍ତି। ଏଠାରେ ସେ ଚାଇନା ନିକଟରେ ଥିବା ସୀମାନ୍ତ ଅଞ୍ଚଳ ପରିଦର୍ଶନ କରି ଯବାନମାନଙ୍କୁ ଭେଟିଥିଲେ। ଜେନେରାଲ ପାଣ୍ଡେ ମଧ୍ୟ ଏଲଏସି ନିକଟରେ ଥିବା ସମ୍ବେଦନଶୀଳ ସ୍ଥାନଗୁଡିକ ତଦାରଖ କରିଥିଲେ। ଜେନେରାଲ ପାଣ୍ଡେଙ୍କ ଏହି ଗୁରୁତ୍ୱପୂର୍ଣ୍ଣ ଗସ୍ତ ଅରୁଣାଚଳ ପ୍ରଦେଶର ତାୱାଙ୍ଗ ସେକ୍ଟରରେ ଏଲଏସି ନିକଟରେ ଭାରତୀୟ ଏବଂ ଚାଇନା ସୈନିକଙ୍କ ମଧ୍ୟରେ ଝଗଡା ହେବାର ପ୍ରାୟ ଦେଢ଼ ମାସ ପରେ ହୋଇଛି।
ଜେନେରାଲ ପାଣ୍ଡେ ପୂର୍ବ ଅରୁଣାଚଳର ଏଲଏସି ନିକଟରେ ନିୟୋଜିତ ଯବାନଙ୍କ ପ୍ରସ୍ତୁତି ଦେଖିଥିଲେ। ସେ ସୀମାରେ ଥିବା ସୁରକ୍ଷା ବ୍ୟବସ୍ଥା ବିଷୟରେ ମଧ୍ୟ ପଚାରି ବୁଝିଥିଲେ। ଯବାନମାନଙ୍କୁ ସତର୍କ ଏବଂ ସଜାଗ ରହିବା ପାଇଁ ପରାମର୍ଶ ମଧ୍ୟ ଦେଇଥିଲେ।