ନୂଆଦିଲ୍ଲୀ,୧ ।୧୦: କେନ୍ଦ୍ର ସରକାରଙ୍କ କୃଷି ଆଇନକୁ ବିରୋଧ କରି ରାଜରାସ୍ତାରେ ବିରୋଧ ପ୍ରଦର୍ଶନ କରୁଥିବା କୃଷକଙ୍କୁ ଆଜି କିଛି କଟୁ ସମାଲୋଚନା କରିଛନ୍ତି ସୁପ୍ରିମକୋର୍ଟ । କୋର୍ଟ ଏକ କୃଷକ ସଙ୍ଗଠନର ଓକିଲଙ୍କୁ କହିଛନ୍ତି, ‘ସମସ୍ତ ନାଗରିକଙ୍କର ରାସ୍ତା ଉପରେ ଯାଆସ କରିବାର ଅଧିକାର ରହିଛି । ଆପଣମାନେ ଯେଉଁଠି ବସିଛନ୍ତି ସେଠାରେ ସେହି ଅଞ୍ଚଳର ଲୋକଙ୍କୁ କେବେ ପଚାରିଛନ୍ତି ଏଥିରେ ସେମାନେ ଖୁସି କି ନା । ଆପଣମାନେ ସହରର ଶ୍ୱାସରୁଦ୍ଧ କରୁଛନ୍ତି । ଆଉ ଏବେ ସହର ଭିତରେ ପ୍ରବେଶ କରିବାକୁ ଅନୁମତି ମାଗୁଛନ୍ତି । ରାଜସ୍ଥାନର ଏକ ସଙ୍ଗଠନ କୃଷକ ମହାପଞ୍ଚାୟତ ସୁପ୍ରିମକୋର୍ଟଙ୍କୁ ଆବେଦନ କରିଥିଲେ କି ତାଙ୍କୁ ଦିଲ୍ଲୀର ଯନ୍ତର ମନ୍ତରରେ ଶାନ୍ତିପୂର୍ଣ୍ଣ ଭାବେ ସତ୍ୟାଗ୍ରହ ଅନୁମତି ଦିଆଯାଉ । ଏହାର ଜବାବରେ ଜଷ୍ଟିଶ ଏ ଏମ୍ ଖାନୱିଲକର ଓ ସି ଟି ରବିକୁମାର କହିଛନ୍ତି ସତ୍ୟାଗ୍ରହର ଅର୍ଥ କ’ଣ । ଆପଣମାନେ ଗୋଟିଏ ପଟେ ସୁପ୍ରିମକୋର୍ଟରେ କୃଷି ଆଇନକୁ ଚ୍ୟାଲେଞ୍ଜ କରୁଛନ୍ତି ଓ ଅନ୍ୟପଟେ ବିରୋଧ ପ୍ରଦର୍ଶନ କରୁଛନ୍ତି । କ’ଣ ଏହି ବିରୋଧ ନ୍ୟାୟପାଳିକା ବିରୋଧରେ । ଯଦି କୋର୍ଟକୁ ଆସିଛନ୍ତି ତେବେ ଭରସା ରଖନ୍ତୁ ।
