ରସୁଲପୁର,୧୪ା୧୦(ଡି.ଏନ.ଏ.): ଆମେରିକାସ୍ଥିତ ଷ୍ଟାନ୍ଫୋର୍ଡ ବିଶ୍ୱବିଦ୍ୟାଳୟ ପକ୍ଷରୁ ୨୦୨୨ ଶିକ୍ଷାବର୍ଷ ପାଇଁ ବିଶ୍ୱର ଶ୍ରେଷ୍ଠ ୨ ପ୍ରତିଶତ ବୈଜ୍ଞାନିକଙ୍କ ତାଲିକା ପ୍ରକାଶ ପାଇଛି। ଏଥିରେ ଯାଜପୁର ଜିଲା ରସୁଲପୁର ବ୍ଲକ ଅନ୍ତର୍ଗତ ବାରବାଟୀ ଗ୍ରାମର ଅନନ୍ତ ବେହେରାଙ୍କ ପୁଅ ବୈଜ୍ଞାନିକ ଡ. ଅର୍ଜୁନ ବେହେରାଙ୍କ ନାମ ରହିଛି। ବୈଜ୍ଞାନିକ ବେହେରା ଏବେ ପଞ୍ଜାବର ରୋପରସ୍ଥିତ ଇଣ୍ଡିଆନ ଇନ୍ଷ୍ଟିଚ୍ୟୁଟ୍ ଅଫ୍ ଟେକ୍ନୋଲୋଜି(ଆଇଆଇଟି)ରେ ରସାୟନ ବିଜ୍ଞାନରେ ଗବେଷଣା କରୁଛନ୍ତି। ତାଙ୍କ ପକ୍ଷରୁ ପ୍ରକାଶିତ ଜର୍ନାଲକୁ ଷ୍ଟାନଫୋର୍ଡ ବିଶ୍ୱବିଦ୍ୟାଳୟ ପକ୍ଷରୁ ମାନ୍ୟତା ମିଳିଛି। ବିଭିନ୍ନ କ୍ଷେତ୍ରରେ ଗବେଷଣା କରୁଥିବା ରୋପର ଆଇଆଇଟିର ବୈଜ୍ଞାନିକମାନଙ୍କ ମଧ୍ୟରୁ ୧୧ଜଣଙ୍କୁ ଏହି ତାଲିକାରେ ସାମିଲ କରାଯାଇଥିବା ବେଳେ ଓଡ଼ିଆ ଯୁବ ବୈଜ୍ଞାନିକ ଭାବେ ଅର୍ଜୁନ ରହିଛନ୍ତି। ଉକ୍ତ ସଫଳତାକୁ ନେଇ ତାଙ୍କ ନିକଟକୁ ବିଭିନ୍ନ ମହଲରୁ ଶୁଭେଚ୍ଛାର ସୁଅ ଛୁଟିଛି।
ଷ୍ଟାନ୍ଫୋର୍ଡ ବିଶ୍ୱବିଦ୍ୟାଳୟର ପ୍ରଖ୍ୟାତ ପ୍ରଫେସର ବୈଜ୍ଞାନିକ ଜନ୍ ଲୋନାଡିସଙ୍କ ନେତୃତ୍ୱରେ ଏକ ଚୟନକାରୀ ଦଳ ଗଠନ କରାଯାଇ ବୈଜ୍ଞାନିକଙ୍କ ତାଲିକା ପ୍ରକାଶ କରାଯାଇଛି। ସମଗ୍ର ବିଶ୍ୱରୁ ପ୍ରାୟ ୮ଲକ୍ଷରୁ ଊର୍ଦ୍ଧ୍ୱ ବୈଜ୍ଞାନିକ ୨୨ଟି ବିଭିନ୍ନ ବୈଜ୍ଞାନିକ ଓ ୧୭୬ଟି ଉପବୈଜ୍ଞାନିକ ଗବେଷଣା କ୍ଷେତ୍ରରେ ନିଜର ଜର୍ନାଲ ପ୍ରକାଶ କରିଥିଲେ। ଉକ୍ତ ଜର୍ନାଲ ମଧ୍ୟରୁ ୧ଲକ୍ଷ ୮୦ହଜାର ବୈଜ୍ଞାନିକଙ୍କ ଜର୍ନାଲ ତଥ୍ୟ ଭିତ୍ତିକ ଥିବାରୁ ସେଗୁଡ଼ିକୁ ବିଚାରକୁ ନିଆଯାଇଥିଲା। ସେଥିମଧ୍ୟରୁ ବୈଜ୍ଞାନିକ ଡ. ବେହେରା ବୈଜ୍ଞାନିକ ଗବେଷଣା କ୍ଷେତ୍ର ରସାୟନ ବିଜ୍ଞାନ ଓ ଉପ-ବୈଜ୍ଞାନିକ କ୍ଷେତ୍ର ଫଟୋ କାଟେଲେସିସ୍ ଉପରେ ଗବେଷଣା କରୁଛନ୍ତି। ସେ ଭବିଷ୍ୟତରେ ଶୁଦ୍ଧ ଉଦ୍ଯାନ ଉପତ୍ାଦନ ଓ ପରିବେଶ ସ୍ଥିତିରେ ସ୍ଥାୟିତ୍ୱ ବଜାୟ ରଖିବା ଉପରେ ଗବେଷଣା ଜାରି ରଖିବେ ବୋଲି ଲକ୍ଷ୍ୟ ରଖିଛନ୍ତି। ଫାର୍ମାକୋଲୋଜି ଉପରେ ପ୍ରକାଶିତ ଜର୍ନାଲକୁ ନେଇ ଡ. ଯୋର୍ଡି ମେଷ୍ଟରେର୍ସ ପ୍ରଥମ ସ୍ଥାନ ଅଧିକାର କରିବାର ସୁଯୋଗ ପାଇଛନ୍ତି। ଏ କ୍ଷେତ୍ରରେ ସ୍ପେନ୍ରୁ ୫ଜଣ ଓ ବିଶ୍ୱରୁ ୨୬୩ଜଣ ବୈଜ୍ଞାନିକଙ୍କ ଗବେଷଣାକୁ ସମ୍ମାନ ମିଳିଛି।
