ଯାଜପୁର,୧୭ା୩(ହର୍ଷବର୍ଦ୍ଧନ ବେହେରା)ଯାଜପୁର ଜିଲାର ବ୍ୟାସନଗର ସ୍ବୟଂଶାସିତ ମହାବିଦ୍ୟାଳୟରେ ଗଭର୍ନିଂ ବଡି ସଭାପତି ନିଯୁକ୍ତି ପ୍ରକ୍ରିୟା ନିୟମରେ ବ୍ୟାପକ ଉଲ୍ଲଂଘନ କରାଯାଇଛି। ଏକା ସମୟରେ ଜଣେ ବ୍ୟକ୍ତି ଦୁଇଟି ପଦବୀ ଦାୟିତ୍ୱ ତୁଲାଇବାର ନିୟମ ନ ଥିବାବେଳେ ତାଙ୍କୁ ଉଚ୍ଚଶିକ୍ଷା ବିଭାଗ ପକ୍ଷରୁ ସଭାପତି ନିଯୁକ୍ତି କରିବା ବେଆଇନ ବୋଲି ୧୭ା୮ା୨୦୨୧ରେ ଜନଶୁଣାଣି ପୋର୍ଟାଲରେ ଅଭିଯୋଗ ହୋଇଥିଲା। ହେଲେ ବିଡ଼ମ୍ବନା ଯେ, ଏହି ଅଭିଯୋଗର ପ୍ରାୟ ଅଢ଼େଇବର୍ଷ ଅତିକ୍ରାନ୍ତ ହେବାପରେ ୧୩ା୩ା୨୦୨୪ରେ ଭୁବନେଶ୍ୱର ଆଞ୍ଚଳିକ ଶିକ୍ଷା ନିର୍ଦ୍ଦେଶାଳୟ ପକ୍ଷରୁ ଆବଶ୍ୟକ ତଦନ୍ତ କରି ବିହିତ ପଦକ୍ଷେପ ନେବାକୁ ମହାବିଦ୍ୟାଳୟର ଅଧ୍ୟକ୍ଷଙ୍କୁ ନିର୍ଦ୍ଦେଶ ହୋଇଛି। ଏଥିରୁ ଉକ୍ତ ଅଭିଯୋଗକୁ ଉଚ୍ଚଶିକ୍ଷା ବିଭାଗର ସମ୍ପୃକ୍ତ ଅଧିକାରୀ ଜାଣିଶୁଣି ଚପେଇ ରଖିଥିଲେ କିମ୍ବା ତଦନ୍ତ କରିବାକୁ କୌଣସି ଆନ୍ତରିକତା ନ ଥିଲା ବୋଲି ମତପ୍ରକାଶ ପାଇଛି।
କଲେଜର ସର୍ବାଙ୍ଗୀନ ବିକାଶ ପାଇଁ ଗଭର୍ନିଂ ବଡି ଗଠନ କରିବାର ନିୟମ ରହିଛି। ଏଥିପାଇଁ ଶିକ୍ଷା ବିଭାଗ ପକ୍ଷରୁ କେତେକ ଗାଇଡ୍ଲାଇନ୍ ପ୍ରସ୍ତୁତ କରାଯାଇଛି। ଏହିକ୍ରମରେ ବ୍ୟାସନଗର ସ୍ବୟଂଶାସିତ ମହାବିଦ୍ୟାଳୟ ନିମନ୍ତେ ୧୬ା୬ା୨୦୨୧ରେ ନୂତନ ଗଭର୍ନିଂ ବଡି ଗଠନ ହୋଇଥିଲା। ଏଥିରେ ଅବସରପ୍ରାପ୍ତ ସରକାରୀ ଅଧିକାରୀ ପ୍ରଦୀପ କୁମାର ବିଶ୍ୱାଳଙ୍କୁ ସଭାପତି ଭାବେ ନିଯୁକ୍ତି ଦିଆଯାଇଥିଲା। ହେଲେ ଜନଶୁଣାଣି ପୋର୍ଟାଲରେ ମୁକୁନ୍ଦ ମହାରଣା କରିଥିବା ଅଭିଯୋଗ ଅନୁସାରେ, ଯାଜପୁର ଜିଲାପାଳ ଅବସରପ୍ରାପ୍ତ ସରକାରୀ ଅଧିକାରୀ ବିଶ୍ୱାଳଙ୍କ ନାମକୁ ସୁପାରିଶ କରିଥିଲେ। କିନ୍ତୁ ୨୬ା୨ା୨୦୨୧ରୁ ବିଶ୍ୱାଳ ଓଆର୍ଇଆର୍ଏ(ଓଡିଶା ରିୟଲ ଇଷ୍ଟେଟ ରେଗୁଲେଟୋରି ଅଥରିଟି) ତଥା ଓରେରାର ମେମ୍ବର ସେକ୍ରେଟାରି ଭାବେ କାର୍ଯ୍ୟ କରିଆସୁଥିଲେ। ଓରେରାର ସଭ୍ୟ ନିଯୁକ୍ତି ସଂକ୍ରାନ୍ତରେ ୨୦୧୯ ଜୁନ୍ ୩୦ରେ ପ୍ରକାଶ ପାଇଥିବା ସରକାରୀ ବିଜ୍ଞପ୍ତିର ୩ ନମ୍ବର ପଏଣ୍ଟ ଅନୁଯାୟୀ ମେମ୍ବର ସେକ୍ରେଟାରି ଅନ୍ୟ କୌଣସି କାର୍ଯ୍ୟାଳୟର ଦାୟିତ୍ୱ ନେଇପାରିବେନାହିଁ। କିନ୍ତୁ ବ୍ୟାସନଗର କଲେଜର ଗଭର୍ନିଂ ବଡି ସଭାପତି ନିଯୁକ୍ତିରେ ଏହାର ଉଲ୍ଲଂଘନ ହେବା ସରକାରଙ୍କ ନିୟମର ବିରୋଧ କରାଯାଇଛି। ଏହାବାଦ ଏହି ଗଭର୍ନିଂ ବଡିରେ ଅନୁସୂଚିତ ଜାତି କିମ୍ବା ଜନଜାତି, ସଂଖ୍ୟାଲଘୁ ସଂପ୍ରଦାୟ, ଛାତ୍ରୀଛାତ୍ରଙ୍କ ଅଭିଭାବକ ନ ହୋଇ କେତେକ ସଭ୍ୟ ଭାବେ ମନୋନୀତ ହୋଇଛନ୍ତି ବୋଲି ଜନଶୁଣାଣି ପୋର୍ଟାଲରେ ଅଭିଯୋଗ ହୋଇଥିଲା। ଏହିକ୍ରମରେ ଉକ୍ତ ଅଭିଯୋଗର ସତ୍ୟାସତ୍ୟର ସନ୍ଧାନ କରି ଗଭର୍ନିଂ ବଡିର ପୁନର୍ଗଠନ କରିବାକୁ ସେ ଅନୁରୋଧ କରିଥିଲେ। ହେଲେ ଉକ୍ତ ଅଭିଯୋଗକୁ ପ୍ରାୟ ଅଢେଇ ବର୍ଷ ନାଲି ଫିତା ତଳେ ଚାପି ରଖିବା ପରେ ବିଭାଗ ପକ୍ଷରୁ ଏବେ କେଉଁ କାରଣରୁ ତତ୍ପରତା ପ୍ରକାଶ କରାଯାଉଛି ତାହା ତଦନ୍ତସାପେକ୍ଷ ବୋଲି ମତପ୍ରକାଶ ପାଇଛି। ଭୁବନେଶ୍ୱର ଆଞ୍ଚଳିକ ଶିକ୍ଷା ନିର୍ଦ୍ଦେଶାଳୟର ନିର୍ଦ୍ଦେଶକ ୨୦୬୭/୧୩ା୩ା୨୦୨୪ରେ ୭ ଦିନ ମଧ୍ୟରେ ତଦନ୍ତ କରି ତଥ୍ୟମୂଳକ ରିପୋର୍ଟ ଦାଖଲ କରିବାକୁ ବ୍ୟାସନଗର ସ୍ବୟଂଶାସିତ ମହାବିଦ୍ୟାଳୟ ଅଧ୍ୟକ୍ଷଙ୍କୁ ନିର୍ଦ୍ଦେଶ ଦେଇଛନ୍ତି।
