ରାଜକନିକା,୧୫ା୧(ସଞ୍ଜୟ କୁମାର ଦାଶ): କେନ୍ଦ୍ରାପଡ଼ା ଜିଲା ରାଜକନିକା ବ୍ଲକର ପାରିନୂଆପଡ଼ା-ହାବଳଗଣ୍ଡ ପଞ୍ଚାୟତ ହାବଳଗଣ୍ଡପାଟଣା ଗାଁର ଚାଷୀ ବଳରାମ ଦାଶ(୭୫) ଶ୍ରଦ୍ଧାରେ ସମସ୍ତେ ଝରିଆ ନନା ବୋଲି ଡାକିଥାନ୍ତି। ସେ ବିଦେଶ ଫଳ ସେଓକୁ ଗାଁ ମାଟିରେ ଫଳାଇ ପାରିଛନ୍ତି, ଯାହାକି ଚାଷୀଙ୍କ ମନରେ ନୂଆ ଆଶା ସଞ୍ଚାର କରିଛି। ତାଙ୍କର ଚାଷ ପ୍ରତି ଭଲ ପାଇବା ହିଁ ତାଙ୍କୁ ଏହି ସଫଳତା ଦେଇଛି । ସେ ରାଜକନିକା ଭଳି ଉପକୂଳ ମାଟିରେ ଫଳାଇଛନ୍ତି ବିଦେଶୀ ସେଓ, କିଏ ଥାଇଲାଣ୍ଡ ଆପଲ ତଃ କିଏ ପୁଣି ବେରୀଫ୍ରୁଟ୍ ନାମରେ ନାମିତ କରୁଛନ୍ତି। ପୁଣି କେହି କେହି ବିଦେଶୀ କୋଳି ବୋଲି ମଧ୍ୟ ନାମାଙ୍କନ କରୁଛନ୍ତି। ଏହା ଅତ୍ୟନ୍ତ ମିଠା, ସୁସ୍ବାଦୁ। ଲମ୍ବା ସାଇଜ ଆକାରରେ ଫଳୁଥିବା ଏହି ଫଳର ରଙ୍ଗ ଲାଲ-ଈଷତ ସବୁଜ। ବିଦେଶୀ ଫଳକୁ ଦେଖିବାକୁ ନିଇତି ତାଙ୍କ ବାଡିରେ ଭିଡ଼ ପରିଲକ୍ଷିତ ହେଉଛି। ଏହି ଫଳ ଚାଷ କରି ଦାଶ ଜିଲାରେ ସୁକ୍ଷାତି ଅର୍ଜନ କରିପାରିଛନ୍ତି। ପନିପରିବା ଚାଷ ସାଙ୍ଗକୁ ଧାନ ଚାଷ କରି ପରିବାର ପ୍ରତିପୋଷଣ କରିଥାନ୍ତି। ଏହି ନୂଆ ପ୍ରଜାତିର ଫଳ ଭାରତର କଶ୍ମୀର ଓ ବିଦେଶ (ଥାଇଲାଣ୍ଡ)ରେ ମୁଖ୍ୟତଃ ବେରୀ ପ୍ରଜାତିର ଚାଷ ହୋଇଥାଏ। ୟୁଟ୍ୟୁବ୍ରେ ଏହି ଚାଷ ସମ୍ବନ୍ଧରେ ଜାଣି ଆପଲ ଚାଷ ପାଇଁ ସେ ମନ ବଳାଇଥିଲେ। ପଶ୍ଚିମବଙ୍ଗ ମୁର୍ଶିଦାବାଦର ଜଣେ ଚାଷୀଙ୍କ ସହଯୋଗରେ ସେ ଏହି ଚାଷ ରାଜକନିକାରେ ପ୍ରଥମଥର ପାଇଁ ଚାଷ କରିଛନ୍ତି। ପରୀକ୍ଷା ସ୍ବରୂପ ୨୦୨୩ ଜାନୁଆରୀରେ ନିଜର ୫୦ ଡେସିମିଲ ଜମିରେ ମାତ୍ର ୨ ଶହ ଗଛ ଲଗାଇଥିଲେ। ଗଛଟି ଦେଶୀ କୋଳି ଗଛ ପରି ଦେଖାଯାଉଛି। ଗଛରେ ସେଓ ଖୁବ୍ ସୁନ୍ଦର ମନୋରମ ହୋଇଛି। କେହି କେହି ମୋବାଇଲରେ ସେଲ୍ଫି ବି ନେଉଛନ୍ତି। ତାଙ୍କର କହିବା କଥା, ମାଟିର ଉର୍ବରତା ଏତେ ଅଛି ଫଳରେ ଭର୍ତ୍ତି ଯୋଗୁ ଗଛର ପତ୍ର ଦେଖାଯାଉନାହିଁ। ଗଛଗୁଡ଼ିକ ଓହଳି ପଡୁଥିବାରୁ ବାଉଁଶ ଢିରା ସାହାଯ୍ୟରେ ସଳଖ ରଖାଯାଇଛି। ଗଛ ଲାଗିବାଠାରୁ ବର୍ଷେ ଅନ୍ତରାଳରେ ଫଳ ଅମଳ ହେବାକୁ ଥିବାବେଳେ ନିଜ ଗାଁ ସମେତ ଆଖପାଖ ଗାଁର ଲୋକମାନେ ଏହି ସୁସ୍ବାଦୁ ଫଳ କିଣି କରି ଖାଉଛନ୍ତି। ଏପର୍ଯ୍ୟନ୍ତ ପାଖାପାଖି ୫୦ କିଲୋରୁ ଅଧିକ ଫଳ ବିକ୍ରି ହୋଇଥିବା ସେ କହିଛନ୍ତି। ବଜାରର ଚାହିଦା ଅନୁଯାୟୀ ସେଓ ମୂଲ୍ୟ ଅନୁସାରେ ବିକ୍ରି ହେଉଛି। ପ୍ରଥମ ବର୍ଷରେ ଗଛ ପିଛା ୨୦ କିଲୋରୁ ଊର୍ଦ୍ଧ୍ୱ ଫଳ ଫଳିବାକୁ ଆଶା ରଖିଥିବା ବେଳେ, ଦ୍ୱିତୀୟ ବର୍ଷରେ ଗଛ ପିଛା ୬୦ରୁ ୮୦ କିଲୋ ପର୍ଯ୍ୟନ୍ତ ଫଳ ଫଳିବା ନେଇ ଆଶାବାଦୀ ଅଛି। ତେବେ ପନିପରିବା ଓ ଧାନ ଚାଷଠାରୁ ଏହି ଫଳ ଚାଷ ପରିଶ୍ରମ ତୁଳନାରେ କମ୍ ଏବଂ ଅପେକ୍ଷାକୃତ ଅଧିକ ଲାଭଜନକ ଚାଷ ହୋଇପାରିବ ବୋଲି ସେ କହିଥିଲେ। ବହୁ ଘାତ ପ୍ରତିଘାତକୁ ସାମ୍ନା କରି ଚ୍ୟାଲେଞ୍ଜ ଭାବେ ନେଇଥିବା ଏହି ଚାଷ ତାଙ୍କୁ ସ୍ବାବଲମ୍ବୀ କରିବା ସହ ସଫଳ ଚାଷୀର ମାନ୍ୟତା ଦେଇପାରିଛି। ସେଥିପାଇଁ ସେ ଖୁବ୍ ଆନନ୍ଦିତ। ସେ ଅନ୍ୟମାନଙ୍କ ପାଇଁ ଉଦାହରଣ ପାଲଟିଛନ୍ତି। ଆଗାମୀ ବର୍ଷ ଅଧିକରୁ ଅଧିକ ଚାଷ କରିବାକୁ ମନ ବଳାଇଛନ୍ତି। ଯଦି ଏହି ଚାଷ ପାଇଁ ସରକାରୀ ପ୍ରୋତ୍ସାହନ ମିଳିପାରନ୍ତା, ତେବେ ଚାଷୀମାନେ ଲାଭାନ୍ବିତ ହୋଇପାରନ୍ତେ। ଏହି ଫଳ ଚାଷକରି ଆତ୍ମସନ୍ତୋଷ ଲାଭ କରିଛି ବୋଲି ଦାଶ କହିଛନ୍ତି।