ଭୁବନେଶ୍ୱର,୨୪।୭ (ସୁନିତ୍ ମିଶ୍ର):: ସ୍ବାମୀ ଲକ୍ଷ୍ମଣାନନ୍ଦ ସରସ୍ବତୀ ହତ୍ୟାକାଣ୍ଡ ଏବଂ ସମ୍ ହସ୍ପିଟାଲ ଅଗ୍ନିକାଣ୍ଡ ସମ୍ପର୍କିତ ତଦନ୍ତ ରିପୋର୍ଟ ମୁଖ୍ୟମନ୍ତ୍ରୀଙ୍କ କାର୍ଯ୍ୟାଳୟରୁ ଚୋରି ଘଟଣାକୁ ନେଇ ଜଣକ ପରେ ଜଣଙ୍କୁ ରାଜ୍ୟ ସରକାର ନୋଟିସ ଜାରି କରିବାରେ ଲାଗିଛନ୍ତି। ଏହି ଘଟଣାରେ କ୍ୟାପିଟାଲ ଥାନାରେ ଗୃହ ବିଭାଗ ପକ୍ଷରୁ ଏକ ମାମଲା ରୁଜୁ କରାଯାଇଛି। ସେହି ମାମଲାରେ ବର୍ତ୍ତମାନ ସୁଦ୍ଧା ୪ ଜଣ ପୂର୍ବତନ ଆଇଏଏସ୍ ଅଫିସରଙ୍କୁ ହାଜର ହୋଇ ତଦନ୍ତରେ ସହଯୋଗ କରିବାକୁ କ୍ୟାପିଟାଲ ଥାନା ପୋଲିସ ନୋଟିସ ଦେଇସାରିଲାଣି। ଉକ୍ତ ଘଟଣାରେ ପୂର୍ବତନ ଆଇଏଏସ୍ ଅଫିସର ଉପେନ୍ଦ୍ର ନାଥ ବେହେରାଙ୍କୁ ଗୁରୁବାର ନୋଟିସ ଦିଆଯାଇଛି। ଆସନ୍ତା ୨୬ ତାରିଖ ପୂର୍ବାହ୍ନ ୧୧ଟା ସମୟରେ କ୍ୟାପିଟାଲ ଥାନାରେ ପହଞ୍ଚି ଜୋନ୍-୧ ଏସିପିଙ୍କୁ ଭେଟିବାକୁ ତାଙ୍କୁ ତଦନ୍ତକାରୀ ଅଧିକାରୀ ବିପିନ ବିହାରୀ ହୋତାଙ୍କ ଦସ୍ତଖତରେ ଦିଆଯାଇଥିବା ଚିଠିରେ ଉଲ୍ଲେଖ କରାଯାଇଛି। ଏହି ଘଟଣା ସମ୍ପର୍କିତ କୌଣସି ଡକ୍ୟୁମେଣ୍ଟ, ରେକର୍ଡ, ଇଲେକ୍ଟ୍ରୋନିକ୍ସ ଡିଭାଇସ୍ କିମ୍ବା ଅନ୍ୟ କୌଣସି ବିଷୟ ସହ ଜଡ଼ିତ ତଥ୍ୟ ପ୍ରମାଣ ଥିଲେ ସାଙ୍ଗରେ ଆଣି ଆସିବାକୁ କୁହାଯାଇଛି। ୨୮ ନଭେମ୍ବର ୨୦୧୫ରୁ ୧୬ ଜାନୁଆରୀ ୨୦୧୭ ପର୍ଯ୍ୟନ୍ତ ସେ ତତ୍କାଳୀନ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ କାର୍ଯ୍ୟାଳୟରେ ମୁଖ୍ୟମନ୍ତ୍ରୀଙ୍କ ଅତିରିକ୍ତ ମୁଖ୍ୟ ସଚିବ ଭାବେ ସେ କାର୍ଯ୍ୟ କରୁଥିଲେ। ସୂଚନାଯୋଗ୍ୟ, ଏହି ସମୟ ଭିତରେ ଏ.ଏସ୍. ନାଇଡୁ କନ୍ଧମାଳ ଦଙ୍ଗା ଏବଂ ସ୍ବାମୀ ଲକ୍ଷ୍ମଣାନନ୍ଦ ସରସ୍ବତୀ ହତ୍ୟା ଘଟଣାର ତଦନ୍ତକରି ୧୫୦୦ ପୃଷ୍ଠାର ଏକ ରିପୋର୍ଟ ପ୍ରସ୍ତୁତକରି ସରକାରଙ୍କୁ ପ୍ରଦାନ କରିଥିଲେ। ସେହି ଫାଇଲ ସେସମୟରେ ଗୃହ ବିଭାଗରୁ ମୁଖ୍ୟମନ୍ତ୍ରୀଙ୍କ କାର୍ଯ୍ୟାଳୟକୁ ଆସିଥିଲା। ଯେଉଁମାନେ ମୁଖ୍ୟମନ୍ତ୍ରୀଙ୍କ କାର୍ଯ୍ୟାଳୟରେ ସେହି ସମୟରେ ଫାଇଲ୍ ରିସିଭ କରିଥିଲେ, ସେମାନଙ୍କୁ ଏବେ ତଦନ୍ତ ପରିସରଭୁକ୍ତ କରାଯାଉଛି। ସେହିପରି ପୂର୍ବତନ ଆଇଏଏସ୍ ଅଫିସର ରାଜେଶ ବର୍ମାଙ୍କୁ ଉକ୍ତ ଘଟଣାରେ ୨୨ ତାରିଖ ପୂର୍ବାହ୍ନ ୧୧ ସୁଦ୍ଧା କ୍ୟାପିଟାଲ ଥାନାରେ ହାଜରହେବାକୁ ନିର୍ଦ୍ଦେଶ ଦିଆଯାଇଥିବା ବେଳେ ସେ ତାହା ମାନିନାହାନ୍ତି। ନିର୍ଦ୍ଧାରିତ ସମୟ ଭିତରେ ସେ ନ ଆସିବା ପରେ ଗୁରୁବାର ପୁନର୍ବାର ତାଙ୍କୁ ଆସନ୍ତା ୩୦ ତାରିଖ ପୂର୍ବାହ୍ନ ୧୧ ସୁଦ୍ଧା ଜୋନ୍-୧ ଏସିପିଙ୍କ ନିକଟରେ ହାଜରହେବାକୁ ଦ୍ୱିତୀୟ ଥର ପାଇଁ ନୋଟିସ ଜାରି କରାଯାଇଛି। ଉଲ୍ଲେଖଯୋଗ୍ୟ, ଏହି ଘଟଣାରେ ବୁଧବାର ପୂର୍ବତନ ଆଇଏଏସ୍ ଅଫିସର ଭି.କେ. ପାଣ୍ଡିଆନ୍ଙ୍କୁ ୨୫ ତାରିଖରେ ଥାନାରେ ହାଜରହେବା ପାଇଁ ନୋଟିସ ଦିଆଯାଇଥିଲା। ଏହି ଘଟଣାରେ ହାଜର ହେବା ଲାଗି ନୋଟିସ ପାଇଥିବା ପୂର୍ବତନ ଆଇଏଏସ୍ ଅଫିସର ମନୋଜ ମିଶ୍ର ଗତ ୧୮ ତାରିଖରେ ଥାନାକୁ ଯାଇ ତଦନ୍ତରେ ସହଯୋଗ କରିଛନ୍ତି।
