ଅନୁଗୋଳ ଅଫିସ, ୨୧ା୧: ଯାଯାବର, ମନ ମୋର.., ଏକ୍ ହୋ ଗୟେ ହମ୍ ଔର ତୁମ୍.., ଟିକ୍ ଟିକ୍ ହୁଏ ମୋ ଛାତି.., କମଲି କମଲି..। ଓଲିଉଡ୍ କଣ୍ଠଶିଳ୍ପୀଙ୍କ କଣ୍ଠରୁ ଝରିପଡ଼ିଥିବା ଏହିସବୁ ଚିର ସବୁଜ ଗୀତ ଶୁକ୍ରବାର ଅନୁଗୋଳ ଷ୍ଟାଡିୟମରେ ସୃଷ୍ଟି କରିଥିଲା ଭିନ୍ନ ପରିବେଶ। ଶୀତ କାକର ରାତିକୁ ଭରିଦେଇଥିଲା ଉଷ୍ମତାରେ। ଭିଜାଇ ଦେଇଥିଲା ଦର୍ଶକଙ୍କ ମନ ଓ ଦୃଦୟକୁ।
ଅନୁଗୋଳ ଜିଲା ମହୋତ୍ସବର ତୃତୀୟ ସନ୍ଧ୍ୟା ଆରମ୍ଭ ହୋଇଥିଲା ପାରମ୍ପରିକ ଲୋକକଳାରୁ। ପ୍ରସନ୍ନ ମହାପାତ୍ରଙ୍କ ନେତୃତ୍ୱରେ ପାଲଲହଡାର କଳାକାରମାନେ ପରିବେଷଣ କରିଥିଲେ ଡାଲଖାଇ ନୃତ୍ୟ। ଏହାପରେ ମୁଣ୍ଡା ସମ୍ପ୍ରଦାୟର କଳାକାରମାନେ ହୋ ନୃତ୍ୟ ପରିବେଷଣ କରିଥିଲେ। ଯୁଗେଶ୍ବର ହେସାଙ୍କ ନେତୃତ୍ୱରେ କଳାକାରମାନେ ନମାଘ ପର୍ବର ନୃତ୍ୟ ପ୍ରଦର୍ଶନ କରିଥିଲେ। ପାଲଲହଡା ବ୍ଲକ କଳା ସଂସ୍କୃତି ସଂଘ ଉପସଭାପତି ଧ୍ରୁବ ଚରଣ ସାହୁଙ୍କ ନେତୃତ୍ୱରେ ଆସିଥିବା ଏହି କଳାକାରମାନେ ସେମାନଙ୍କ ନୃତ୍ୟକଳାରେ ଦର୍ଶକଙ୍କୁ ବାନ୍ଧି ରଖିଥିଲେ। ଏହାପରେ ମଞ୍ଚକୁ ଆସିଥିଲେ ଓଲିଉଡ୍ର ଚର୍ଚ୍ଚିତ କଣ୍ଠଶିଳ୍ପୀ ଗୌତମ ଗିରି। ଓଡ଼ିଆ ସିନେମାର କାଳଜୟୀ ଗୀତ ଯା ଯା ବର ମନ ମୋର..ରୁ ସେ ଆରମ୍ଭ କରିଥିଲେ ସଙ୍ଗୀତ ପରିବେଷଣ। ଏହାପରେ ସେ ଶୁଣାଇଥିଲେ ଅନେକ ଚିର ସବୁଜ ଗୀତ। କେବଳ ଗୌତମ ନୁହନ୍ତି ଓଲିଉଡ୍ର ଅନ୍ୟତମ ଗାୟିକା ଭାଗ୍ୟଶ୍ରୀ ମଧ୍ୟ ଦର୍ଶକଙ୍କୁ ମନ୍ତ୍ରମୁଗ୍ଧ କରିଦେଇଥିଲେ। ତାଙ୍କ କଣ୍ଠରୁ ଝରିପଡ଼ିଥିଲା ଟିକ୍ ଟିକ୍ ହୁଏମୋ ଛାତି କିଏ ସେ ଭରିଛି ମୋ ଦେହେ ତାତି.., କମିଲି କମଲି… ଆଦି ସଙ୍ଗୀତ। ସେହିପରି ଓଲିଉଡ୍ ମେଲୋଡି କୁଇନ ମନସ୍ବିନୀ ହାମେ ତୋ ଲୁଟ୍ ଲିୟା ଇସ୍କ ବାଲୋନେ.., ଆଜ୍ ବ୍ଲୁ ହେ ପାନି ପାନି.. ଆଦି ସଙ୍ଗୀତ ପରିବେଷଣ କରିବା ବେଳେ ପୂରା ଷ୍ଟାଡିୟମ ଯେପରି ନାଚି ଉଠିଥିଲା। ଏହାପରେ ମଞ୍ଚକୁ ଆସିଥିଲେ ମୁଖ୍ୟ ଆକର୍ଷଣ ବଲିଉଡ କଣ୍ଠଶିଳ୍ପୀ ରାଜ୍ ବର୍ମାନ।
ତୁ ମିଲ ତା ମୁଝେ.., ମେରେ ଡୋଲ ଜୁଦାଇଁ କି.., ତୁମ ଯୋ ମିଲା ମେ ହୋ ଗୟା କାବିଲ.. ଆଦି ଗୀତରେ ଦର୍ଶକଙ୍କୁ ଝୁମାଇ ଦେଇଥିଲେ। ମଞ୍ଚରେ ଜୟ ଜଗନ୍ନାଥ କହିବା ସହ ସେଲ୍ଫି ମଧ୍ୟ ନେଇଥିଲେ। ତୃତୀୟ ସନ୍ଧ୍ୟାର ଶେଷ କଳାକାର ଭାବେ ବଲିଉଡ୍ ରାପର୍ ଆର୍ ସି ଆର୍ ଷ୍ଟେଜ ଉପରକୁ ଆସିବା ସହ ନିଜ ରାପ୍ ସଙ୍ଗୀତରେ ଦର୍ଶକଙ୍କୁ ମତୁଆଲା କରିଦେଇଥିଲେ। ବିଳମ୍ବିତ ରାତିଯାଏ ଚାଲିଥିବା ଏହି କାର୍ଯ୍ୟକ୍ରମକୁ ସହସ୍ରାଧିକ ଦର୍ଶକ ମନଭରି ଉପଭୋଗ କରିଥିଲେ।
