ନୂଆଦିଲ୍ଲୀ,୨୩।୫: ଭାରତ ଏବଂ ପାକିସ୍ତାନ ମଧ୍ୟରେ ଲାଗି ରହିଥିବା ଉତ୍ତେଜନା ପରେ ଅନେକ କଟକଣା ଲାଗୁ କରାଯାଇଛି। ଏବେ ପାକିସ୍ତାନୀ ବିମାନର ଏଣ୍ଟ୍ରିକୁ ୨୦୨୫ ଜୁନ ୨୩ ପର୍ଯ୍ୟନ୍ତ ସମ୍ପୂର୍ଣ୍ଣ ନିଷେଧ କରାଯାଇଛି। ବେସାମରିକ ବିମାନ ଚଳାଚଳ ମନ୍ତ୍ରଣାଳୟର ନିର୍ଦ୍ଦେଶକ୍ରମେ, NOTAMକୁ ଆଉ ଗୋଟିଏ ମାସ ପାଇଁ ବୃଦ୍ଧି କରାଯାଇଛି। ଏହାର ଅର୍ଥ ହେଉଛି ପରବର୍ତ୍ତୀ ନିର୍ଦ୍ଦେଶ ପର୍ଯ୍ୟନ୍ତ ପାକିସ୍ତାନର କୌଣସି ପ୍ରକାରର ବିମାନ ଭାରତୀୟ ବାୟୁସୀମା ମଧ୍ୟରେ ପ୍ରବେଶ କରିପାରିବ ନାହିଁ। ଏଥିରେ ବେସାମରିକ, ସାମରିକ ଏବଂ ଚାର୍ଟର୍ଡ ବିମାନ ମଧ୍ୟ ଅନ୍ତର୍ଭୁକ୍ତ।
କଶ୍ମୀରର ପହଲଗାମ ଆତଙ୍କବାଦୀ ଆକ୍ରମଣ ପରେ, ଭାରତ ପାକିସ୍ତାନ ଉପରେ ଅନେକ କଟକଣା ଲଗାଇଥିଲା। ସିନ୍ଧୁ ନଦୀ ଜଳ ଅବରୋଧ ଏବଂ ଅନ୍ୟାନ୍ୟ କଟକଣା ପରେ, ପାକିସ୍ତାନ ଭାରତୀୟ ବିମାନକୁ ’ପାକ’ ଏୟାରସ୍ପେସ ବ୍ୟବହାର କରିବାକୁ ବାରଣ କରିଥିଲା। ତେଣୁ ଭାରତ ପାକିସ୍ତାନକୁ ତାର ଏୟାରସ୍ପେସ ବନ୍ଦ କରିବା ପାଇଁ ସମୟ ସୀମା ଜୁନ ୨୩ ପର୍ଯ୍ୟନ୍ତ ବୃଦ୍ଧି କରି ପ୍ରତିଶୋଧ ନେଇଛି। ବେସାମରିକ ବିମାନ ଚଳାଚଳ ମନ୍ତ୍ରଣାଳୟ ଏ ସମ୍ପର୍କରେ NOTAM ଜାରି କରିଛି। NOTAM ଅନୁଯାୟୀ, ପାକିସ୍ତାନରେ ପଞ୍ଜିକୃତ ଯେକୌଣସି ପ୍ରକାରର ବିମାନ ପାଇଁ ଭାରତୀୟ ଆକାଶ ସୀମା ବନ୍ଦ ରହିବ।
ଦିଲ୍ଲୀରୁ ଶ୍ରୀନଗର ଯାଉଥିବା ଇଣ୍ଡିଗୋ ବିମାନର କ୍ରୁ ସଦସ୍ୟମାନେ ଖରାପ ପାଗ ଏଡାଇବା ପାଇଁ ବୁଧବାର ପାକିସ୍ତାନ ଏୟାରସ୍ପେସରେ ପ୍ରବେଶ କରିବାକୁ ଅନୁରୋଧ କରିଥିଲେ। ଏହାକୁ ପାକିସ୍ତାନ ପ୍ରତ୍ୟାଖ୍ୟାନ କରିଥିଲା। ଇଣ୍ଡିଗୋର ’A୩୨୧ ନିଓ’ ବିମାନ ଉଡ଼ାଣ ନମ୍ବର ’୬E ୨୧୪୨’ ପଠାଣକୋଟ ନିକଟରେ କୁଆପଥର ବର୍ଷା ଏବଂ ପ୍ରବଳ ଖରାପ ପାଗର ସମ୍ମୁଖୀନ ହୋଇଥିଲା। ଡିଜିସିଏ କହିଛି ଯେ ଖରାପ ପାଗ ଏଡାଇବା ପାଇଁ କ୍ରୁ ପାକିସ୍ତାନୀ ବାୟୁସୀମାରେ ପ୍ରବେଶ କରିବାକୁ ଲାହୋର ନିକଟକୁ ଆସିଥିଲେ, କିନ୍ତୁ ତାହା ମଧ୍ୟ ପ୍ରତ୍ୟାଖ୍ୟାନ କରାଯାଇଥିଲା। ତେଣୁ, ଖରାପ ପାଗ ଏଡାଇବା ପାଇଁ କ୍ରୁ ଶ୍ରୀନଗର ଅଭିମୁଖେ ସବୁଠାରୁ ଛୋଟ ରାସ୍ତା ଦେଇ ସମାନ ଦିଗରେ ଯିବାକୁ ନିଷ୍ପତ୍ତି ନେଇଥିଲେ।
