ଭବାନୀପାଟଣା,୯।୩(ସ୍ବ.ପ୍ର.): କଳାହାଣ୍ଡି ଜିଲା ଦକ୍ଷିଣ ବନଖଣ୍ଡ ଅଧୀନ କର୍ଲାପାଟ ଅଭୟାରଣ୍ୟରେ ପୁଣି ଏକ ହାତୀ ମୃତ୍ୟୁ ଘଟଣା ସାମ୍ନାକୁ ଆସିଛି। ଯାକମରୁ ୧୦୦ ମିଟର କୁକୁରଘାଟିର ସେମିଝରନଠାରେ ହାତୀର ମୃତ୍ୟୁ ଘଟିଛି। ଏହି ଘଟଣା ଗତ ୪ ତାରିଖରେ ଘଟିଥିବା ଜଣାଯାଇଛି। ଦୁର୍ଗନ୍ଧ ଦେବା ପରେ ବନ ବିଭାଗ ଖବର ପାଇ ରାତାରାତି ହାତୀର ବ୍ୟବଚ୍ଛେଦ କରି ପୋତି ଦେଇଥିବା ଜଣାପଡିଛି। ଫଳରେ ବନ ବିଭାଗ ଘଟଣାକୁ ଚାପି ଦେବାକୁ ଚେଷ୍ଟା କରୁଥିବା ସାଧାରଣରେ ଚର୍ଚ୍ଚା ହେଉଛି। ଯଦି କୌଣସି କାରଣରୁ ହାତୀ ମୃତ୍ୟୁ ହେଲା ବିଭାଗ ଏହାର ସୂଚନା ନ ଦେବା ସାଧାରଣରେ ଚର୍ଚ୍ଚାର ବିଷୟ ପାଲଟିଛି।
ଏ ସମ୍ପର୍କରେ ବିଭାଗୀୟ ଜଣେ ଅଧିକାରୀଙ୍କୁ ଫୋନରେ ଯୋଗାଯୋଗ ପରେ ହାତୀ ମୃତ୍ୟୁ ହୋଇଥିବା ସେ କହିଛନ୍ତି। ହାତୀର କିଭଳି ମୃତ୍ୟୁ ଘଟିଲା, କେଉଁ କାରଣରୁ ମୃତ୍ୟୁ ହେଲା ସ୍ପଷ୍ଟ ହୋଇ ନ ଥିବାବେଳେ ଦୋଷ ଲୁଚାଇବାକୁ ଯାଇ ରାତିରାତି ପୋତି ଦେବା ଘଟଣା ତଦନ୍ତ ସାପେକ୍ଷ ବୋଲି ସ୍ଥାନୀୟ ଲୋକେ ପ୍ରକାଶ କରିଛନ୍ତି।
ସୂଚନାଯୋଗ୍ୟ, ଗତବର୍ଷ କର୍ଲାପାଟ ଅଭୟାରଣ୍ୟରେ ୭ଟି ହାତୀର ମୃତ୍ୟୁ ହୋଇଥିଲା। ଏଥିରେ ମାଈ ଓ ଗୋଟିଏ ଛୋଟ ଛୁଆ ହାତୀ ରହିଥିଲା। ଏହାକୁ ନେଇ ସେତେବେଳେ ରାଜ୍ୟ ବ୍ୟାପି ଚର୍ଚ୍ଚା ହୋଇଥିଲା।
