ଓ୍ବାଶିଂଟନ୍,୨୩।୩: ଡୋନାଲ୍ଡ ଟ୍ରମ୍ପ ପ୍ରଶାସନ ଆମେରିକାରେ ପ୍ରବାସ ନୀତି ସମ୍ପର୍କରେ ଏକ ବଡ଼ ପଦକ୍ଷେପ ନେଇଛି। କ୍ୟୁବା, ହାଇତି, ନିକାରାଗୁଆ ଏବଂ ଭେନେଜୁଏଲାରୁ ଆସିଥିବା ୫୩୦,୦୦୦ ପ୍ରବାସୀଙ୍କୁ ଆଇନଗତ ସୁରକ୍ଷା ପ୍ରତ୍ୟାହାର କରିଛି। ଏହି ନିଷ୍ପତ୍ତି ପରେ, ଏହି ପ୍ରବାସୀମାନଙ୍କୁ ପ୍ରାୟ ଗୋଟିଏ ମାସ ମଧ୍ୟରେ ଆମେରିକା ଛାଡ଼ିବାକୁ ପଡ଼ିପାରେ।
ଗୃହ ସୁରକ୍ଷା ବିଭାଗ ଘୋଷଣା କରିଛି ଯେ ଏହି ଦେଶଗୁଡ଼ିକର ପ୍ରବାସୀ ଯେଉଁମାନେ ଅକ୍ଟୋବର ୨୦୨୨ରେ ଆର୍ଥିକ ପ୍ରାୟୋଜକଙ୍କ ସହିତ ଆମେରିକାରେ ପ୍ରବେଶ କରିଥିଲେ, ସେମାନଙ୍କର ପାରୋଲ ସ୍ଥିତି ବର୍ତ୍ତମାନ ସମାପ୍ତ ହୋଇଯିବ। ଏହି ପ୍ରବାସୀମାନଙ୍କୁ ଆମେରିକାରେ ରହିବା ଏବଂ କାମ କରିବା ପାଇଁ ଦୁଇ ବର୍ଷର ପରମିଟ ଦିଆଯାଇଥିଲା, ଯାହାର ମିଆଦ ଏବେ ଶେଷ ହୋଇଯାଇଛି। ଏହି ପଦକ୍ଷେପ ଟ୍ରମ୍ପ ପ୍ରଶାସନର ଅବୈଧ ପ୍ରବାସୀ ବିରୋଧରେ ବର୍ଦ୍ଧିତ କାର୍ଯ୍ୟାନୁଷ୍ଠାନର ଏକ ଅଂଶ।
ମାନବିକ ପାରୋଲ ବ୍ୟବସ୍ଥା ଏକ ଆଇନଗତ ବ୍ୟବସ୍ଥା, ଯାହା ଯୁଦ୍ଧ କିମ୍ବା ରାଜନୈତିକ ଅସ୍ଥିରତା ଅନୁଭବ କରୁଥିବା ଦେଶଗୁଡ଼ିକର ଲୋକମାନଙ୍କୁ ଅସ୍ଥାୟୀ ଭାବରେ ଯୁକ୍ତରାଷ୍ଟ୍ରରେ ପ୍ରବେଶ ଏବଂ ବାସ କରିବାକୁ ଅନୁମତି ଦେବା ପାଇଁ ବ୍ୟବହୃତ ହୋଇଛି। ଏହି ବ୍ୟବସ୍ଥା ଅନୁଯାୟୀ, ପୂର୍ବତନ ରାଷ୍ଟ୍ରପତି ଜୋ ବାଇଡେନଙ୍କ କାର୍ଯ୍ୟକାଳ ସମୟରେ କ୍ୟୁବା, ହାଇତି, ନିକାରାଗୁଆ ଏବଂ ଭେନେଜୁଏଲାର ଲୋକମାନଙ୍କୁ ଆମେରିକାରେ ପ୍ରବେଶ କରିବାକୁ ଅନୁମତି ଦିଆଯାଇଥିଲା। ଟ୍ରମ୍ପ ପ୍ରଶାସନ ଏହି ବ୍ୟବସ୍ଥାର ବ୍ୟାପକ ଅପବ୍ୟବହାର ହେଉଥିବା ଅଭିଯୋଗ କରିଛି ଏବଂ ତେଣୁ ଏହାକୁ ସମାପ୍ତ କରିବାକୁ ନିଷ୍ପତ୍ତି ନିଆଯାଇଛି। ଏହା ଅଧୀନରେ, ୨୪ ଏପ୍ରିଲ ପରେ ଲୋକଙ୍କୁ ଆମେରିକା ଛାଡିବାକୁ କୁହାଯାଇଛି। ଏହା ଯୋଗୁ ବହୁ ସଂଖ୍ୟକ ଲୋକଙ୍କୁ ନିର୍ବାସନର ସମ୍ମୁଖୀନ ହେବାକୁ ପଡ଼ିପାରେ।
ସୂଚନାଯୋଗ୍ୟ, ଅବୈଧ ପ୍ରବାସୀମାନଙ୍କ ବିରୁଦ୍ଧରେ ଟ୍ରମ୍ପ ପ୍ରଶାସନର କଠୋର ଆଭିମୁଖ୍ୟ ଯୋଗୁ, ଏପର୍ଯ୍ୟନ୍ତ ରେକର୍ଡ ସଂଖ୍ୟକ ଅବୈଧ ପ୍ରବାସୀଙ୍କୁ ଆମେରିକାରୁ ନିର୍ବାସିତ କରାଯାଇଛି। ଟ୍ରମ୍ପ ପ୍ରଶାସନ କହିଛି, ବାଇଡେନ ପ୍ରଶାସନ ଦ୍ୱାରା ଆରମ୍ଭ ହୋଇଥିବା ପାରୋଲ କାର୍ଯ୍ୟକ୍ରମ ଆଇନଗତ ସୀମା ବାହାରକୁ ଥିଲା, ତେଣୁ ଜାନୁଆରୀ ୨୦୨୫ରେ ଏକ କାର୍ଯ୍ୟନିର୍ବାହୀ ନିର୍ଦ୍ଦେଶ ଜାରି କରି ଏହାକୁ ସମାପ୍ତ କରିବାକୁ ନିଷ୍ପତ୍ତି ନିଆଯାଇଥିଲା।
