ନ୍ୟୁୟର୍କ, ୧୪ା୩: ସିଲିକନ୍ ଭ୍ୟାଲି ବ୍ୟାଙ୍କ (ଏସ୍ଭିବି) ବନ୍ଦ ହେବାର ଦୁଇଦିନ ପରେ ନ୍ୟୁୟର୍କର ସିଗ୍ନେଚର ବ୍ୟାଙ୍କ ଡୁବିଛି। ଉଭୟ ବ୍ୟାଙ୍କର ଜମାକାରୀମାନେ ସେମାନଙ୍କ ଜମା ଅର୍ଥ ଯେପରି ଫେରିପାଇବେ, ସେ ଦିଗରେ ଆମେରକା କର୍ତ୍ତୃପକ୍ଷ ପଦକ୍ଷେପ ନେଉଛନ୍ତି। ସୋମବାରଠାରୁ ଏସ୍ଭିବି ଜମାକାରୀଙ୍କୁ ଅର୍ଥ ଫେରାଇବା ଆରମ୍ଭ ହୋଇଥିବା ଆମେରିକା ଟ୍ରେଜେରୀ ପକ୍ଷରୁ ଏକ ବିବୃତିରେ କୁହାଯାଇଛି।
ଆମେରିକାର ଫେଡେରାଲ ରିଜର୍ଭ କ୍ରମାଗତ ସୁଧହାର ବଢ଼ାଇବାରୁ ଏହାର ପ୍ରତ୍ୟକ୍ଷ ପ୍ରଭାବ ବ୍ୟାଙ୍କିଙ୍ଗ୍ ସେକ୍ଟରରେ ପଡ଼ିଛି। ବୃହତ୍ ଟେକ୍ନୋଲୋଜି କମ୍ପାନୀ ଓ ଷ୍ଟାଟ୍ଅପ୍ଗୁଡ଼ିକୁ ଋଣ ପ୍ରଦାନ କରିଆସୁଥିବା ଏସ୍ଭିବି ଡୁବିଯାଇଛି। ଏସ୍ଭିବିକୁ ଶୁକ୍ରବାର କାଲିଫର୍ନିଆ ବ୍ୟାଙ୍କିଙ୍ଗ୍ ରେଗୁଲେଟର୍ସ ବନ୍ଦ ଘୋଷଣା କରିଥିଲେ। ୨୦୦୮ର ବୈଶ୍ୱିକ ଆର୍ଥିକ ସଙ୍କଟ ପରେ ଏହାକୁ ରିଟେଲ ବ୍ୟାଙ୍କିଙ୍ଗ୍ କ୍ଷେତ୍ରରେ ସବୁଠୁ ବଡ଼ ବିପର୍ଯ୍ୟୟ ବୋଲି କୁହାଯାଉଛି। ସେହିପରି କ୍ରିପ୍ଟୋକରେନ୍ସି କାରବାରର ପ୍ରଘଟ ହେବା ପରେ ନ୍ୟୁୟର୍କର ଆଞ୍ଚଳିକ ଋଣପ୍ରଦାନକାରୀ ସିଗ୍ନେଚର ବ୍ୟାଙ୍କର ଷ୍ଟକ୍ ମୂଲ୍ୟ ହ୍ରାସ ପାଇଥିଲା। ଏହି ବ୍ୟାଙ୍କକୁ ରବିବାର ବନ୍ଦ କରିଦିଆଯାଇଛି। ତେବେ ଜମାକାରୀମାନେ ସମ୍ପୂର୍ଣ୍ଣ ଜମା ଅର୍ଥ ଫେରିପାଇବେ ବୋଲି ଆମେରିକା ଫେଡେରାଲ ରିଜର୍ଭ, ଫେଡେରାଲ ଡିପୋଜିଟ୍ ଇନ୍ସୁରାନ୍ସ କର୍ପୋରେଶନ ଏବଂ ଟ୍ରେଜେରି ପକ୍ଷରୁ ପ୍ରତିଶ୍ରୁତି ଦିଆଯାଇଛି।
