ନୂଆଦିଲ୍ଲୀ: ବିଳାସପୂର୍ଣ୍ଣ ଜୀବନ ବଞ୍ଚିବାଠାରୁ ବହୁ ଦୂରରେ ରହିଛି। ମୋ ଜୀବନ ଶୃଙ୍ଖଳିତ ଢଙ୍ଗରେ ଚାଲିଛି। ଦିନେ ୪୫ ହଜାର କୋଟି ସହ ବିଶ୍ୱର ଶ୍ରେଷ୍ଠ ୧୦ ଧନୀଙ୍କ ମଧ୍ୟରେ ସାମିଲ ଥିବା ଅନିଲ ଅମ୍ବାନୀ ଲଣ୍ଡନ କୋର୍ଟଙ୍କୁ ଏଭଳି ଉତ୍ତର ରଖିଛନ୍ତି। ବର୍ତ୍ତମାନ ତାଙ୍କ କମ୍ପାନୀ ରିଲାଏନ୍ସ କମ୍ୟୁନିକେଶନ ଦେବାଳିଆ ହୋଇଯାଇଥିବା ବେଳେ ସେ ବ୍ୟାଙ୍କଗୁଡ଼ିକର କରଜ ଶୁଝିବାକୁ ସକ୍ଷମ ହେଉନାହାନ୍ତି। ଚାଇନା ବ୍ୟାଙ୍କଗୁଡିକର ପ୍ରାୟ ୫ ହଜାର କୋଟି ଟଙ୍କାର ଋଣ ମାମଲା ଏବେ ଲଣ୍ଡନ କୋର୍ଟରେ ଚାଲିଛି। ଏହି ମାମଲାର ଶୁଣାଣି କରୁଥିବା ବିଚାରପତି କହିଥିଲେ ଯେ, ଅନିଲ ବିଳାସପୂର୍ଣ୍ଣ ଜୀବନ ବଞ୍ଚୁଛନ୍ତି। ଶନିବାର ସେ ନ୍ୟାୟାଳୟଙ୍କୁ ଉତ୍ତରରେ ଏଭଳି କହିଥିବା ଜଣାପଡିଛି।
ଭିଡିଓ ଲିଙ୍କ୍ ଯୋଗେ ଅନିଲ ଶୁଣାଣିରେ ଯୋଗ ଦେଇଥିଲେ। ତାଙ୍କ ନେଟ୍ଓ୍ବର୍ଥ ଜିରୋ ବୋଲି ସେ ପୂର୍ବରୁ କହିଥିଲେ। ଅନିଲ ଏସିଆର ସବୁଠାରୁ ଧନୀ ବ୍ୟକ୍ତି ମୁକେଶ ଅମ୍ବାନୀଙ୍କର ସାନଭାଇ। ଓକିଲ ଫି’ ଦେବା ତାଙ୍କ ଲାଗି ବର୍ତ୍ତମାନ କଷ୍ଟକର ହେଉଛି। ଗହଣା ବିକି ଓକିଲଙ୍କ ଫି’ ଦେଇଥିବା ଅନିଲ କହିଛନ୍ତି। ଆୟ ସମ୍ପୂର୍ଣ୍ଣ ଶୂନ ରହିଛି। ତାଙ୍କ ଖର୍ଚ୍ଚ ତାଙ୍କ ପରିବାର ଲୋକେ ଉଠାଉଛନ୍ତି। ବ୍ୟକ୍ତିଗତ ଆକାଉଣ୍ଟରେ ମାତ୍ର ୨୧ଲକ୍ଷ ଟଙ୍କା ପଡିଥିବା ସେ ସ୍ପଷ୍ଟ କରିଛନ୍ତି। ପାଖରେ ଗୋଟିଏ ମାତ୍ର କାର ରହିଛି। ତାଙ୍କ ମା’ଙ୍କର ଅନୀଲଙ୍କ ଉପରେ ୫୦୦ କୋଟି ଏବଂ ପୁଅର ୩୦୦ କୋଟି ଋଣ ରହିଥିବା ମଧ୍ୟ ସେ କହିଛନ୍ତି। ଅନୀଲଙ୍କ ବଡ଼ଭାଇ ମୁକେଶ ଅମ୍ବାନୀ ବିଶ୍ୱର ଶ୍ରେଷ୍ଠ ୧୦ଧନୀଙ୍କ ମଧ୍ୟରେ ରହିଛନ୍ତି। ରିଲାଏନ୍ସ ଗ୍ରୁପ୍ ପ୍ରତିଷ୍ଠାତା ଧୀରୁ ଭାଇ ଅମ୍ବାନୀଙ୍କ ମୃତ୍ୟୁ ପରେ ତାଙ୍କ ୨ ପୁଅ ଅନିଲ ଏବଂ ମୁକେଶଙ୍କ ମଧ୍ୟରେ ସମ୍ପତ୍ତି ବିବାଦ ଆରମ୍ଭ ହୋଇଥିଲା। ୨୦୦୫ରେ ସମ୍ପତ୍ତି ଭାଗବଣ୍ଟା ହୋଇଯାଇଥିଲା।
