କୋଲକାତା,୨୨।୫: ଆଇପିଏଲ୍ (IPL) ୨୦୨୬ରେ ପ୍ଲେ-ଅଫ୍ ଦୌଡ଼ରେ ରହିଥିବା କୋଲକାତା ନାଇଟ୍ ରାଇଡର୍ସ (KKR) ଦଳକୁ ଏକ ଶକ୍ତ ଧକ୍କା ଲାଗିଛି। ଦଳର ଶେଷ ଲିଗ୍ ମ୍ୟାଚ୍ ପୂର୍ବରୁ KKRର ଚଳିତ ସିଜନର ସବୁଠାରୁ ସଫଳ ତଥା ଯୁବ ବ୍ୟାଟ୍ସମ୍ୟାନ୍ ଅଙ୍ଗକୃଷ ରଘୁବଂଶୀ ଆହତ ଜନିତ ସମସ୍ୟା କାରଣରୁ ସମ୍ପୂର୍ଣ୍ଣ ସିଜନରୁ ବାଦ୍ ପଡ଼ିଛନ୍ତି। ଗତ ମ୍ୟାଚ୍ରେ କ୍ୟାଚ୍ ଧରିବା ବେଳେ ସେ ଗୁରୁତର ଭାବେ ଆହତ ହୋଇଥିଲେ। ତେବେ KKR ପକ୍ଷରୁ ଏପର୍ଯ୍ୟନ୍ତ ତାଙ୍କର କୌଣସି ବଦଳ ଖେଳାଳି (Replacement) ଘୋଷଣା କରାଯାଇ ନାହିଁ।
ଗତ ମେ’ ୨୦ ତାରିଖରେ ଇଡେନ ଗାର୍ଡେନ୍ସରେ ମୁମ୍ବାଇ ଇଣ୍ଡିଆନ୍ସ ବିପକ୍ଷ ମ୍ୟାଚ୍ ଚାଲିଥିବା ସମୟରେ ଅଙ୍ଗକୃଷ ରଘୁବଂଶୀ ଆହତ ହୋଇଥିଲେ। ବରୁଣ ଚକ୍ରବର୍ତ୍ତୀଙ୍କ ବଲ୍ରେ ଏକ ଲମ୍ବା ଜମ୍ପ ମାରି କ୍ୟାଚ୍ ଧରିବାକୁ ଚେଷ୍ଟା କରୁଥିବା ବେଳେ ତାଙ୍କ ବାମ ହାତ ଆଙ୍ଗୁଠିରେ ଆଘାତ ଲାଗିଥିଲା। ଏହାସହ ତାଙ୍କ ମୁଣ୍ଡ ତଳେ ବାଜିବାରୁ ବେକରେ ମଧ୍ୟ ପ୍ରବଳ ଯନ୍ତ୍ରଣା ହୋଇଥିଲା।
କୋଲକାତା ନାଇଟ୍ ରାଇଡର୍ସ ନିଜର ସୋସିଆଲ ମିଡିଆ ହ୍ୟାଣ୍ଡେଲ୍ରେ ଏକ ପୋଷ୍ଟ ସେୟାର କରି ଅଙ୍ଗକୃଷଙ୍କ ଆହତ ସମସ୍ୟା ଉପରେ ଅପଡେଟ୍ ଦେଇଛି। ଦଳ ପକ୍ଷରୁ କୁହାଯାଇଛି ଯେ, ଅଙ୍ଗକୃଷଙ୍କ ବାମ ହାତ ଆଙ୍ଗୁଠିରେ ଫ୍ରାକ୍ଚର (ଅସ୍ଥିଭଙ୍ଗ) ହୋଇଛି। KKR ଲେଖିଛି, “ମେ’ ୨୦ରେ ମୁମ୍ବାଇ ଇଣ୍ଡିଆନ୍ସ ବିପକ୍ଷ ମ୍ୟାଚ୍ରେ କ୍ୟାଚ୍ ନେବା ବେଳେ ବାମ ହାତ ଆଙ୍ଗୁଠିରେ ଫ୍ରାକ୍ଚର ହେବା କାରଣରୁ ଅଙ୍ଗକୃଷ ରଘୁବଂଶୀ ଆଇପିଏଲ୍ ୨୦୨୬ର ବାକି ସମସ୍ତ ମ୍ୟାଚ୍ରୁ ବାଦ୍ ପଡ଼ିଛନ୍ତି।”
ଅଙ୍ଗକୃଷ ରଘୁବଂଶୀଙ୍କ ପାଇଁ ଆଇପିଏଲ୍ ୨୦2୬ ସିଜନ ବେଶ୍ ସ୍ମରଣୀୟ ରହିଥିଲା। ସେ ଚଳିତ ସିଜନରେ KKR ପାଇଁ ସର୍ବାଧିକ ରନ୍ ସଂଗ୍ରହକାରୀ ବ୍ୟାଟ୍ସମ୍ୟାନ୍ ଥିଲେ। ସେ ୧୩ଟି ମ୍ୟାଚ୍ ଖେଳି ୪୨.୨୦ ହାରରେ ୫ଟି ଅର୍ଦ୍ଧଶତକ ସହ ମୋଟ ୪୨୨ ରନ୍ ସଂଗ୍ରହ କରିଥିଲେ। ପ୍ଲେ-ଅଫ୍ ଭଳି ଏକ ଗୁରୁତ୍ୱପୂର୍ଣ୍ଣ ସମୟରେ ଏଭଳି ଜଣେ ଫର୍ମରେ ଥିବା ବ୍ୟାଟ୍ସମ୍ୟାନ୍ ବାଦ୍ ପଡ଼ିବା କୋଲକାତା ଦଳ ପାଇଁ ଏକ ବଡ଼ ଅଭାବ ସୃଷ୍ଟି କରିବ।