ପଟାଙ୍ଗି,୮ା୭(ଶରତ କୁମାର ଧଳ): କୋରାପୁଟ ଜିଲା ପଟ୍ଟାଙ୍ଗି ବ୍ଲକ ଅଧୀନରେ ରହିଥିବା କୋଟିଆ ପଞ୍ଚାୟତର ସୀମାନ୍ତ ଗ୍ରାମଗୁଡିକରେ ପଡ଼ୋଶୀ ଆନ୍ଧ୍ର ପ୍ରଶାସନିକ ଅଧିକାରୀ ଓ କର୍ମଚାରୀ ଅନୁପ୍ରବେଶ କରି ନିଜ ସରକାରଙ୍କ କାର୍ଯ୍ୟ ସହ ଜନଗଣନା ଏବଂ SIR କାର୍ଯ୍ୟକ୍ରମର ସ୍ଥିତି ଅନୁଧ୍ୟାନ କରି ଫେରିଥିଲେ ମଧ୍ୟ ଓଡ଼ିଶାର ବ୍ଲକ ପ୍ରଶାସନ ନିକଟରେ ଖବର ଥାଇ ମଧ୍ୟ ଚୁପ ରହିବା ପ୍ରଶ୍ନ ସୃଷ୍ଟି କରିଛି।
ସୂଚନାନୁଯାୟୀ, ପଡ଼ୋଶୀ ଆନ୍ଧ୍ର ରାଜ୍ୟର ପାର୍ବତୀପୁରମ ମାନ୍ୟାମ ଜିଲା ଅଧିନରେ ରହିଥିବା ସାଲୁର ତହସିଲଦାର (ଏମ୍ଆର୍ଓ) ଏମ୍ ସୁରେଶ କୁମାର ଉପରସେମ୍ବି , ନେରିଡିବାଲସା, ତଳସେମ୍ବି , ତାଡିବାଲସା ପ୍ରମୁଖ ସୀମାନ୍ତ ଗ୍ରାମରେ ପହଞ୍ଚି ଗ୍ରାମବାସୀଙ୍କୁ ଏକାଠି କରି ଆନ୍ଧ୍ର ରାଜ୍ୟ ପକ୍ଷରୁ ହୋଇଥିବା ଜନଗଣନା ଏବଂ ଚାଲିଥିବା SIR ସର୍ଭେ କାର୍ଯ୍ୟକ୍ରମ ସମ୍ପର୍କରେ ପଚାରି ବୁଝିଥିଲେ । ଏହା ସହ ଉକ୍ତ ରାଜ୍ୟର ଡିଜିଟାଇଜେଶନ ସମ୍ପର୍କରେ ମଧ୍ୟ ପଚା ସ୍ଥିତି ପରଖି ଥିଲେ । ଏହି ସମୟରେ ଆନ୍ଧ୍ର ରାଜ୍ୟ ପକ୍ଷରୁ ନିୟୋଜିତ ହୋଇଥିବା ବିଏଲ୍ଓ , ବିଏଲ୍ଏ ଏବଂ ଅଙ୍ଗନବାଡ଼ି କର୍ମୀ ଘରକୁ ଘର ବୁଲି ତହସିଲଦାରଙ୍କ ଉପସ୍ଥିତରେ ଫର୍ମ ପୂରଣ କରି ଫର୍ମଗୁଡ଼ିକ ତହସିଲଦାରଙ୍କୁ ପ୍ରଦାନ କରିଥିଲେ। ଏହିପରି କି ତଳସେମ୍ବି ଓ ଉପରସେମ୍ବି ଗ୍ରାମର ୧ ନଂ ଭୋଟ୍ କେନ୍ଦ୍ରର ଏବଂ ନେରିଡିବାଲସା ଗ୍ରାମର ୪ ନଂ ଭୋଟ୍ କେନ୍ଦ୍ରରେ ପୂରଣ ହୋଇଥିବା ଜନଗଣନା ଫର୍ମ ସଂଗ୍ରହ କରିଥିଲେ। ସେପଟେ କିନ୍ତୁ ଜନଗଣନା ଏବଂ SIR ସର୍ଭେ କାର୍ଯ୍ୟ ଓଡ଼ିଶା ପକ୍ଷରୁ ସତପ୍ରତିସତ ସଫଳତାର ସହ ସରିଥିବା ବେଳେ ଏହା ପରେ ମଧ୍ୟ ଆନ୍ଧ୍ର ରାଜ୍ୟର ଅଧିକାରୀ ଓ ପ୍ରଶାସନ ଉକ୍ତ ସର୍ଭେ କାର୍ଯ୍ୟ କରିବାରେ ପଛଘୁଞ୍ଚା ଦେଇ ନାହାନ୍ତି। ଆନ୍ଧ୍ର ରାଜ୍ୟର ତହସିଲଦାରଙ୍କ ସହ ଅନ୍ୟ ସରକାରୀ କର୍ମଚାରୀ ଏବଂ ଜନପ୍ରତିନିଧି ନିଜର କାର୍ଯ୍ୟକ୍ରମ ଜାରି ରଖିଥିଲେ ମଧ୍ୟ ଓଡ଼ିଶାର ବ୍ଲକ ପ୍ରଶାସନ କ୍ଷେତ୍ରରେ କୌଣସି ପ୍ରଭାବ ପକାଇ ନ ଥିବାବେଳେ ଆନ୍ଧ୍ର ଅଧିକାରୀଙ୍କ ଅନୁପ୍ରବେଶ ସମ୍ପର୍କରେ ଖବର ପାଇ ମଧ୍ୟ ଚୁପ୍ ହୋଇ ରହିଥିବା ଦୃଶ୍ୟ ଅନେକ କିଛି ଦର୍ଶାଉଛି। ଗତ ୧୦ ତାରିଖରେ ଆନ୍ଧ୍ର ରାଜ୍ୟର ମହିଳା ଓ ଶିଶୁ ବିକାଶ ମନ୍ତ୍ରୀ ଜି. ସନ୍ଧ୍ୟାରାଣୀ ଅନୁପ୍ରବେଶ କରି ଓଡ଼ିଶାର ପ୍ରଶାସନିକ ଅଧିକାରୀ ଏବଂ ଗଣମାଧ୍ୟମ ପ୍ରତିନିଧିଙ୍କୁ କଡ଼ା ଚେତାବନୀ ଦେଇ ଫେରିବା ପରେ ପୁଣି ପ୍ରଶାସନିକ ଅଧିକାରୀ ଅନୁପ୍ରବେଶ କରି ନିଜର ଉପସ୍ଥିତି ଜାହିର କରିଛନ୍ତି।