ପାରଳାଖେମୁଣ୍ଡି,୬ା୧(ଗିରିଧାରୀ ପରିଛା): ଓଡ଼ିଶା ସରକାର ବାହାର ରାଜ୍ୟକୁ ଧାନ ଚାଲାଣ ଓ ଅସାଧୁ ବ୍ୟବସାୟ ରୋକିବା ପାଇଁ ସୀମାନ୍ତବର୍ତ୍ତୀ ଅଞ୍ଚଳରେ ସିସିଟିଭି କ୍ୟାମେରା ଲଗାଇ ନାକା ପଏଣ୍ଟରେ କଡାକଡି ଯାଞ୍ଚ ପାଇଁ ନିର୍ଦ୍ଦେଶ ଦେଇଛନ୍ତି। ମାତ୍ର ଗଜପତି ଜିଲାରେ ଏହାର ବ୍ୟତିକ୍ରମ ଦେଖିବାକୁ ମିଳୁଛି। ଏଠାରୁ ପଡ଼ୋଶୀ ରାଜ୍ୟ ଆନ୍ଧ୍ରପ୍ରଦେଶ ଧାନ କିଣି ନେଉଛି। ଏପରିକି, ଓଡିଶା ଚାଷୀଙ୍କ ନାଁରେ ଆନ୍ଧ୍ରରେ ଟୋକନ ପ୍ରସ୍ତୁତ ହୋଇ ଆସୁଛି। ଏହି ଟୋକନ ଦେଇ ଆନ୍ଧ୍ର ଧାନ କିଣୁଛି। ଓଡିଶା ଚାଷୀଙ୍କ ନାଁରେ ଥିବା ଟୋକନ, ଧାନ ଓଜନ ରସିଦ୍ରୁ ଏହାର ପ୍ରମାଣ ମିଳିଛି।
ଆନ୍ଧ୍ର ବ୍ୟବସାୟୀମାନେ ଗଜପତି ଜିଲାର ଗୋଷାଣି ଏବଂ କାଶୀନଗର ବ୍ଲକରୁ ଧାନ ଚାଲାଣ କରୁଛନ୍ତି। ପ୍ରତିଦିନ ୩୦ରୁ ୪୦ ଟ୍ରାକ୍ଟର ଧାନ କୁଇଣ୍ଟାଲ ପିଛା ୧୫ ଶହରୁ ୧୭ ଶହ ଟଙ୍କାରେ ବିନା ପ୍ରତିବନ୍ଧକରେ କିଣି ନେଉଛନ୍ତି। ଆନ୍ଧ୍ର ବ୍ୟବସାୟୀ ଧାନର ଗୁଣବତ୍ତା ନ ଦେଖି ନେଇ ଯାଉଥିବାରୁ ଲାଭକ୍ଷତିକୁ ଚିନ୍ତା ନ କରି ବିକିଦେଉଛୁ ବୋଲି କେତେଜଣ ଭାଗଚାଷୀ କହିଛନ୍ତି। ଅନ୍ୟପକ୍ଷରେ ଆଉ କେତେଜଣ ଚାଷୀ ରାଜ୍ୟ ସରକାର କିମ୍ବା ଜିଲା ପ୍ରଶାସନ ଉପରେ ଭରସା କରିପାରୁ ନ ଥିବା କହିଛନ୍ତି। କାରଣ ଜିଲା ପ୍ରଶାସନ ପକ୍ଷରୁ ପ୍ରଥମେ ଡିସେମ୍ବର ୩୦ରେ ଧାନ ସଂଗ୍ରହ କରାଯିବ ବୋଲି କୁହାଯାଇଥିଲା। ପରେ ଏହାକୁ ଜାନୁଆରୀ ୭ ତାରିଖକୁ ଘୁଞ୍ଚାଯାଇଛି। ସେ ସମୟରେ ମଧ୍ୟ ପ୍ରଶାସନ ଧାନ ନେବ କି ନାହିଁ ତାହାର କିଛି ଗ୍ୟାରେଣ୍ଟି ନାହିଁ ବୋଲି କହିଛନ୍ତି। ଗୋଟିଏ ପଟେ ଅଦିନିଆ ବର୍ଷାରେ ଧାନ ନଷ୍ଟ ହୋଇଥିବା ବେଳେ ଅନ୍ୟପଟେ ମଣ୍ଡି ଖୋଲିବାରେ ବିଳମ୍ବ ହେଉଛି। ଗଜପତିରେ ବହୁତ ତେଲୁଗୁ ସମ୍ପ୍ରଦାୟର ଚାଷୀ ଅଛନ୍ତି। ଆଗକୁ ସେମାନଙ୍କ ମୁଖ୍ୟ ପର୍ବ ପୋଙ୍ଗଲ ରହିଥିବାରୁ ଟଙ୍କାର ବହୁତ ଆବଶ୍ୟକତା ରହିଛି। ତେଣୁ ଚାଷୀ ନିରୁପାୟ ହୋଇ ଆନ୍ଧ୍ର ବ୍ୟବସାୟୀଙ୍କୁ ଶାଗ ମାଛ ଦରରେ ଧାନ ବିକ୍ରି କରିବାକୁ ବାଧ୍ୟ ହେଉଛନ୍ତି ବୋଲି ଚାଷୀ ନେତା ସୂର୍ଯ୍ୟ ନାରାୟଣ ପଟ୍ଟନାୟକ, ବାବୁଲା ପାତ୍ର, ଲକ୍ଷ୍ମୀ ନାରାୟଣ ପ୍ରମୁଖ କହିଛନ୍ତି।
ତେବେ ଏ ନେଇ ଯୋଗାଣ ଅଧିକାରୀ ପ୍ରଫୁଲ୍ଲ କୁମାର ବେହେରାଙ୍କ ସହ ଯୋଗାଯୋଗ କରିବାରୁ ସେ କହିଛନ୍ତି, ଜିଲାର ୭ଟି ବ୍ଲକ ମଧ୍ୟରୁ ୪ଟି ଯଥା ଗୁମ୍ମା, ଗୋଷାଣି, କାଶୀନଗର ଓ ରାୟଗଡ ବ୍ଲକରେ ମୋଟ ୪୫ଟି ମଣ୍ଡି ଖୋଲାଯିବ। ମୋଟ ୫,୮୫,୦୦୦ କୁଇଣ୍ଟାଲ ଧାନ ସଂଗ୍ରହ ପାଇଁ ଲକ୍ଷ୍ୟ ରଖାଯାଇଛି। ଚଳିତବର୍ଷ ଓଡିଶାରେ ଧାନର କୁଇଣ୍ଟାଲ ପିଛା ଦର ଆନ୍ଧ୍ରଠାରୁ ଅଧିକା ରହିଥିବା ବେଳେ ଚାଷୀ କମ୍ ଦରରେ ବିକିବା ଦୁର୍ଭାଗ୍ୟଜନକ। ଚାଷୀ ତାର ଇଚ୍ଛାରେ ଯାହାକୁ ଧାନ ବିକ୍ରି କରିପାରିବ। ଜିଲା ପ୍ରଶାସନ ଏହାକୁ ରୋକିପାରିବ ନାହିଁ। ସେ ଆହୁରି କହିଛନ୍ତି ଯେ, ଯେଉଁ ଚାଷୀମାନଙ୍କ ପାଖରେ ଟାର୍ଗେଟଠାରୁ ଅଧିକା ଧାନ ରହିଛି, ସେମାନେ କମ୍ ଦାମରେ ଆନ୍ଧ୍ରକୁ ବିକ୍ରି କରୁଥିବେ। ଯୋଗାଣ ଅଧିକାରୀଙ୍କ ଏଭଳି ମନ୍ତବ୍ୟରୁ ଜିଲାରେ ଚୋରା ବ୍ୟବସାୟୀଙ୍କୁ ଅଙ୍କୁଶ ଲଗାଇବା ପରିବର୍ତ୍ତେ ପ୍ରଶ୍ରୟ ଦେଲାଭଳି ମନେ ହେଉଛି।
