ନନ୍ଦପୁର,୨।୭ (ଶଙ୍କର ପୂଜାରୀ)କୋରାପୁଟ ଜିଲା ନନ୍ଦପୁର ବ୍ଲକ ସୀମାନ୍ତ ଗ୍ରାମରେ ଆନ୍ଧ୍ର ପ୍ରଦେଶର ଅନୁପ୍ରବେଶ ଯାଞ୍ଚ ପରେ ସ୍ପଷ୍ଟ ହୋଇଛି। ଆନ୍ଧ୍ର ତା’ର ସୀମା ଡେଇଁ ଓଡ଼ିଶା ସୀମାର ପ୍ରାୟ ଦେଢ଼ କି.ମି.ରୁ ଊର୍ଦ୍ଧ୍ୱ ଅଞ୍ଚଳରେ ଅନୁପ୍ରବେଶ କରିଛି। ଆନ୍ଧ୍ର ପ୍ରଶାସନ ଓଡ଼ିଶା ଜଙ୍ଗଲ ଜମିକୁ ନିଜର କହି ରାଇପାହାଡ ଗ୍ରାମର ୧୫ ପରିବାରକୁ ଜଙ୍ଗଲ ଜମିପଟ୍ଟା ବଣ୍ଟନ କରିଥିବା ଜଣାପଡ଼ିଛି। ଏହି ଜଙ୍ଗଲ ଜମି ପଟ୍ଟାଧାରୀଙ୍କୁ ହିତାଧିକାରୀ ଦର୍ଶାଇ ପରିବାରର ସମସ୍ତ ସଦସ୍ୟଙ୍କୁ ଆନ୍ଧ୍ର ତା’ର ବିଭିନ୍ନ ଯୋଜନାରେ ସାମିଲ କରିବାକୁ ପ୍ରଲୋଭନ ଦେଖାଇ ସୀମାନ୍ତ ଅଞ୍ଚଳରେ ଅନୁପ୍ରବେଶ ଜାରି ରଖିଛି। ତେବେ ରାଇପାହାଡ ଗ୍ରାମବାସୀଙ୍କଠାରୁ ଆନ୍ଧ୍ର କୌଶଳକ୍ରମେ ଓଡ଼ିଶା ସରକାରଙ୍କ ପ୍ରଦତ୍ତ ଜମି ପଟ୍ଟା ନେଇଯାଇଛି।
ତେବେ ସୀମାନ୍ତ ଅଞ୍ଚଳର କେତେକ ଗ୍ରାମରେ ଆନ୍ଧ୍ର ଅନୁପ୍ରବେଶ କରିବା ସମ୍ପର୍କିତ ଖବର ଗଣମାଧ୍ୟମରେ ପ୍ରକାଶ ପରେ ଜିଲା ଓ ରାଜ୍ୟ ପ୍ରଶାସନ ପକ୍ଷରୁ ତତ୍ପରତା ପ୍ରକାଶ ପାଇଥିଲା। କୋରାପୁଟ ଜିଲାପାଳ ଆନ୍ଧ୍ରର ଆଲୁରି ସିଥାରମନ ଜିଲାର ଜିଲାପାଳଙ୍କୁ ୨୭ା୬ା୨୩ରେ ଚିଠି ଲେଖି ତୁରନ୍ତ ଏହି ଅନୁପ୍ରବେଶ ବନ୍ଦ କରିବା ଏବଂ ଉଭୟ ରାଜ୍ୟର ପ୍ରଶାସନିକ ଅଧିକାରୀଙ୍କ ଉପସ୍ଥିତିରେ ସୀମା ନିର୍ଦ୍ଧାରଣ କରିବାକୁ ପରାମର୍ଶ ଦେଇଥିଲେ। ଏହା ପୂର୍ବରୁ ଜିଲାପାଳଙ୍କ ନିର୍ଦ୍ଦେଶରେ ଶୁକ୍ରବାର ଓ ଶନିବାର ସୀମାନ୍ତ ଅଞ୍ଚଳ ଯାଞ୍ଚ କରିବାକୁ ନନ୍ଦପୁର ବ୍ଲକ ପ୍ରଶାସର ଏକ ଟିମ୍ ଯାଇଥିଲା। ଏଥିରେ ତହସିଲଦାର ନରସିଂହ ଗାଦବା, ପାଡୁଆ ରାଜସ୍ବ ନିରୀକ୍ଷକ ଅକ୍ଷୟ କ୍ଷତ୍ରୀ, ଅମିନ ଶଙ୍କର ବାବୁ, ବାଲଡା ବନାଞ୍ଚଳ ଅଧିକାରୀ ବାଦଲ ମହାନ୍ତି ଓ ପାଡୁଆ ବନପାଳ ସାମିଲ ହୋଇଥିଲେ। ଯାଞ୍ଚ ବେଳେ ଏହି ଟିମ୍ ହାତରେ ଆନ୍ଧ୍ର ପ୍ରଦତ୍ତ ଜଙ୍ଗଲ ଜମି ପଟ୍ଟା ଏବଂ ଆନ୍ଧ୍ର ଦ୍ୱାରା ହୋଇଥିବା ବିଭିନ୍ନ ପ୍ରକଳ୍ପର ପ୍ରମାଣ ଲାଗିଛି। ଓଡ଼ିଶା ସରକାରଙ୍କ ପ୍ରଦତ୍ତ ଜମି ପଟ୍ଟାଗୁଡ଼ିକୁ ଆନ୍ଧ୍ର ଅଧିକାରୀମାନେ ରାଇପାହାଡ ଗ୍ରାମବାସୀଙ୍କଠାରୁ ବିଭିନ୍ନ କାମ ବାହାନାରେ ନେଇଯାଇଥିବା ଯାଞ୍ଚ ବେଳେ ଏହି ଟିମ୍ ଗ୍ରାମବାସୀଙ୍କଠାରୁ ଜାଣିବାକୁ ପାଇଛି। ତହସିଲଦାର ରାଇପାହାଡ ଗ୍ରାମବାସୀଙ୍କୁ ନନ୍ଦପୁର ତହସିଲ ପକ୍ଷରୁ ପ୍ରଦତ୍ତ ଜମିପଟ୍ଟା ମାଗିବାରୁ ଗ୍ରାମବାସୀ ନିଜ ନିଜର ଆନ୍ଧ୍ର ପ୍ରଦତ୍ତ ଜଙ୍ଗଲ ଜମିପଟ୍ଟା ଦେଖାଇଥିଲେ। ଓଡ଼ିଶା ଜମି ପଟ୍ଟା ଗ୍ରାମକୁ ଆସୁଥିବା ଆନ୍ଧ୍ର କର୍ମଚାରୀ ନେଇ ଯାଇଥିବା ଗ୍ରାମବାସୀ କହିଥିଲେ। ଫଳରେ ଆନ୍ଧ୍ର ପ୍ରଶାସନ ଆଗାମୀ ଦିନରେ ଓଡ଼ିଶାର ଏହି ଜମିର ପଟ୍ଟାକୁ ନେଇ କିଛି ବଡ ଧରଣର ଯୋଜନା କରୁଥିବା ଆଶଙ୍କା ପ୍ରକାଶ ପାଇଛି। ଏହି ଟିମ୍ ଯାଞ୍ଚ ସମୟରେ ଆନ୍ଧ୍ର ଓଡ଼ିଶାର ସୀମାସୂଚକ ପଥର ଡେଇଁ ଅନୁପ୍ରବେଶ କରୁଥିବା ଜଣାପଡିଛି। ରାଜସ୍ବ ଜମିରେ ଏଯାଏ ଆନ୍ଧ୍ର କୌଣସି ନିର୍ମାଣ କରିନାହିଁ। ତେବେ ଜଙ୍ଗଲ ଜମିକୁ ଅକ୍ତିଆର କରିବାକୁ ଆନ୍ଧ୍ର ସବୁପ୍ରକାର ଉଦ୍ୟମ କରୁଥିବା ତହସିଲଦାର ଗାଦବା କହିଛନ୍ତି।
