ପଟ୍ଟାଙ୍ଗି,୨୬।୪ (ଡି.ଏନ.ଏ.) କୋରାପୁଟ ଜିଲା ପଟ୍ଟାଙ୍ଗି ବ୍ଲକରେ ଏପରି ଏକ ଗ୍ରାମ ରହିଛି ଯେଉଁଠି ଆଜି ଯାଏ କୌଣସି ସରକାରୀ ଅଧିକାରୀଙ୍କ ପାଦ ପଡିନାହିଁ। ରାଜ୍ୟ ସରକାରଙ୍କ ଲୋକାଭିମୁଖୀ ଯୋଜନାଗୁଡିକୁ ଗ୍ରାମାଞ୍ଚଳରେ ପହଞ୍ଚାଉଥିବା ନେଇ କହୁଥିବା ବ୍ଲକ ପ୍ରଶାସନ ଏହି ଗ୍ରାମକୁ ଭୁଲି ଯାଇଛି। ଉକ୍ତ ଗ୍ରାମଟି ହେଲା ବ୍ଲକର ପେଟୁରୁ ପଞ୍ଚାୟତର ୫ନଂ. ୱାର୍ଡ ଚିନ୍ତାଲଗୁଡା। ଗ୍ରାମଟି ବ୍ଲକ କାର୍ଯ୍ୟାଳୟଠାରୁ ୪୭ କି.ମି. ଦୂରରେ ରହଛି। ଗ୍ରାମରେ ୧୦ ପରିବାର ବସବାସ କରନ୍ତି। ଗ୍ରାମବାସୀଙ୍କ ମୁଖ୍ୟ ସମସ୍ୟା ରାସ୍ତା ଓ ପାନୀୟଜଳ। ଏଥିପାଇଁ ସେମାନେ ଅନେକ ସମସ୍ୟାର ସମ୍ମୁଖୀନ ହେଉଥିବା ଗ୍ରାମର ରମେଶ ମାରି କହନ୍ତି ।
ସେହିପରି ଗ୍ରାମକୁ ଯିବାକୁ ହେଲେ ସୁଙ୍କିଠାରୁ ଅମ୍ପାବାଲି ପଞ୍ଚାୟତକୁ ସଂଯୋଗ ହୋଇଥିବା ରାସ୍ତା ଦେଇ ପେଟୁରୁ ପଞ୍ଚାୟତ ଦେଇ ଯିବାକୁ ହୋଇଥାଏ। ଚିନ୍ତାଲଗୁଡା ଗ୍ରାମ ପୂର୍ବରୁ ଥିବା ଜିଲାଗୁଣ୍ଠା ଓ କାମ୍ବିରିପାଡୁ ଦୁଇ ଗ୍ରାମର ମଝି ପର୍ଯ୍ୟନ୍ତ ପ୍ରଧାନମନ୍ତ୍ରୀ ଗ୍ରାମ ସଡକ ଯୋଜନାରେ ପିଚୁ ରାସ୍ତା ହୋଇଥିବା ବେଳେ ଚିନ୍ତାଲଗୁଡା ଗ୍ରାମ ପର୍ଯ୍ୟନ୍ତ ପିଚୁ ରାସ୍ତା ନାହିଁ। ପିଚୁ ରାସ୍ତା ନିର୍ମାଣ ପାଇଁ ବ୍ଲକ ପ୍ରଶାସନ ପକ୍ଷରୁ କୌଣସି ଉଦ୍ୟମ ହୋଇ ନ ଥିବା ୫ନଂ. ୱାର୍ଡସଭ୍ୟ ସୁକ୍ରି ଗେମେଲ କହିଛନ୍ତି। ଆମ ଗ୍ରାମରେ ପାନୀୟ ଜଳ ସମସ୍ୟା ସବୁ ବେଳେ ଲଗି ରହିଛି। ଗ୍ରାମଠାରୁ ୨ କି.ମି. ଦୂରରେ ଥିବା ଏକ ଝରଣାପାଣି ଉପରେ ଆମେ ନିର୍ଭର କରୁଛୁ। ବ୍ଲକ ପ୍ରଶାସନର କୌଣସି ଅଧିକାରୀଙ୍କ ପାଦ ଏଯାଏ ଆମ ଗ୍ରାମରେ ପଡ଼ିନାହିଁ। ଅଙ୍ଗନଓ୍ବାଡି କେନ୍ଦ୍ର, ପ୍ରି-ସ୍କୁଲ କ’ଣ ଆମ ପିଲାଏ ଜାଣନ୍ତି ନାହିଁ ବୋଲି ଗ୍ରାମବାସୀ କହିିଛନ୍ତି। ଚିନ୍ତାଲଗୁଡା, କାମିରିପାଡୁ ଏବଂ ଚେରୁକୁଢବା ତିନି ଗ୍ରାମର ପିଲାମାନେ ମୂଳାଗୁଡା ଅଙ୍ଗନଓ୍ବାଡି କେନ୍ଦ୍ର ଉପରେ ନିର୍ଭର କରନ୍ତି। ଉକ୍ତ ଅଙ୍ଗନଓ୍ବାଡି କେନ୍ଦ୍ର ମଧ୍ୟ ଠିକ ରୂପେ ଖୋଲେନାହିଁ। ସୂଚନାଯୋଗ୍ୟ, ପେଟୁରୁ ପଞ୍ଚାୟତର ଉକ୍ତ ଗ୍ରାମକୁ ଛାଡିଦେଲେ କାମିରିପାଡୁ ଗ୍ରାମର ୨୦ ପରିବାର ଏବଂ ଚେରୁକୁଢବା ଗ୍ରାମର ୮ ପରିବାର ପାଇଁ ବର୍ତ୍ତମାନ ସୁଦ୍ଧା ପାନୀୟ ଜଳ ଯୋଗାଣ ବ୍ୟବସ୍ଥା ନାହିଁ। ଗ୍ରାମକୁ ଭଲ ରାସ୍ତାଟିଏ ନାହିଁ। ସେହିପରି ବ୍ଲକର ଚନ୍ଦକା ପଞ୍ଚାୟତର ଗାଲିପାଡୁ ଗ୍ରାମର ୪୦ ପରିବାର ଓ ଟିମାଲପାଡୁ ଗ୍ରାମର ୧୦ ପରିବାରଙ୍କ ମଧ୍ୟ ସମାନ ଅବସ୍ଥା। ଆମ ସମସ୍ୟା ସମାଧାନ ପ୍ରତି ପ୍ରଶାସନ ଦୃଷ୍ଟି ନ ଦେଲେ ଆମେ ଆଗାମୀ ଦିନରେ ବ୍ଲକ କାର୍ଯ୍ୟାଳୟ ବ୍ଲକ ଘେରାଉ କରିବୁ ବୋଲି ଗ୍ରାମବାସୀ ଚେତାବନୀ ଦେଇଛନ୍ତି। ଏନେଇ ପେଟୁରୁ ସରପଞ୍ଚ ମମିତା ବାଙ୍କାଙ୍କୁ ପଚାରିବାରୁ ସେ କହିଲେ ଚିନ୍ତାଲଗୁଡା, କାମିରିପାଡୁ ଓ ଚେରୁକୁଢବା ଗ୍ରାମର ପାନୀୟ ଜଳ ଓ ରାସ୍ତା ସମସ୍ୟା ସମ୍ପର୍କରେ ସେ ବ୍ଲକ ପ୍ରଶାସନକୁ ଲିଖିତ ଭାବେ ଅବଗତ କରାଇଛନ୍ତି ବୋଲି ପ୍ରକାଶ କରିଛନ୍ତି।
