ବାରଙ୍ଗ,୯।୭(ଡି.ଏନ୍.ଏ.): ପ୍ରାଣୀ ଉଦ୍ୟାନ ନନ୍ଦନକାନନ ପାଇଁ ପୁଣି ଖୁସି ଖବର। ନନ୍ଦନକାନନରେ ପ୍ରଥମ କରି ଗୁରୁବାର ଗୋଟିଏ ଛୁଆ ଜନ୍ମଦେଇ ଚର୍ଚ୍ଚାରେ ରହିଥିବା ଆନାକୋଣ୍ଡା ପୁଣି ଶୁକ୍ରବାର ୯ଟି ଛୁଆକୁ ଜନ୍ମଦେଇଛି। ଗୁରୁବାର ଗୋଟିଏ ଛୁଆ ଜନ୍ମ ଦେଇସାରିବା ପରେ ଏହି ମା’ ଆନାକୋଣ୍ଡା ସହ ଅନ୍ୟ ଦୁଇଟି ମାଈ ଆନାକୋଣ୍ଡା ପ୍ରତି ସ୍ବତନ୍ତ୍ର ଦୃଷ୍ଟି ଦିଆଯିବା ସହ ତାପମାତ୍ରା ଏବଂ ଆର୍ଦ୍ରତା ମନିଟରିଂ ମଧ୍ୟ କରାଯାଇଥିଲା। ମା’ ଆନାକୋଣ୍ଡା ଅଧିକ ଛୁଆ ଜନ୍ମ ନ କରିବାରୁ ତା’ର ସ୍ବାସ୍ଥ୍ୟ ବିଷୟରେ ଯାଞ୍ଚ କରିବା ପାଇଁ ଶୁକ୍ରବାର ଓୟୁଏଟିର ବିଶେଷଜ୍ଞ ଡ. ଇନ୍ଦ୍ରମଣିନାଥ ଓ ଡ.ବିଜୟ ସାହୁଙ୍କ ସହାୟତା ନିଆଯାଇଥିଲା। ଏଥିପାଇଁ ସରୀସୃପ ଉଦ୍ୟାନ ମଧ୍ୟରୁ ମା’ ଆନାକୋଣ୍ଡାକୁ ଡାକ୍ତରଖାନାକୁ ଅଣାଯାଇଥିଲା। ସେଠାରେ ବିଶେଷଜ୍ଞ ଡାକ୍ତରମାନେ ପରୀକ୍ଷାନିରୀକ୍ଷା ସହ ଏକ୍ସ-ରେ କରି ତା’ପେଟରେ ଜୀବନ୍ତ ଛୁଆ ଥିବା ଜାଣିବାକୁ ପାଇଥିଲେ। ପ୍ରସବ ବିଳମ୍ବ ହୋଇଥିବାରୁ ଶୀଘ୍ର ପ୍ରସବ ପାଇଁ ତାକୁ ଅକ୍ସିଟୋକିନ ଇଞ୍ଜେକ୍ସନ ଦିଆଯାଇଥିଲା। ଇଞ୍ଜେକ୍ସନ ଦେବାର କିଛି ସମୟ ପରେ ଡାକ୍ତରଖାନାରେ ଏକ ଛୁଆକୁ ଜନ୍ମ କରିଥିଲା। ତା’ପେଟରେ ଅଧିକ ଛୁଆ ଥିବାର ପରୀକ୍ଷା ବେଳେ ଜଣାପଡିଥିବାରୁ ପୁଣି ୯୦ମିନଟ ପରେ ଦ୍ୱିତୀୟ ଡୋଜ ଦିଆଯାଇ ଡାକ୍ତରଖାନାରୁ ନିଆଯାଇ ସରୀସୃପ ଉଦ୍ୟାନ ମଧ୍ୟରେ ଛଡାଯାଇଥିଲା। ସେଠାରେ ସାରେ ୭ଟି ଛୁଆକୁ ଜନ୍ମ ଦେଇଥିଲା ମା ଆନ୍ନାକୋଣ୍ଡା। ୭ଟି ଛୁଆ ମଧ୍ୟରୁ ଗୋଟିକର ମୃତ୍ୟୁ ହୋଇଥିଲା। ପୁଣି ରାତିରେ ଆଉ ଏକ ଛୁଆକୁ ଜନ୍ମ ଦେବାପରେ ନନ୍ଦନକାନନରେ ୯ ନବଜନ୍ମିତ ଆନାକୋଣ୍ଡା ଛୁଆ ଥିବାବେଳେ ସେମାନଙ୍କୁ ସ୍ବତନ୍ତ୍ର ଭାବେ ବାସ୍କ ମଧ୍ୟରେ ରଖାଯାଇ ତାପମାତ୍ରା ଓ ଆର୍ଦ୍ରତା ମନିଟରିଂ କରାଯାଉଛି। ଏଥିସହ ମା’ ଆନାକୋଣ୍ଡା ପ୍ରତି ମଧ୍ୟ ସ୍ବତନ୍ତ୍ର ଭାବେ ଦୃଷ୍ଟି ଦିଆଯାଇଛି ବୋଲି ନନ୍ଦନକାନନ ଉପନିର୍ଦ୍ଦେଶକ ଡ.ସଞ୍ଜିତ୍ କୁମାର କହିଛନ୍ତି।
