ନିରାକାରପୁର, ୨୮।୪(ମାନସ ଚନ୍ଦ୍ର ପଟ୍ଟନାୟକ ): ଖୋର୍ଦ୍ଧା ଜିଲା ଜଂକିଆ ଥାନା ଅନ୍ତର୍ଗତ ବଡପୋଖରିଆ ନିକଟ ମା’ ବାଉତୀଙ୍କ ମନ୍ଦିର ସାମ୍ନା ୧୬ ନଂ ଜାତୀୟ ରାଜପଥରେ ସୋମବାର ରାତିରେ ଏକ ମର୍ମନ୍ତୁଦ ସଡ଼କ ଦୁର୍ଘଟଣା ଘଟିଛି। ଏହି ଦୁର୍ଘଟଣାରେ ଜଣେ ଅଜଣା ବ୍ୟକ୍ତିଙ୍କ ମୃତ୍ୟୁ ଘଟିଛି। ସେ ଅନ୍ଧାରରେ ରାସ୍ତା ଅତିକ୍ରମ କରୁଥିବାବେଳେ କୌଣସି ଅଜଣା ଗାଡି ଧକ୍କା ଦେଇ ଫେରାର୍ ହୋଇଯାଇ ଥିବାବେଳେ ଘଟଣାସ୍ଥଳରେ ଉକ୍ତ ବ୍ୟକ୍ତିଙ୍କ ମୃତ୍ୟୁ ହୋଇଛି। ଖବରପାଇ ସ୍ଥାନୀୟ ଜନସାଧାରଣଙ୍କ ପକ୍ଷରୁ ରାସ୍ତାରେ ପଡିରହିଥିବା ମୃତଦେହ ପାଖରେ ପ୍ରାୟ ଏକ ଘଣ୍ଟା ରାସ୍ତାରୋକୋ ହୋଇଥିଲା। ପରେ ଘଟଣାସ୍ଥଳରେ ଜଂକିଆ ପୋଲିସ ପହଞ୍ଚି ଲୋକଙ୍କୁ ବୁଝାସୁଝା କରିବା ସହିତ ମୃତଦେହକୁ ବ୍ୟବଚ୍ଛେଦ ପାଇଁ ଖୋର୍ଦ୍ଧା ସରକାରୀ ମେଡିକାଲକୁ ପଠାଇ ତଦନ୍ତ କରିଥିଲା। ମୃତ ବ୍ୟକ୍ତିଙ୍କ ପରିଚୟ ମିଳିପାରିନି। ଶୁଣିବାକୁ ମିଳୁଛି ଉକ୍ତ ବ୍ୟକ୍ତି ଜଣକ ଜଣେ ଅଣ ଓଡ଼ିଆ ଲୋକ। ସେ କୌଣସି କମ୍ପାନୀରେ କାର୍ଯ୍ୟରତ ଥିଲେ। ଏନେଇ ଜଙ୍କିଆ ଥାନା ଅଧିକାରୀ ସୁଶାନ୍ତ କୁମାର ବେହେରାଙ୍କୁ ପଚାରିବାରେ ଅନ୍ଧାରରେ ରାସ୍ତା ପାର୍ ହେଉଥିଲାବେଳେ କୌଣସି ଅଜଣା ଗାଡି ଧକ୍କା ଦେଇ ଘଟଣାସ୍ଥଳରୁ ଚମ୍ପଟ ମାରିଛି, ଆମେ ଶବକୁ ବ୍ୟବଚ୍ଛେଦ ପାଇଁ ଖୋର୍ଦ୍ଧା ମେଡିକାଲକୁ ପଠେଇ ଦେଇଛୁ। ରାତି ହୋଇଯିବାରୁ ଆଜି ଶବ ବ୍ୟବଚ୍ଛେଦ ହେବ । ପରିଚୟ ନମିଳିଲେ ତାକୁ ଶବ ଗୃହରେ ରଖାଯିବ। ତେବେ ଏହି ମୃତ୍ୟୁକୁ ନେଇ କୋଣସି ଅଭିଯୋଗ ନ ହେବାରୁ ମାମଲା ରୁଜୁ ହୋଇପାରିନାହିଁ ବୋଲି ସେ ସୂଚନା ଦେଇଛନ୍ତି ।