ମଣ୍ଡି,୧୪।୭: ହିମାଚଳ ପ୍ରଦେଶର ମଣ୍ଡିର ଭାଜପା ଏମ୍ପି ଏବଂ ବଲିଉଡ ଅଭିନେତ୍ରୀ କଙ୍ଗନା ରାଣାୱତ ପୁଣି ଥରେ ଚର୍ଚ୍ଚାରେ ଅଛନ୍ତି। ବଞ୍ଜାର ଅଞ୍ଚଳ ଗସ୍ତ ସମୟରେ, ଜଣେ ବୟସ୍କ ବ୍ୟକ୍ତି ତାଙ୍କ ପାଖକୁ ଯାଇ ପାର୍ବତୀ ପ୍ରକଳ୍ପ ସହିତ ଜଡିତ ତାଙ୍କର ସମସ୍ୟା ଉପସ୍ଥାପନ କରିଥିଲେ, କିନ୍ତୁ କଙ୍ଗନାଙ୍କ ଉତ୍ତର ଶୁଣି ସେଠାରେ ଉପସ୍ଥିତ ଲୋକମାନେ ଆଶ୍ଚର୍ଯ୍ୟ ହୋଇଗଲେ।
କଙ୍ଗନା ବୃଦ୍ଧଙ୍କୁ କହିଲେ,ମୁଖ୍ୟମନ୍ତ୍ରୀଙ୍କ କାମ ବିଷୟରେ ମୋତେ କାହିଁକି କୁହାଯାଉଛି? ସୁଖବିନ୍ଦର ଜୀ ସେଠାରେ ଅଛନ୍ତି, ଏହି କାମ କେବଳ ତାଙ୍କୁ କୁହନ୍ତୁ। ମୁଖ୍ୟମନ୍ତ୍ରୀଙ୍କ କାମ ବିଷୟରେ ମୋତେ କୁହନ୍ତୁ ନାହିଁ। ଏଥିରେ ବୃଦ୍ଧ ବିନମ୍ରତାର ସହିତ ଉତ୍ତର ଦେଲେ, ଆପଣଙ୍କ ପାଖରେ ଶକ୍ତି ଅଛି, ଆପଣ ବହୁତ କିଛି କରିପାରିବେ। ଆମେ ଚାହୁଁଛୁ ଯେ ଆପଣ ପ୍ରଧାନମନ୍ତ୍ରୀଙ୍କ ସହ କଥା ହୁଅନ୍ତୁ।
ଘଟଣା ସମୟରେ, ସେଠାରେ ଉପସ୍ଥିତ ସୁରକ୍ଷା କର୍ମୀ ବୃଦ୍ଧଙ୍କୁ ହଟାଇବାକୁ ଚେଷ୍ଟା କରିଥିଲେ, କିନ୍ତୁ କଙ୍ଗନା ସେମାନଙ୍କୁ ଅଟକାଇ କହିଲେ, ମୁଁ ଆପଣଙ୍କୁ କେନ୍ଦ୍ର ମନ୍ତ୍ରୀ ମନୋହର ଲାଲ ଖଟ୍ଟରଙ୍କ ସହିତ ପରିଚୟ କରାଇବି।
ଏହି ସମ୍ପୂର୍ଣ୍ଣ କଥାବାର୍ତ୍ତା ଏକ ୩୫ ସେକେଣ୍ଡର ଭିଡିଓରେ କଏଦ ହୋଇଛି ଯାହା ଏବେ ସୋସିଆଲ ମିଡିଆରେ ଭାଇରାଲ ହେଉଛି। ଏହି ଘଟଣା ପୁଣି ଥରେ ଏହି ପ୍ରଶ୍ନ ଉଠାଇଛି ଯେ, ଜନସାଧାରଣଙ୍କ ସମସ୍ୟା ଶୁଣିବା ଏବଂ ସେଗୁଡ଼ିକୁ ଆଗକୁ ନେବା କ’ଣ ଜଣେ ଜନପ୍ରତିନିଧିଙ୍କ ଦାୟିତ୍ୱ ନୁହେଁ?
