ବିଶୋଇ,୧୬ା୨(ଡି.ଏନ୍.ଏ.): ମୟୂରଭଞ୍ଜ ଜିଲା ବିଶୋଇ ଥାନା ଅନ୍ତର୍ଗତ ୪୯ ନଂ ଜାତୀୟ ରାଜପଥସ୍ଥିତ ସ୍ଥାନୀୟ ଚଟାଣି ଛକ ନିକଟରେ ଏକ ଆଇରନ ବୋଝେଇ ଟ୍ରକ୍ ଭାରସାମ୍ୟ ହରାଇ କଲଭର୍ଟ ଉପରକୁ ଚଢ଼ିଯିବାରୁ ଘଟଣାସ୍ଥଳରେ ଡ୍ରାଇଭରଙ୍କ ମୃତ୍ୟୁ ଘଟିଛି। ତେବେ ହେଲ୍ପର ଅଳ୍ପକେ ବର୍ତ୍ତି ଯାଇଛନ୍ତି। ମୃତ ଟ୍ରକ ଡ୍ରାଇଭର ଜଣଙ୍କ ହେଲେ କେନ୍ଦୁଝର ଜିଲା ରାଇଁସୁଆ ଅଞ୍ଚଳର ପପୁନି ମୁଣ୍ଡା (୨୫) ଓ ଗୁରୁତର ହେଲ୍ପର ଜଣଙ୍କ ମଧ୍ୟ ଉକ୍ତ ଥାନା ଅଞ୍ଚଳର ନୁନକୁ ବେଣ୍ଟକାର (୩୨)।
ସୂଚନାଥାଉକି, ଗତକାଲି ବିଳମ୍ବିତ ରାତିରେ କେନ୍ଦୁଝର ପଟୁ ଏକ ଆଇରନ ବୋଝେଇ ଟ୍ରକ୍ (ଓ ୦୪ କ୍ୟୁ ୨୮୭୨) ଆସୁଥିବା ସମୟରେ ଭାରସାମ୍ୟ ହରାଇ ଚଟାଣି ଛକ ନିକଟସ୍ଥ ଏକ କଲଭର୍ଟ ଉପରକୁ ଚଢ଼ି ଯାଇଥିଲା। ଟ୍ରକ୍ ଖୁବ୍ ଦ୍ରୁତ ଗତିରେ ଥିବା ହେତୁ କଲଭର୍ଟରେ ଜୋର୍ରେ ଧକ୍କା ଲାଗିଥିଲା। ଟ୍ରକର ଇଞ୍ଜିନ ଓ ଡାଲା ଦୁଇ ଭାଗ ହୋଇଯାଇଥିଲା। ଟ୍ରକ ଚାଳକଙ୍କ ଇଞ୍ଜିନ ମଧ୍ୟରେ ଚାପି ହୋଇ ଘଟଣାସ୍ଥଳରେ ମୃତ୍ୟୁ ଘଟିଥିଲା। ତେବେ ହେଲ୍ପର ଟ୍ରକରୁ ୪୦ ଫୁଟ ଦୂରକୁ ଛିଟିକି ପଡ଼ି ଅଳ୍ପକେ ରକ୍ଷା ପାଇଥିଲେ ସୁଦ୍ଧା ଗୁରୁତର ହୋଇଛନ୍ତି। ପୋଲିସ ପାଟ୍ରୋଲିଂ କରୁଥିବା ସମୟରେ ଘଟଣା ସମ୍ପର୍କରେ ଜାଣି ଦମକଳବାହିନୀକୁ ଖବର ଦେଇଥିଲା। ଦମକଳବାହିନୀ ଘଟଣାସ୍ଥଳରେ ପହଞ୍ଚି ମୃତ ଡ୍ରାଇଭରଙ୍କୁ ଉଦ୍ଧାର କରି ବ୍ୟବଚ୍ଛେଦ ପାଇଁ ପଠାଇଥିଲେ। ସେହିପରି ଗୁରୁତର ଅବସ୍ଥାରେ ହେଲ୍ପରକୁ ଉଦ୍ଧାର କରି ରାଇରଙ୍ଗପୁର ଉପଖଣ୍ଡ ଚିକିତ୍ସାଳୟକୁ ପଠାଯାଇଥିଲା। ଏହି ଘଟଣାକୁ ନେଇ ବିଶୋଇ ଥାନାରେ କେସ୍ ନଂ ୩୭/୨୩ରେ ଏକ ମାମଲା ରୁଜୁ ହୋଇଥିବାର ଜଣାପଡିଛି। ଟ୍ରକ୍ ଚାଳକଙ୍କ ଆଖି ଲାଗି ଯାଇଥିବାରୁ ଏହିପରି ଘଟଣା ଘଟିଛି ବୋଲି ପ୍ରାଥମିକ ତଦନ୍ତରୁ ଜଣାପଡ଼ିଛି।
