ଯାଜପୁର ଅଫିସ,୨୫ା୨:: ଚଣ୍ଡିଖୋଲସ୍ଥିତ ବାବା ଭୈରବାନନ୍ଦ ସ୍ବୟଂଶାସିତ ମହାବିଦ୍ୟାଳୟର ଛାତ୍ରୀ ନିବାସ ସମେତ ସଂଲଗ୍ନ ଅଞ୍ଚଳରେ ଜଣ୍ଡିସ ରୋଗ ବ୍ୟାପିବା ଅଭିଯୋଗ ଉପରେ ସ୍ବାସ୍ଥ୍ୟ ବିଭାଗ ପକ୍ଷରୁ ତଦନ୍ତ ଆରମ୍ଭ ହୋଇଛି। ଶୁକ୍ରବାର ଏନେଇ ଧରିତ୍ରୀରେ ଖବର ପ୍ରକାଶ ପାଇବା ପରେ ଯାଜପୁର ଜିଲାପାଳ ଚକ୍ରବର୍ତ୍ତୀ ସିଂ ରାଠୋରଙ୍କ ଦୃଷ୍ଟି ଆକର୍ଷଣ କରାଯାଇଥିଲା। ଏହି ସମସ୍ୟାକୁ ଗମ୍ଭୀରତାର ସହ ନେଇ ଆବଶ୍ୟକ ପଦକ୍ଷେପ ଗ୍ରହଣ କରିବାକୁ ଆଇନଜୀବୀ ଉଦୟନାଥ ସାହୁ ଜିଲାପାଲଙ୍କୁ ଅନୁରୋଧ କରିଥିଲେ। ଜିଲାପାଳ ତୁରନ୍ତ ଚଣ୍ଡିଖୋଲକୁ ଏକ ସ୍ବାସ୍ଥ୍ୟ ବିଶେଷଜ୍ଞ ଟିମ ପଠାଇ ସେଠାରେ ଜଣ୍ଡିସ ରୋଗ ବ୍ୟାପିବା ଉପରେ ପଦକ୍ଷେପ ନେବାକୁ ଜିଲା ମୁଖ୍ୟ ଚିକିତ୍ସାଧିକାରୀ(ସିଡିଏମ୍ଓ)ଙ୍କୁ ନିର୍ଦ୍ଦେଶ ଦେଇଥିଲେ। ଜିଲାପାଳଙ୍କଠାରୁ ନିର୍ଦ୍ଦେଶ ପାଇ ଶୁକ୍ରବାର ମଧ୍ୟାହ୍ନରେ ସିଡିଏମଓ ଶୁଭାଶିଷ ମହାରଣା, ଜନସ୍ବାସ୍ଥ୍ୟ ବିଭାଗର ସହକାରୀ ନିର୍ଦ୍ଦେଶକ ରମେଶ ମଲ୍ଲିକ ପ୍ରମୁଖ ଚଣ୍ଡିଖୋଲ କଲେଜ ଛାତ୍ରୀ ନିବାସ ସମେତ ସ୍ଥାନୀୟ କିଛି ଘରୋଇ ମେସ ଯାଇ ଆକ୍ରାନ୍ତ ଛାତ୍ରୀଙ୍କ ସ୍ବାସ୍ଥ୍ୟବସ୍ଥା ପରଖିଥିଲେ। ଏହାସହ ଦୂଷିତ ପାନୀୟ ଜଳ ଏବଂ ଅସ୍ବାସ୍ଥ୍ୟକର ପରିସ୍ଥିତିରେ ପ୍ରସ୍ତୁତ ବାହାର ଖାଦ୍ୟର ପ୍ରଭାବରେ ହିଁ ଜଣ୍ଡିସ ବ୍ୟାପୁଥିବା ନେଇ ସେମାନେ ଆଶଙ୍କା ପ୍ରକାଶ କରିଥିଲେ। ଶନିବାର ପୁନଶ୍ଚ ଖାଦ୍ୟ ନିରାପତ୍ତା ବିଭାଗର ଏକ ଟିମ ପଠାଇ କଲେଜ ପାର୍ଶ୍ୱବର୍ତ୍ତୀ ଅଞ୍ଚଳରେ ଠେଲା ଗାଡ଼ିରେ ବିକ୍ରି ହେଉଥିବା ଚାଟ୍, ଗୁପଚୁପ୍, ଦହିବରା, ଜଳଖିଆ ସମେତ ଫାଷ୍ଟଫୁଡ୍ ଓ ହୋଟେଲ ଗୁଡିକରୁ ପରୀକ୍ଷା ପାଇଁ ଖାଦ୍ୟ ନମୁନା ସଂଗ୍ରହ କରିବାକୁ ପଦକ୍ଷେପ ନିଆଯିବ ବୋଲି ସୂଚନା ମିଳିଛି। କିନ୍ତୁ ସିଡିଏମଓ ତାଙ୍କର ପଦକ୍ଷେପ ଏତିକିରେ ସୀମିତ ନ ରଖି ଏହି ଅଞ୍ଚଳରେ ବ୍ୟାପିଥିବା ଜଣ୍ଡିସ ରୋଗକୁ ଯେଭଳି ସମ୍ପୂର୍ଣ୍ଣ ଭାବେ ପ୍ରତିହତ କରିହେବ ସେଥିପାଇଁ ପଦକ୍ଷେପ ନେବାକୁ ଦାବି ହୋଇଛି। କଲେଜର ପାଖାପାଖି ୫୦ଜଣ ଛାତ୍ରୀ ଜଣ୍ଡିସ ଆକ୍ରାନ୍ତ ହୋଇ ଚିକିତ୍ସିତ ହେଉଛନ୍ତି। ତନ୍ମଧ୍ୟରୁ ଅନେକ ଛାତ୍ରୀ ପରୀକ୍ଷା ଦେଇ ପାରି ନ ଥିଲା ବେଳେ ଦୁଇଦିନ ହେଲା ଏଥିପାଇଁ ଛାତ୍ରୀ ନିବାସକୁ ବନ୍ଦ କରି ଦିଆଯାଇଛି। ବିଡ଼ମ୍ବନାର ବିଷୟ ହେଉଛି ମାସେ ତଳୁ ଏଠାରେ କେତେକ ଛାତ୍ରୀଙ୍କଠାରେ ଜଣ୍ଡିସର ଲକ୍ଷ୍ୟଣ ପ୍ରକାଶ ପାଇବା ପରେ କଲେଜ କର୍ତ୍ତୃପକ୍ଷ କେବଳ ଚିଠି ଲେଖି ପରିସ୍ଥିତିକୁ ହାଲୁକା ଭାବେ ଗ୍ରହଣ କରିଥିଲେ। ଜିଲା ଖାଦ୍ୟ ନିରୀକ୍ଷଣ ଅଧିକାରୀ ମଧ୍ୟ ଉକ୍ତ କଲେଜର ଆଖପାଖ ଅଞ୍ଚଳର ଖାଦ୍ୟ ନମୁନା ସଂଗ୍ରହ ନ କରି ବସି ରହିଛନ୍ତି। କେବଳ ବାବା ଭୈରବା ନନ୍ଦ କଲେଜ ନୁହେଁ ଜିଲାର ଏନ୍ସି କଲେଜଠାରୁ ଆରମ୍ଭ କରି ବ୍ୟାସନଗର ସ୍ବୟଂଶାସିତ କଲେଜ, ଧର୍ମଶାଳା ଆଦି କଲେଜ ସମ୍ମୁଖ ସ୍ଥାନରେ ଗୁପଚୁପ, ଦହିବରା, ଚାଟ ଆଦି ବିକ୍ରି ହେଉଛି। ଏହି ଖାଦ୍ୟରେ ଦୂଷିତ ପାଣି ବ୍ୟବହାର ହେଉଥିବାରୁ ସଂପୃକ୍ତ ଶିକ୍ଷାନୁଷ୍ଠାନର ଛାତ୍ରୀଛାତ୍ର ଅସୁସ୍ଥ ହେଉଥିବା ଅଭିଯୋଗ ହୋଇଛି। ଏନେଇ ଖାଦ୍ୟ ନିରୀକ୍ଷଣ ଅଧିକାରୀ ଦୃଷ୍ଟି ଦେବାର ଆବଶ୍ୟକତା ରହିଛି ବୋଲି ମତପ୍ରକାଶ ପାଇଛି। ଏ ସଂକ୍ରାନ୍ତରେ ଖାଦ୍ୟ ନିରୀକ୍ଷଣ ଅଧିକାରୀ ରାକେଶ କୁମାର ସାହୁଙ୍କୁ ପଚାରିବାରେ ସେ କହିଛନ୍ତି. ବାବା ଭୈରାବ ନନ୍ଦ କଲେଜ ଛାତ୍ରୀଙ୍କୁ ଜଣ୍ଡିସ ବ୍ୟାପିବାର ଖବର ସେ ପାଇଛନ୍ତି। ବିଭାଗ ପକ୍ଷରୁ ଆବଶ୍ୟକ ତଦନ୍ତ ଚାଲିଛି। ଏହାପରେ ପର୍ଯ୍ୟାୟକ୍ରମେ ଜିଲାର ସମସ୍ତ ସ୍କୁଲ, କଲେଜ ସମ୍ମୁଖ ଖାଦ୍ୟ ଦୋକାନଗୁଡିକରେ ସ୍କ୍ବାଡ୍ ଦ୍ୱାରା ଯାଞ୍ଚ କରାଯିବ।
