ବଇଣ୍ଡା, ୧୬।୫: ଗ୍ରାମାଞ୍ଚଳବାସୀଙ୍କୁ ହାତପାହାନ୍ତାରେ ବିଶୁଦ୍ଧ ପାଣି ଯୋଗାଇ ଦେବାକୁ ଅନେକ ଯୋଜନା କରିଛନ୍ତି ସରକାର। ପାନୀୟ ଜଳ ସମସ୍ୟାର ସ୍ଥାୟୀ ସମାଧାନ ଲାଗି ‘ବସୁଧା’ ଯୋଜନାରେ ପ୍ରକଳ୍ପ ନିର୍ମାଣ କରାଯାଉଛି। ପାଇପ୍ ପାଣି ଯୋଗାଣ ବ୍ୟବସ୍ଥାକୁ ସୁନିଶ୍ଚିତ କରିବାକୁ ଅଗ୍ରାଧିକାର ଦିଆଯାଉଛି। ଏହା ସତ୍ତ୍ୱେ ଆଭ୍ୟନ୍ତରୀଣ ଗ୍ରାମାଞ୍ଚଳରେ ଉତ୍କଟ ଜଳସଙ୍କଟରୁ ମୁକ୍ତି ମିଳୁନାହିଁ। ଅନୁଗୋଳ ଜିଲା ଆଠମଲ୍ଲିକ ବ୍ଲକ ସାପଘରା ପଞ୍ଚାୟତ ଅନ୍ତର୍ଗତ ଖମାର ଗ୍ରାମ ଏହାର ଏକ ଉଦାହରଣ। ଭୂତଳ ଜଳସ୍ତର କ୍ରମାଗତ ଭାବେ ହ୍ରାସ ପାଇବା ଏବଂ ପାନୀୟ ଜଳ ପ୍ରକଳ୍ପ ବର୍ଷେ ହେଲା ଅଚଳ ହୋଇପଡ଼ିବା ପରେ ଅଞ୍ଚଳବାସୀଙ୍କ ସମସ୍ୟା ବଢ଼ିଛି। ଏବେ ପରିସ୍ଥିତି ଏମିତି ହୋଇଛି ଯେ, ନଳକୂଅରୁ ଘଣ୍ଟାଏରେ ଗରାଏ ପାଣି ବାହାରୁଛି। ଗ୍ରାମବାସୀ ପାଣି ଚିନ୍ତାରେ ଦିନ ବିତାଉଥିବାବେଳେ ଜନଅସନ୍ତୋଷ ତୀବ୍ର ହେବାରେ ଲାଗିଛି।
ସାପଘରା ପଞ୍ଚାୟତ ୩ନଂ. ୱାର୍ଡ ଅନ୍ତର୍ଗତ ଖମାର ଗ୍ରାମରେ ବାସ କରନ୍ତି ୭୦ ପରିବାର। ମୋଟ ଜନସଂଖ୍ୟା ୪୦୦। ଗ୍ରାମରେ ଥିବା ୩ ନଳକୂପ ମଧ୍ୟରୁ ୨ଟି ଅଚଳ ହୋଇପଡ଼ିଛି। ଭୂତଳ ଜଳସ୍ତର ନିମ୍ନଗାମୀ ହେବା ଯୋଗୁ ସଚଳ ଥିବା ଗୋଟିଏ ନଳକୂପରୁ ଆବଶ୍ୟକ ପରିମାଣର ପାଣି ବାହାରୁ ନାହିଁ। ଘଣ୍ଟାଏରେ ବଡ଼କଷ୍ଟରେ ଗରାଏ ପାଣି ବାହାରୁଛି। ସେହିପରି ଗୋଟିଏ ଖୋଲାକୂଅ ମଧ୍ୟ ଶୁଖିଲା ପଡ଼ିଛି। ଜଙ୍ଗଲ ଅଧ୍ୟୁଷିତ ଖମାର ଗ୍ରାମବାସୀଙ୍କ ପାଣିକଷ୍ଟ ଦୂର କରିବା ଲାଗି ୨୦୧୫ରେ ସୋଲାର ଜଳପ୍ରକଳ୍ପ ନିର୍ମାଣ କରାଯାଇଥିଲା। ଏହା ବର୍ଷେ ହେଲା ଅଚଳ ହୋଇପଡ଼ିଛି। ତେଣୁ ଦୈନିକ ଆବଶ୍ୟକତା ମେଣ୍ଟାଇବା ଲାଗି ଗ୍ରାମର ମହିଳାମାନେ ୪ ମାସ ହେଲା ଗ୍ରାମଠାରୁ ୧ କିଲୋମିଟର ଦୂର ଅନ୍ୟ ଏକ ଖୋଲାକୂଅ ଉପରେ ନିର୍ଭର କରୁଛନ୍ତି। ପୁରୁଷମାନେ ସ୍ନାନଶୌଚ କରିବା ଲାଗି ୨ କିମି ଦୂର ନାଳକୁ ଯାଉଛନ୍ତି। ଜଳସଙ୍କଟରେ ଗୋମହିଷାଦି ପ୍ରାଣୀ ସମ୍ପଦ ମଧ୍ୟ ପ୍ରଭାବିତ ହେଉଛନ୍ତି। ସମସ୍ୟାର ସମାଧାନ କରିବାକୁ ଗ୍ରାମବାସୀ ବ୍ଲକ ପ୍ରଶାସନ, ଜିଲା ପ୍ରଶାସନ ସମେତ ଜନପ୍ରତିନିଧିଙ୍କ ଦୃଷ୍ଟି ଆକର୍ଷଣ କରିଥିଲେ ମଧ୍ୟ କୌଣସି ସୁଫଳ ମିଳୁନାହିଁ। ସମସ୍ୟାର ସ୍ଥାୟୀ ସମାଧାନ ହେବା ଯାଏ ଟ୍ୟାଙ୍କର ଯୋଗେ ପାଣି ଯୋଗାଣ ବ୍ୟବସ୍ଥା କରିବାକୁ ସେମାନେ ଦାବି କରିଛନ୍ତି। ଏ ନେଇ ଆଠମଲ୍ଲିକ ଜଳ ଯୋଗାଣ ବିଭାଗ କନିଷ୍ଠଯନ୍ତ୍ରୀ ଉମାକାନ୍ତ ବେହେରା କହିଛନ୍ତି, ଖମାର ଗ୍ରାମରେ ଅଚଳ ଥିବା ନଳକୂଅ ସଜାଡ଼ିବା ଲାଗି ଶୀଘ୍ର ପଦକ୍ଷେପ ନିଆଯିବ।
ରାତି ପାହିଲେ ଚିନ୍ତା ଘାରୁଛି
ଦୀର୍ଘଦିନ ହେଲା ଗ୍ରାମରେ ପାଣି ସମସ୍ୟା ଲାଗି ରହିଛି। ରାତି ପାଇଲେ ପାଣି ଚିନ୍ତା ଘାରୁଛି। ରୋଷେଇ କାର୍ଯ୍ୟ ଲାଗି ୧କିମି ଦୂରରୁ ପାଣି ବୋହି ଆଣିବା ବେଶି କଷ୍ଟଦାୟକ ହେଉଛି।
– ବିଘ୍ନଶିନୀ ନାୟକ, ଗ୍ରାମବାସୀ
ପାଣି କିଣିବାକୁ ପଡୁଛି
ସୋଲାର ପାଣି ପ୍ରକଳ୍ପ ଅଚଳ ହୋଇପଡ଼ିବା ପରେ ସମସ୍ୟା ବଢ଼ିଛି। ମେଳା ମହୋତ୍ସବ, ପର୍ବପର୍ବାଣିରେ ପାଣି କିଣିବାକୁ ପଡୁଛି। ଏହାର ସ୍ଥାୟୀ ପ୍ରତିକାର ଲାଗି ଏକ ପ୍ରକଳ୍ପ ନିର୍ମାଣ କରାଯିବା ଜରୁରୀ।
– ଚନ୍ଦ୍ରମଣି ନାୟକ, ଗ୍ରାମବାସୀ
ଅଣଦେଖା କରାଯାଉଛି
ଖମାର ଗ୍ରାମକୁ ପ୍ରଶାସନ ଅଣଦେଖା କରିଚାଲିଛି। ବର୍ଷସାରା ପାଣି ଚିନ୍ତାରେ ଗ୍ରାମବାସୀ ଦିନ କାଟୁଛନ୍ତି। ଖରାଦିନେ ସ୍ଥିତି ଆହୁରି ବିଗିଡ଼ି ଯାଉଛି। ତୁରନ୍ତ ଟ୍ୟାଙ୍କର ସହାୟତାରେ ପାଣି ଯୋଗାଇ ଦିଆଯାଉ।
– ମାନସ ନାୟକ, ଗ୍ରାମବାସୀ
ପ୍ରଶାସନ ଦୃଷ୍ଟି ଦେଉ
ନଳକୂପ ଅଚଳ ହୋଇଯିବା, ଖୋଲାକୂଅ ଶୁଖିଯିବା ପରେ ଗ୍ରାମରେ ଜଳସମସ୍ୟା ଉତ୍କଟ ରୂପ ଧାରଣ କରିଛି। ଦୈନିକ ଦୀର୍ଘପଥ ଅତିକ୍ରାନ୍ତ କରି ପାଣି ଆଣିବାକୁ ପଡୁଛି। ପ୍ରଶାସନ ଏଥିପ୍ରତି ଦୃଷ୍ଟି ଦେଉ।
– ତରଣୀ ରଣା, ଗ୍ରାମବାସୀ
ଖୁବ୍ଶୀଘ୍ର ପଦକ୍ଷେପ ନିଆଯିବ
ଅଭିଯୋଗ ସମ୍ପର୍କରେ ଅବଗତ ନାହିଁ। ଖମାରବାସୀଙ୍କ ପାନୀୟ ଜଳ ସମସ୍ୟାର ସମାଧାନ ଲାଗି ବ୍ଲକ ପ୍ରଶାସନ ପକ୍ଷରୁ ତୁରନ୍ତ ପଦକ୍ଷେପ ନିଆଯିବ। ଅଚଳ ନଳକୂଅ ମରାମତି ଲାଗି ବିଭାଗକୁ ନିର୍ଦ୍ଦେଶ ଦିଆଯିବ।
– ସନ୍ତୋଷ କୁମାର ସାହୁ, ବିଡିଓ
